"استانا" قارجى ورتالىعى مەن Nasdaq ىنتىماقتاستىق جونىندە كەلىسىم جاسادى

نيۋ-يوركتە «استانا» حالىقارالىق قارجى ورتالىعى (احقو) دەلەگاتسياسىنىڭ اقش-قا ساپارى اياسىندا احقو باسقارۋشىسى قايرات كەلىمبەتوۆ پەن Nasdaq, Inc پرەزيدەنتى ادەنا فريدمان ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويدى. مەموراندۋم جاساۋدىڭ باستى ماقساتى احقو-نىڭ بيرجالىق ينفراقۇرىلىمى شەڭبەرىندە ءوزارا ءتيىمدى قارىم-قاتىناس ورناتۋ بولىپ تابىلادى. مەموراندۋمعا قول قويۋ - Nasdaq, Inc كومپانياسىنىڭ احقو (AIX) بيرجاسىنىڭ قۇرىلۋىنداعى قولداۋ كورسەتۋدىڭ العاشقى قادامى. Nasdaq, Inc احقو-عا جاساعان ستراتەگيالىق سەرىكتەستىك بويىنشا ۇسىنىسىندا قارجىلىق قۇرالداردى, ەسەپتىك-كليرينگتىك وپەراتسيالاردى ساۋدالاپ جانە جۇزەگە اسىراتىن حالىقارالىق ستاندارتتاردى, بيزنەس ەرەجەلەر مەن رەتتەۋ, احقو قور بيرجاسىنىڭ جۇمىسىنا جوعارعى تەحنولوگيالىق شەشىمدەردى دايىنداپ, ەنگىزۋ, وپەراتسيالىق پروتسەدۋرالاردى دايىنداۋ, قىزمەتكەرلەرگە ترەنينگتەر ۇيىمداستىرۋ, سونىمەن قاتار, جاڭا قارجىلىق تەحنولوگيالاردى ەنگىزۋدىڭ جولدارىن ىزدەۋ بويىنشا ءىس-شارالاردى قاراستىرعان, دەپ حابارلادى قارجى ورتالىعىنىڭ ءباسپاسوز قىزمەتى. احقو باسقارۋشىسى قايرات كەلىمبەتوۆ اتاپ وتكەندەي, جۇمىسى 2017 جىلدىڭ ورتاڭعى شەنىندە باستالاتىن احقو بيرجاسىندا ءارتۇرلى باعالى قاعازدار مەن وندىرىستىك قارجىلىق قۇرالدارى ساۋدالاناتىن بولادى. ق.كەلىمبەتوۆتىڭ سوزىنشە احقو بيرجاسى ۇلتتىق نارىقتار مەن جەتەكشى بيرجالاردىڭ حالىقارالىق ساۋدا جۇيەسىمەن ىقپالداسۋىن قامتاماسىز ەتەتىن بولادى. ياعني, احقو بيرجاسى جەرگىلىكتى ينۆەستورلار مەن  شەتەلدىك ينۆەستورلاردىڭ بىرلەسۋىنە ىقپال ەتپەك, جانە الەمدىك قارجىنىڭ استاناعا كەلۋىنە اسەر ەتپەك. «ءبىز احقو-نىڭ ۇزدىك الەمدىك ستاندارتتارعا ساي كەلەتىن جوعارى تەحنولوگيالىق بيرجالىق ينفراقۇرىلىمدى قۇرۋ بويىنشا جوسپارلارىن قولدايمىز جانە الداعى ۋاقىتتا ۇزاق مەرزىمدىك ىنتىماقتاستىق جاساۋعا دايىنبىز», - دەپ اتاپ ءوتتى Nasdaq, Inc پرەزيدەنتى ادەنا فريدمان. جالپى العاندا, تاراپتار اتاپ وتكەندەي, اتالعان مەموراندۋمنىڭ قول قويىلۋى احقو-نىڭ بيرجالىق ينفراقۇرىلىمىن دامىتۋعا ارنالعان ماڭىزدى قادام بولىپ سانالادى. ەسكە سالا كەتسەك, احقو 2015 جىلدىڭ جەلتوقسان ايىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ «استانا» حالىقارالىق قارجى ورتالىعىن (احقو) قۇرۋ تۋرالى كونستيتۋتسيالىق زاڭعا قول قويدى. احقو-نىڭ ماقساتى قارجىلىق قىزمەتتەردى كورسەتەتىن حالىقارالىق دەڭگەيدەگى جەتەكشى ورتالىق قالىپتاستىرۋ بولىپ تابىلادى. پوستكەڭەستىك كەڭىستىكتە تۇڭعىش رەت اعىلشىن قۇقىعىنىڭ قاعيداتتارى ەنگىزىلەدى, قارجى ورتالىعىنىڭ رەسمي ءتىلى  -  اعىلشىن ءتىلى بولادى. احقو-نىڭ مىندەتتەرى قارجىلىق قىزمەتتەر سالاسىندا ينۆەستيتسيالاۋ ءۇشىن تارتىمدى ورتا قۇرۋ ارقىلى ەل ەكونوميكاسىنا ينۆەستيتسيالار تارتۋعا جاردەمدەسۋ, قازاقستان رەسپۋبليكاسىنىڭ باعالى قاعازدار نارىعىن دامىتۋ, ونىڭ حالىقارالىق كاپيتال نارىقتارىمەن ىقپالداسۋىن قامتاماسىز ەتۋ بولىپ تابىلادى. احقو سونداي-اق ەلىمىزدە ساقتاندىرۋ, بانك قىزمەتتەرى مەن يسلامدىق قارجىلاندىرۋ نارىعىن دامىتۋعا نيەتتەنەدى. ال, Nasdaq, Inc - بۇل ءىرى قور بيرجاسى, وعان بارلىق اشىق تۇردەگى اكتسيونەرلىك قوعامداردىڭ جارتىسىنان كوبى تىركەلگەن. ول سونداي-اق  وسى بيرجادا ساۋدا جاسايتىن كومپانيالاردىڭ نارىقتىق كاپيتاليزاتسياسى بويىنشا نيۋ-يورك قور بيرجاسىنان كەيىنگى الەمدەگى ەكىنشى ءىرى بيرجا بولىپ سانالادى, بيرجا الەمنىڭ باسقا بيرجالارىمەن سالىستىرعاندا ەلەكتروندىق ساۋدانىڭ ەڭ جوعارعى كولەمىنە يە. بيرجانىڭ اتاۋى  National Association of Securities Dealers Automated Quotations (باعالى قاعازدار جونىندەگى ديلەرلەردىڭ ۇلتتىق قاۋىمداستىعىنىڭ اۆتوماتتاندىرىلعان باعا بەلگىلەۋلەرى) اببرەۆياتۋراسىنان شىققان.