قالدىقتى قاجەتكە جاراتادى

جاسىراتىنى جوق, قازىر قاي ەلدى مەكەنگە بارساق تا جول بويىندا, تۇرعىن ۇيلەر اراسىندا شاشىلىپ جاتقان پوليەتيلەن قاپشىقتاردان كوز سۇرىنەدى. تازالىق ايلىعىندا نەمەسە مەكتەپ وقۋشىلارىنىڭ سەنبىلىكتەرىندە ارنايى تازارتىلسا دا 1 كۇن وتپەي جاتىپ پوليەتيلەن پاكەتتەر تاعى كوبەيەدى. سەبەبى, حالىق ساتىپ الاتىن بارلىق زاتتارىن بىررەتتىك قولدانۋعا ارنالعان پاكەتتەرگە سالىپ الادى. ەگەر تارازداعى «پوليەتيلەن-اگرونىڭ» جۇمىسى قارقىندى دامىسا, قورشاعان ورتامىز ىبىرسىعان پاكەتتەردەن ءبىرشاما تازارىپ قالار ەدى. ەندەشە بۇل زاۋىت قالدىقسىز ءونىم شىعارۋمەن قاتار ەكولوگيالىق تازالىققا دا كوپ ۇلەس قوسىپ جۇرگەنى ءسوزسىز. وتكەن جىلى ۇدەمەلى يندۋستريالىق-يننوۆاتسيالىق باعدارلامامەن اشىلعان «پوليەتيلەن-اگرو» جشس اسىرەسە باۋ-باقشا ەگەتىن شارۋالاردىڭ قاجەتتىلىگىن قامتىپ وتىر. سەرىكتەستىك شىعاراتىن تاۋار – پلەنكالار مەن پوليەتيلەن ءجىپ. مۇنداعى ەنى 10 مەترلىك پلەنكالار نەگىزىنەن باۋ-باقشاعا, ياعني جىلىجايلارعا ارنالىپ شىعارىلادى. سونىمەن قاتار, پلەنكالاردى ازىق-ت ۇلىك وندىرۋشىلەر تاعامداردىڭ تازالىعىن ساقتاۋ ءۇشىن ءونىمدى قاپتاۋعا پايدالانادى. سول سەكىلدى پوليەتيلەن جىپتەرىن دە كوبىنە اۋىلشارۋاشىلىق باعىتىنا قولدانادى ەكەن. ەڭ باستىسى, تازا پلەنكالاردى, ازىق-ت ۇلىك قاپتامالارىن شىعارعاندا قالاتىن قالدىق ونىمدەردى قايتا وڭدەپ, قۇرىلىسقا قاجەتتى ماتەريال دايىندايدى. ياعني, كولەمدى شىعارىلاتىن قوڭىرقاي ءتۇستى پلەنكالاردى قۇرىلىستا سىز وتكىزبەيتىن توسەنىش رەتىندە قولدانادى. سەرىكتەستىكتە ءوندىرىس ورنىنان شىققان قالدىقتى پايداعا جاراتۋ كوزدەلگەن. سەرىكتەستىك ديرەكتورى نۇرپەيىس قالدىبەكوۆتىڭ ايتۋىنشا, ەنى 10 مەترلىك پلەنكانى ەلىمىزدە جالعىز «پوليەتيلەن-اگرو» عانا وندىرەدى ەكەن. – جالپى, پلەنكا شىعاراتىن ءوندىرىس ورىندارى كوپ. بىراق ءبىزدىڭ ەلدە باۋ-باقشاعا, قۇرىلىسقا قولدانۋعا ىڭعايلى, كولەمدى ەتىپ شىعاراتىن ءبىز عانا. پلەنكانىڭ ەنىن 10 مەتر ەتىپ شىعاراتىن قۇرىلعىنى قىتايدان اكەلدىك. زاۋىتىمىزدى كۇللى الەمگە بۇرىننان ءمالىم جىبەك جولىنىڭ, بۇگىنگى ۇلكەن كۇرە جولدىڭ بويىنا سالدىق. سەبەبى, بۇل جول تالاي ەلدى جالعاپ جاتىر جانە وڭتۇستىك ءوڭىرىنىڭ ورتالىعى سەكىلدى. ياعني, تۇتىنۋشىلارعا دا وڭتايلى بولۋى قاراستىرىلعان. اۋىلشارۋاشىلىق تاۋارلارىنىڭ 80 پايىزى وڭتۇستىك ايماقتا وندىرىلەتىندىكتەن زاۋىتىمىز وسى ايماققا سالىندى. جىلىنا 2000 تونناعا دەيىن ءونىم شىعارامىز. تۇتىنۋشىلار تاراپىنان سۇرانىس تا جاقسى. اسىرەسە, ءونىمىمىزدىڭ 80 پايىزىن كورشى وڭتۇستىك قازاقستان وبلىسىنداعى سارىاعاش اۋدانىنىڭ جىلىجاي سالۋشىلارى مەن باقشا داقىلدارىن وسىرۋشىلەر الادى. قاجەتتى شيكىزاتتى شەتەلدەردەن اكەلەمىز. الدىمەن تاعامدار قاپتاماسىنا, اۋىلشارۋاشىلىق باعىتىنا قاجەتتى تازا, وتە كولەمدى پلەنكالاردى شىعارامىز. ودان شىققان قالدىقتاردى قايتا وڭدەپ, پوليەتيلەن ءجىبىن وندىرەمىز. سول جىپتەردەن قوڭىرقاي ءتۇستى پلەنكالار شىعارىلادى. ونى جول سالعاندا, عيمارات تۇرعىزعاندا استىنا توسەۋگە قولدانادى, – دەيدى نۇرپەيىس قالدىبەكوۆ. قازىر 15 ادامدى جۇمىسپەن قامتىپ وتىرعان سەرىكتەستىك جۇمىس قارقىنىن باسەڭدەتپەي, الداعى ۋاقىتتا ءوندىرىستى ارى قاراي دامىتۋدى جوسپارلاپ وتىر. ورالحان ءداۋىت, «ەگەمەن قازاقستان» جامبىل وبلىسى سۋرەتتى تۇسىرگەن التىنبەك قارتاباي