ەڭبەكتىڭ قاشاندا ونبەگى بولادى. جالقاۋلىققا جايداق ءمىنىپ, «الما ءپىس, اۋزىما ءتۇس» دەپ شالجيىپ جاتقان ادامنىڭ ماڭدايى شىلقىپتى دەگەندى كورگەن دە, ەستىگەن دە كىسى جوق. شىن باقىتتىڭ ءبىر فورمۋلاسى ەڭبەگىنە ادالدىقتا جاتسا كەرەك. كاسىبىنە جان-تانىمەن بەرىلىپ, ىنتا-شىنتاسىمەن جاساسا, بايلىق تا, باقىت تا ادامدى ءوزى ىزدەپ تاباتىنىن كۇندەلىكتى ومىردەن مىڭداپ كەزىكتىرۋگە بولادى. وسىنىڭ ءبىر دالەلىن قىزىلوردالىق ديقاندار دا قولمەن قويعانداي كورسەتىپ وتىر. وسىدان ءۇش جىل بۇرىن سىر ءوڭىرىنىڭ شارۋالارى تاۋەلسىزدىك جىلدارىنداعى ەڭ ۇلكەن رەكوردتىق كورسەتكىشكە قول جەتكىزىپ, كۇرىشتەن مول ءونىم جيناعان. ەڭبەكتىڭ ونىمدىلىگىنە ارقالانعان ديقاندار قاۋىمى ول كورسەتكىشتى بىلتىر تاعى ءبىر بەلەسكە كوتەرىپ تاستاعان-تىن. بيىل دا قىزىلوردالىق كۇرىششىلەر جولىنان جاڭىلعان جوق. سولايشا, تاعى دا رەكوردتىق ونىمگە قول جەتكىزدى.
تاۋەلسىزدىكتىڭ جيىرما بەس جىلدىعى مەن ەكى مارتە سوتسياليستىك ەڭبەك ەرى, دالا اكادەميگى, داڭعايىر ديقان ىبىراي جاقاەۆتىڭ 125 جىلدىعى قارساڭىندا قىزىلوردا وبلىسى كۇرىشتىڭ ءار گەكتارىنان 52,8 تسەنتنەردەن ءونىم الدى. ماسەلەن, شيەلى اۋدانىندا كۇرىشتىڭ ءار گەكتارىنان 59,2 تسەنتنەردەن اينالدى. جەكەلەگەن شارۋاشىلىقتار 70 تسەنتنەردەن استام ءونىم جيناۋدا. ايتالىق, «ماعجان جانە ك» جاۋاپكەرشىلىگى شەكتەۋلى سەرىكتەستىگى 71 تسەنتنەر ءونىم السا, «اقتوبە جانە ك» جشس گەكتارىنا 94,5 تسەنتنەردەن جينادى.
ايتا كەتۋ كەرەك, رەكوردتىق ءونىم 3,8 مىڭ گا كۇرىش الاڭىن ازايتۋ, تۇقىم ساپاسى مەن جەردىڭ مەليوراتيۆتىك جاي-كۇيىن جاقسارتۋ ەسەبىنەن الىنىپ وتىر.
جىلدان جىلعا كۇرىش ەكسپورتىنىڭ كولەمى ۇلعايىپ كەلە جاتىر. ياعني قىزىلوردا وبلىسى جىلىنا 50 مىڭ توننا كۇرىش ەكسپورتتايدى.
بيىل يران نارىعىنا 5 ميلليون توننا كۇرىش شىعارۋ ءۇشىن قىزىلوردا وبلىسىندا سۇرانىسقا يە يراندىق سورتتى تاجىريبەلىك سىناقتان وتكىزۋ جۇمىستارى باستالدى. ونىڭ باعاسى قازاقستاندىق كۇرىشتەن 5 ەسە جوعارى. بۇگىندە ايماق مازانداران پروۆينتسياسىنا كۇرىش جەتكىزۋ ءۇشىن الدىن الا كەلىسىم جاساۋدا.
ەرتە كوكتەمنەن ەگىس باسىندا ءجۇرىپ, القاپتاعى الاساپىران جۇمىستى اتقارعان ديقاندار قاۋىمىنىڭ ەڭبەگى وسىلايشا ناتيجەلى بولىپ, باراقاتقا بولەنىپ جاتىر. ال ەندى وسىنى باقىت دەمەي كورىڭىزشى؟!
ەرجان بايتىلەس,
«ەگەمەن قازاقستان»
قىزىلوردا وبلىسى
سۋرەتتى تۇسىرگەن ماكسيم روجين
شيەلى اۋدانىندا كۇرىشتىڭ ءار گەكتارىنان 59,2 تسەنتنەردەن اينالدى. جەكەلەگەن شارۋاشىلىقتار 70 تسەنتنەردەن استام ءونىم جيناۋدا.
ايتالىق, «ماعجان جانە ك» جاۋاپكەرشىلىگى شەكتەۋلى سەرىكتەستىگى 71 تسەنتنەر ءونىم السا, «اقتوبە جانە ك» جشس گەكتارىنا 94,5 تسەنتنەردەن جينادى.
