ەندوسكوپيالىق حيرۋرگيانىڭ بولاشاعى زور

اقتوبەدە وتكەن قازاقستان ەندوسكوپيالىق حيرۋرگتەرى اسسوتسياتسياسىنىڭ VI حالىق­ارالىق سەزىنە ەلىمىزدەگى بىلىكتى دارىگەر­لەرمەن بىرگە, وڭتۇستىك كورەيا, رەسەي, ۋكراينا, ليتۆا, گرۋزيادان جۇزدەن استام ماماندار, بارلىعى 500-گە جۋىق ادام قاتىستى. «قازاقستان ەندوحيرۋرگياسىنىڭ جەتىستىكتەرى مەن بولاشاعى» دەگەن تاقىرىپتا ۇيىمداستىرىلعان سەزد اياسىندا ەكى كۇن بويى وبلىستىق اۋرۋحانا, وبلىستىق بالالار اۋرۋحاناسى, وبلىستىق جەدەل مەديتسينالىق كومەك اۋرۋحاناسى جانە م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ بازالارىندا 8 شەبەرلىك-ساباعى ءوتكىزىلىپ, 35 كۇردەلى وتا جاسالدى. عىلىمي سەسسيالاردا ەندوسكوپيالىق حيرۋرگيانىڭ كوپتەگەن سالالارى بويىنشا باياندامالار وقىلىپ, وزىق ادىستەر ورتاعا سالىندى, دارىگەرلەر ءوزارا وي ءبولىسىپ, تاجىريبە الماستى. ەلىمىزدىڭ ەندوسكوپيالىق حيرۋرگتەرى اسسو­تسيا­تسياسىنىڭ VI حالىقارالىق سەزىنىڭ جابىلۋ سالتاناتىندا ءسوز العان وبلىس اكىمىنىڭ ورىن­باسارى اسقار شەريازدانوۆ دارىگەرلەردىڭ, سونىڭ ىشىندە حيرۋرگتەردىڭ جۇرەك جىلۋى مول, قول­­دارى التىن ادامدار ەكەنىن اتاپ ءوتتى. وسى كۇن­­دەرى ولاردىڭ ءوز كاسىبىنىڭ بىلگىرلەرى رەتىندە جا­سا­عان وتالارى, وتكىزگەن شەبەرلىك كلاستارى وتە پاي­دالى ەكەنىنە ايرىقشا توقتالدى. بار­­لىق سا­لانىڭ, اسىرەسە, دەنساۋلىق ساقتاۋ سالا­­سى­­­نىڭ ءوزارا ىنتىماقتاستىق ارقىلى دا­مي­­تى­نى­نا توقتالا كەلىپ, مۇنداي تاجىريبە ال­ما­سۋ­­­لار­­دىڭ ىلگەرىلەۋگە جول اشاتىنىن جەتكىزدى. مەديتسينا عىلىمدارىنىڭ دوكتورى, اكا­دەميك ناماز ىزىمبەرگەنوۆ ەندوسكوپيالىق حي­رۋرگ­­تەردىڭ كەزەكتى سەزىنىڭ اقتوبەدە ءوتۋى­نىڭ رەتى بار ەكەنىن تىلگە تيەك ەتە كەلىپ, بۇل ءادىستى يگەرۋ­دە پرو­فەسسور, بىلىكتى حيرۋرگ ۆلادي­مير كوت­لو­بوۆ­سكيدىڭ ۇلەسى زور ەكەنىن ايتتى. ونىڭ ايتۋىنشا, مۇنايشىلاردىڭ قار­جى­لاي قول­داۋىمەن 1991 جىلى وبلىستىق بالا­لار اۋرۋ­حا­ناسىنا ءبىر ەندوسكوپيالىق قون­دىر­عى الىپ بەرىلگەن. ۆ.كوتلوبوۆسكي وسى قون­دىرعى­نى جەتىك پايدالانا وتىرىپ, وبلىس­تىق بالالار اۋرۋحاناسىندا العاشقى وتانى جاسايدى. – بۇل ەلىمىزدە ءبىرىنشى جاسالعان وتا بولاتىن. قازىر ءبىزدىڭ حيرۋرگ-دارىگەرلەرىمىزدىڭ بۇل سالاداعى شەبەرلىگى تمد ەلدەرىندەگى ارىپتەستەرىنىڭ كوبىنەن ارتىق بولماسا, ەش كەم ەمەس. بۇل ءادىستىڭ تيىمدىلىگى سول ادام دەنەسى تىلىنبەيدى, ادام قولى ارالاسپايدى, وتا پىشاقسىز جاسالادى. مۇندا ءوزى ناۋقاسقا وتا جاسالعاننان كەيىنگى كەزەڭ دە جاقسى وتەدى, سىرقاتتىڭ تەز ساۋىعىپ كەتۋىنە العىشارت جاسايدى, – دەيدى اكادەميك ناماز ىزىمبەرگەنوۆ. وبلىستىق دەنساۋلىق ساقتاۋ باسقارما­سىنىڭ باسشىسى اسەت قاليەۆ سەزدە ەندوسكو­پيانىڭ ونكولوگيالىق, ۋرولوگيالىق, حيرۋر­گيالىق, بارياتريكالىق جانە باسقا ماسەلەلەرى بويىنشا تالقىلانعانىن جەتكىزدى. – وبلىس اكىمىنىڭ قولداۋىمەن ەلىمىزدىڭ باتىس وڭىرىنە قىزمەت كورسەتەتىن مەديتسينالىق كلاستەر قۇرۋ باعىتىندا جۇمىس ىستەۋدەمىز. بۇگىنگى سەزد سول باعىتتاعى جۇمىستاردىڭ جال­عاسى. قازىر ءبىزدىڭ دارىگەرلەر بۇيرەك اۋىس­تىرۋدى يگەرىپ الدى. باۋىر اۋىستىرۋ ورتا­لىقتان كەلەتىن بىلىكتى دارىگەرلەرمەن بىرگە جۇزەگە اسىرىلۋدا. بۇرىن زاقىمدانعان ءبۇي­رەكتى الىپ تاستايتىن ەدىك, قازىر ەندوس­كو­پيا­ل­ىق قوندىرعىنىڭ ارقاسىندا ورگاندى قۇت­قارۋ باعىتىندا وتا جاساۋعا قول جەتكىزىلدى. سەمىز­دىكتەن ارىلتۋعا وتا جاساۋدى باستادىق. بىل­تىر 160 كەلى بولاتىن ادامعا وتا جاسالىپ, ول 40 كەلى سالماق تاستادى, – دەيدى باسقارما باسشىسى. سەزدىڭ جابىلۋ سالتاناتى بارىسىن­دا ەندوحيرۋگيانىڭ دامۋىنا ەلەۋلى ۇلەس قوسىپ جۇرگەن دارىگەرلەردى ماراپاتتاۋ ءراسىمى بولدى. پرەزيدەنتتىك ءىس باسقارماسى مەديتسينالىق ورتالىعىنىڭ باس حيرۋرگى, پروفەسسور سەرىك توقپانوۆ قازاقستان ەندوسكوپيالىق حيرۋرگتەرى اسسوتسياتسياسىنىڭ «ەندوحيرۋرگيانىڭ دامۋىنا ەلەۋلى ۇلەس قوسقانى ءۇشىن» مەدالىمەن ماراپاتتالدى. ءبىر توپ دارىگەرلەرگە وبلىس اكىمى بەكىتكەن «اقتوبە وبلىسىنىڭ ەندوبەينەحيرۋگيالىق قىزمەتىن دامىتۋعا قوسقان ۇلەسى ءۇشىن» مەدالى تاپسىرىلدى. ولاردىڭ قاتارىندا وبلىستىق بالالار اۋرۋحاناسىنىڭ بولىمشە مەڭگەرۋشىسى, مەديتسينا عىلىمدارىنىڭ دوكتورى ۆلاديمير كوتلوبوۆسكي, ۇعا-نىڭ اكادەميگى, پروفەسسور ناماز ىزىمبەرگەنوۆ, رەسەيلىك عالىم الەكسەي ترۋنوۆ, قارعالى اۋداندىق اۋرۋحاناسىنىڭ حيرۋرگى قايرات بوكەتوۆ جانە باسقالارى بار. وبلىستىق دەنساۋلىق ساقتاۋ باسقاراما­سىنىڭ باسشىسى اسەت قاليەۆ وڭىردە ەندوحيرۋر­گيانى دامىتۋعا قوسقان ۇلەسى ءۇشىن «KarlStorz» كومپانياسىنىڭ «التىن ەندوسكوپ» سىيلىعىنا يە بولدى. وبلىس اكىمىنىڭ ورىنباسارى اسقار شەريازدانوۆ وبلىستىق بالالار اۋرۋحاناسىنىڭ باس دارىگەرى نۇرلان قوجينگە وبلىس اكىمىنىڭ 40 ميلليون تەڭگە گرانتىن تاپسىردى.  ساتىبالدى ءساۋىرباي, «ەگەمەن قازاقستان» اقتوبە وبلىسى سۋرەتتى تۇسىرگەن حايرەدەن راۋشانوۆ