ءۇي جانىنان سنارياد تابىلدى

ماسەلەنىڭ ءمانىسى مىنادا. اۋىل ادامىنىڭ كۇندەلىكتى شارۋاسى مەن قام-قاراكەتى تاۋسىلعان با؟! تىرلىكتىڭ وسىنداي قامىمەن ءىلبىشىن اۋىلى تۇرعىندارىنىڭ ءبىرى ۇيىنە سۋ قۇبىرىن وتكىزۋ ءۇشىن ونىڭ اينالاسىن قازا باستايدى. ءبىر كەزدە ءۇي يەسى توپىراقتىڭ اراسىندا جاتقان ءبىر جاعى تىك, ەكىنشى ۇشى ۇشكىر, دوڭەستەۋ كەلگەن بەلگىسىز زاتقا تاپ بولادى. سودان سوڭ بۇل ءوزى جارىلعىش زات ەمەس پە ەكەن دەپ ءسال ويلانىپ قالادى دا, ساقتىق جاساپ, جەرگىلىكتى پوليتسياعا حابار بەرەدى. ونىڭ كۇدىگى راسقا شىعادى. باتىس قازاقستان وبلىستىق ىشكى ىستەر دەپارتامەنتى ءباسپاسوز قىز­مەتىنەن الىنعان دەرەك اۋىل تۇرعىنى تاپ بولعان شاعىن سوپاقشا زات ازامات سوعىسى كەزىندە جارىلماي قالعان سنارياد ەكەنىن ايعاقتاپ وتىر. اۋىل ازاماتى ءۇيىنىڭ ىرگەسىندە جاتقان سناريادتىڭ ۇزىندىعى 32 سانتيمەتر, ال ديامەترى 76 ميليمەتر بولىپ شىقتى. بۇدان سوڭ جارىلعىش زات­تى ارنايى ماماندار قاۋىپسىزدىك شارالارىن ساقتاي وتىرىپ, زالال­سىزداندىردى. وسى ارادا ايتا كەتەرلىك تاعى ءبىر ءجايت – ءىلبىشىن جوعارىدا ايتىلعانداي ازامات سوعىسى دەپ اتالعان جىلدار­دا قيان-كەسكى شايقاستاردىڭ ورتا­لىعى بولعانى. بۇل ارادا انەكدوتتاردىڭ اتى اڭىزعا اينالعان كەيىپكەرى ۆاسيلي چاپاەۆتىڭ بەلگىلى №25 ديۆيزياسى ورنالاسقانى ءارى ونىڭ وسى ماڭدا جارالى كۇيىندە جايىقتىڭ ارعى بەتىنە ءجۇزىپ جەتە الماي سۋعا باتىپ مەرت بولعانى تاريحي دەرەكتەردەن بەلگىلى. تەمىر قۇسايىن, «ەگەمەن قازاقستان» باتىس قازاقستان وبلىسى, اقجايىق اۋدانى, ءىلبىشىن اۋىلى