بىرەۋلەر بىزگە قاستاندىق ويلاپ ءجۇر دەيدى گەليوس

الەۋمەتتىك جەلىلەردە گەليوس جانارماي قۇيۋ ستانساسىندا اۆتوكولىككە بەنزيننىڭ ورنىنا "اۋا" قۇيىپ جاتقا بەينەروليك ارانداتۋشىلىق ارەكەت دەپ باعالانىپ, بۇل ءوز كەزەگىندە كومپانيا ءيميدجىن ءتۇسىرۋ ءۇشىن قاساقانا جاسالدى دەگەن تۇجىرىم ايتىلدى. بۇل تۋرالى قازاقپارات اگەنتتىگىنىڭ ساۋالىنا «گەليوس» كومپانياسىنان بەرىلگەن جاۋاپتا كەلتىرىلگەن. «قىزمەتتىك تەكسەرۋ بارىسىندا اتالعان جانار-جاعارماي قۇيۋ ستانساسىنا سول كۇنى كەلگەن كليەنت كاسسيردەن 85 تەڭگەگە اي-92 ماركالى بەنزينىن قۇيۋدى ءوتىنىپ, ءوز ەركىمەن بەنزين قۇياتىن پيستولەتتى الىپ, كولىگىنىڭ باگىنە سالعان. سونىمەن بىرگە ول وتىن قۇياتىن كەزدە باكتان پيستولەتتى الىپ شىعىپ جانە ونى شۇرىپپەسىن تومەن قاراي تۇسىرگەن, ال شلانگىنى جوعارۋ كوتەرۋ ارەكەتىمەن تەحنيكالىق پروتسەسستى بۇزدى», -دەپ ءتۇسىندىردى كومپانيا. سونىمەن قاتار كومپانيا وكىلدەرى بەينە روليك اۆتورى كولونكوعا ستانسانىڭ قىزمەتكەرىن جاقىنداتپاعانىن جانە وسى ارەكەتىمەن پيستولەتكە زاقىم كەلتىرگەنىن اتاپ ءوتتى. «ونىڭ كولىككە 85 تەڭگەگە بەنزين قۇيۋى, سونداي-اق بەينە ءتۇسىرىلىم جاساۋ ارەكەتتەرىندە «گەليوس» كومپانياسى تۋرالى جاعىمسىز پىكىر قالىپتاستىرۋ بويىنشا قاساقانا ماقسات بولدى. بەينە روليكتى زەرتتەۋ كەزىندە پيستولەتتى تومەن تۇسىرگەن كەزدە ەسەپتەگىشتە ساندار ارتقانى, ال پيستولەتتى كوتەرگەن كەزدە ولشەمدەر مەن اقشا سوماسى ازايعانى بايقالادى. اتاپ ايتقاندا, كولونكا ەسەپتەگىشى باياۋ قارقىنمەن اينالعانىن ەسكەرە وتىرىپ, شلانگىدە وتىننىڭ بار ەكەندىگىن اڭعارۋعا بولادى. الايدا كولونكا پيستولەتىنىڭ شۇرىپپەسى تومەن ءتۇسىپ تۇرعاندىقتان, بەنزين سىرتقا قاراي اقپادى», - دەپ ءتۇسىندىردى گەليوس.كومپانيانىڭ پايىمىنشا, بەينە روليكتە سول كۇنى بولعان بارلىق جايت قامتىلماعان. «ەگەر دە بەينە ءتۇسىرىلىمنىڭ جالعاسى بولسا, وندا كولونكا اۆتوماتتى تۇردە ءوشىپ قالعاندىعى كورىنەر ەدى. شىنىندا كولونكا 400 ميلليليتر مولشەرىندە اۆتوماتتى تۇردە ءسونىپ وتىردى, بۇل جاعداي بەينەدە كورسەتىلمەگەن. اتالعان جايت تەحنيكالىق سيپاتتامامەن تۇسىندىرىلگەن, سەبەبى زاقىمدانعان ۆتۋلكامەن شلانگى وتىنعا تولعاننان كەيىن كولونكا جۇمىسىن توقتاتادى, ال جۇيە گاز قايتارىمى جۇيەسىنىڭ جوقتىعىن انىقتايدى»,-دەلىنگەن حابارلامادى. كومپانيا وكىلدەرى وسىنىڭ الدىندا كولونكا تەحنيكالىق تۇرعىدا دۇرىس جۇمىس ىستەپ تۇرعانىن, بىراق تا اتالعان اقاۋ بەينە روليك اۆتورىنىڭ مەحانيكالىق قاتە ارەكەتتەرىمەن تۋىنداعانىن العا تارتۋدا. وسى سەبەپتى «گەليوس» كومپانياسى ۇنەمى كولىككە وتىن قۇيۋ مىندەتىن تەك ستانسانىڭ وپەراتورلارىنا جۇكتەيدى. تەك وسى جاعدايدا عانا كورسەتىلگەن قىزمەتتەرى ءۇشىن تولىق جاۋاپكەرشىلىكتى وزدەرىنە الادى. جانار-جاعارماي قۇيۋ ستانساسى كليەنتىمەن بولعان وقيعادان كەيىن تەحنيكالىق ماماندار كولونكا جۇمىسىن زەرتتەگەن, وسى رەتتە گاز قايتارىم جۇيەسىنىڭ تۇتىكشەسى ىستەن شىققاندىعى انىقتالعان كورىنەدى. «اتالعان زاقىمدانۋ تەك بەينە روليك اۆتورىمەن پيستولەتتى دۇرىس پايدالانباۋ سەبەبىنەن ورىن الۋى مۇمكىن. كولونكا جۇمىسىنىڭ رەجىمى بۇزىلعاندىعى انىقتالىسىمەن, ىستەن شىققان بولشەكتەر دەرەۋ تۇردە اۋىستىرىلدى», - دەيدى ءباسپاسوز قىزمەتى. سونىمەن قاتار «گەليوس» كومپانياسى الەۋمەتتىك جەلىلەردە ارانداتۋشىلىق بەينە روليكتەن كەيىن جازىلعان سىندارعا الاڭداۋشىلىق ءبىلدىرىپ وتىرعاندىعىن جەتكىزدى. «بەينە ءتۇسىرىلىم اۆتورىنىڭ ارەكەتتەرى كومپانيانىڭ وڭ ءيميدجىن تۇسىرۋگە باعىتتالعانى تۋرالى پىكىرىمىزدى جەتكىزگىمىز كەلەدى. ءبىز 17 جىلدان استام ۋاقىتتان بەرى تۇتىنۋشىلار يگىلىگىنە جۇمىس ىستەپ كەلەمىز جانە ءادىل سەرىكتەستىك ابىرويىن قاستەرلەيمىز. وسىعان بايلانىستى بارلىق باسەكەلەستەرىمىزدى بيزنەستى ادال جۇرگىزۋگە, ال كليەنتتەرىمىزدە ءتۇرلى ارانداتۋشىلىقتارعا ءمان بەرمەۋگە شاقىرامىز», - دەپ اتاپ وتىلگەن كومپانيا حابارلاماسىندا.