تاتارستان وكىلدىگىنىڭ جاڭا عيماراتى اشىلدى

كەشە استانادا تاتارستاننىڭ قازاقستانداعى وكىلەتتى وكىلدىگىنىڭ جاڭا عيماراتى اشىلدى. اشىلۋ سالتاناتىنا استانا قالاسىنىڭ اكىمى اسەت يسەكەشەۆپەن بىرگە, قازاقستانعا ەكى كۇندىك رەسمي ساپارمەن كەلگەن تاتارستان رەسپۋبليكاسىنىڭ پرەزيدەنتى رۋستام ميننيحانوۆ قاتىستى. العاشقى ءسوزدى استانا قالا­سىنىڭ اكىمى اسەت يسەكەشەۆ الىپ, جاڭا عيماراتتاعى ارىپتەستىك ەكى ەلدىڭ اراسىنداعى قارىم-قاتى­ناس­تاردى تەرەڭدەتە تۇسۋگە قىزمەت ەتەتىندىگىنە سەنىم ءبىلدىردى. مۇن­داي شارالار ءبىزدىڭ جاقىن دوستى­عىمىزدى دالەلدەيدى. حالىق­تارىمىز تامىرى تەرەڭگە كەتكەن تۋىستىق, دوستىق قارىم-قاتى­ناستا. جاڭا عيمارات تا سول ءۇر­دىسكە قىزمەت ەتەرى ءسوزسىز. سون­دىقتان سىزدەردى جاڭا تابىسپەن قۇتتىقتايمىن, دەدى ول. تاتارستان پرەزيدەنتى رۋستام ميننيحانوۆ ءوزىنىڭ سوزىندە وسىنداي تاماشا عيماراتتا اشىلىپ تىندىرىمدى جۇمىس ىستەپ وتىرعان وكىلدىك ەكى حالىقتىڭ, ەكى ەلدىڭ دوستىعى مەن ەكونوميكالىق ىنتىماقتاستىعىن تەرەڭدەتە تۇسەتىنىنە سەنىمىن ءبىلدىردى. بىزدەر – تۇركى الەمىندەگى ەڭ جاقىن حالىقتارمىز. قازاقستانعا كەلگەن سايىن سونى سەزىنەمىز. ءبىز قازاق­ستانداعى تاتار دياسپو­را­سى­نىڭ دا تۋىس­قان حالىقتىڭ ورتا­سىندا تاماش­ا ءومىر ءسۇرىپ جات­قانىن جاقسى بىلەمىز. ولار وزدەرىن «قازاق­ستاندىقتارمىز» دەپ اتاپ, ءتىلى مەن ءداستۇرىن ساق­تاۋ­عا مول مۇمكىنشىلىك جاساپ وتىر­عانى ءۇشىن قازاقستان باس­شى­لىعىنا ريزاشىلىعىن بىلدىرۋدە. سوندىقتان دا سىزدەرگە بەك زۋر راح­مات دەيمىز, دەدى ول ءوزىنىڭ سوزىندە. سونىمەن قاتار, عيماراتتىڭ اشىلۋ سالتاناتىنا رەسەي فەدە­را­تسياسىنىڭ قازاقستان رەسپۋب­لي­كاسىنداعى ەلشىلىگىنىڭ كەڭەسشىسى ۆيكتور نەفەدوۆ تە قاتىسىپ, ءسوز سويلەدى. ەسىلدىڭ سول جاعالاۋىنداعى «BI Village Deluxe-1» كوتتەدجدەر قالاشىعىندا ورنالاسقان بۇل شاعىن عيمارات الاڭسىز جۇمىس ىستەۋگە وتە  ىڭعايلى. اينالاسىندا كولىك شۋى جوق, قالانىڭ مازاسىز تىرلىگى سەزىلمەيتىن جايلى جەردە ەندى تاتارستاننىڭ قىزىل-جاسىل تۋى جەلبىرەپ, تۋىسقان حالىقتىڭ ءبىر ۇياسىنداي بولىپ تۇراتىن بول­دى. ايتا كەتەتىن جايت, استانادا قازاقستان مەن تاتارستاننىڭ ساۋ­دا-ەكونوميكالىق, عىلىمي-تەح­ني­كالىق جانە مادەني ىنتى­ماق­­تاستىعىن جانداندىرىپ وتىراتىن وكىلدىك اشۋ تۋرالى بىرلەس­كەن كەلىسىمگە 1997 جىلدىڭ 25 تامى­زىندا قول قويىلعان. بۇل وكىل­دىك زاڭدى تۇلعا رەتىندە قازاق­ستاندا 1998 جىلعى 26 قازاندا ءتىر­كەلىپ, جۇ­مىس ىستەپ جاتىر. ءمى­نە, ەندى ول جا­ڭا عيماراتقا كوشىپ وتىر. تاتار­ستاننىڭ قازاقستان­داعى وكىل­دىگىنىڭ باسشىسى – ءرۇس­تەم ۆاليۋل­لوۆ. وكىلدىك عيماراتىنىڭ اشىلۋ سالتاناتىنا قازاقستانداعى تاتار ەتنومادەني بىرلەستىگىنىڭ وبلىستارداعى وكىلدەرى دە قاتىس­تى. ولار استاناعا تاتارستان پرە­زيدەنتى ر.ميننيحانوۆپەن كەزدە­سۋگە كەلگەن ەدى. كەزدەسۋ ءبىر كۇن بۇرىن «قازمەديا» ورتالى­عىندا وتكەن بولاتىن. 2009 جىل­عى ساناققا قاراعاندا, قازىر قازاق­ستاندا 200 مىڭنان استام تاتار تۇرادى. تاتار ەتنومادەني بىرلەس­تىكتەرى بارلىق وبلىستاردا اشىل­عان, ولار ەكى قاۋىمداستىققا بىرىككەن. جاقسىباي سامرات, «ەگەمەن قازاقستان»