«ەڭبەك جولى» بايقاۋى مارەگە جەتتى

استانادا ەڭبەك كۇنىنە ارنالعان «جالپىعا ورتاق ەڭبەك قوعامى» فورۋمى ءوتتى. ونىڭ بارىسىندا «ەڭبەك جولى» رەسپۋبليكالىق بايقاۋىنىڭ جەڭىمپازدارى ماراپاتتالدى. دەنساۋلىق ساقتاۋ جانە الەۋمەتتىك دامۋ مينيسترلىگى ۇيىمداستىرعان شاراعا پارلامەنت دەپۋتاتتارى, مەم­لەكەتتىك ورگاندار, حالىقارالىق ۇيىمدار, بيزنەس قاۋىمداستىقتار مەن كاسىپوداقتاردىڭ وكىلدەرى جانە جۇمىسكەرلەر قاتىستى. دەنساۋلىق ساقتاۋ جانە الەۋمەتتىك دامۋ مي­نيسترى تامارا دۇيسەنوۆا 2013 جىل­دىڭ 22 قاراشاسىندا ەلباسىنىڭ جارلىعىمەن بەكىتىلگەن ەڭبەك كۇنىن مەرەكەلەۋ جىل سايىن قىركۇيەكتىڭ سوڭعى جەكسەنبىسىندە اتالىپ ءجۇر­گەنىن ەسكە سالدى. مەرەكەنىڭ باستى ماقساتى – ەڭبەك ادامى مارتەبەسىن ارتتىرۋ, جاستار اراسىندا جۇمىسشى كاسىبىن كەڭىنەن ناسيحاتتاۋ جانە ەڭبەك اۋلەتتەرىنىڭ جىلدار بويعى داستۇرلەرىن نىعايتۋ بولىپ تابىلادى. – ۇكىمەت قازاقستاندىقتاردىڭ جۇمىسپەن قامتىلۋىنا اسا زور كوڭىل ءبولىپ وتىر. ەلىمىزدە «جۇ­مىسپەن قامتۋدىڭ جول كارتاسى-2020» باعدارلاماسى جۇزەگە اسىرىلىپ كەلەدى. بۇل باعدارلاما تەك جۇمىسقا ورنالاستىرۋدى عانا ەمەس, سونىمەن قاتار, قوعام­نىڭ, كاسىپكەرلىك سالانىڭ دامۋى­نىڭ سۇرانىسى مەن جاڭا جۇمىس ورىندارىنىڭ قۇرىلۋىنا قاراي سۇرانىسقا يە ماماندىقتارعا وقى­تۋدى قاراستىرادى. 5 جىلدىڭ ءىشىن­دە باعدارلاماعا 710 مىڭ ادام قا­تىسىپ, ونىڭ 533 مىڭى تۇراقتى جۇمىسقا ورنالاستى. 128 مىڭ تۇر­عىن ءوز بىلىمدەرىن جەتىلدىرىپ, جاڭا ماماندىق يەلەرى اتاندى, – دەدى ءوز سوزىندە تامارا دۇيسەنوۆا. دەنساۋلىق ساقتاۋ جانە الەۋ­مەتتىك دامۋ مينيسترلىگىنىڭ باستاماسىمەن ۇيىمداستىرىلعان «ەڭبەك جولى» بايقاۋى ەڭبەك ادامدارى تۋرالى جاعىمدى قوعامدىق پىكىر قالىپتاستىرۋعا جانە كاسىپورىندار مەن ۇيىمداردا جاڭا ەڭبەك اۋلەت­تەرىنىڭ قالىپتاسۋىنا جاعداي جا­ساۋعا, قازاقستاندىقتاردىڭ بو­يىندا رەسپۋبليكا ەكونوميكاسىنىڭ دامۋىنا ايتارلىقتاي ۇلەس قوسقان وتانداستارى ءۇشىن ماقتانىش سەزىمىن تاربيەلەۋگە نەگىزدەلگەن. بايقاۋدىڭ ءبىرىنشى كەزەڭى ايماقتاردا «ۇزدىك ەڭبەك اۋلەتى», «ءوندىرىستىڭ ۇزدىك جاس مامانى», «جۇمىس ىستەيتىن جاس­تاردىڭ ۇزدىك تالىمگەرى» نوميناتسيا­لارى بويىنشا ءوتتى. رەسپۋبليكا بويىنشا بايقاۋعا بارلىعى 460 ادام قاتىسقان. – بۇگىن «ەڭبەك جولى» باي­قاۋىنىڭ ايماقتىق كەزەڭىنىڭ ءۇش نوميناتسياسى بويىنشا جوعارى كور­سەتكىشكە جەتكەن 48 جەڭىمپاز وسى زالدا وتىر. ولاردىڭ ىشىندە بەلگىلى ءبىر سالادا قىزمەت ەتىپ كەلە جاتقان وتباسىلاردىڭ 4 بۋىنىن اتاپ ايتۋ كەرەك. شىعىس قازاقستان وبلىسىنداعى فيليپوۆتار وتباسى ەڭبەك اۋلەتىنىڭ بارلىعى 360 جىل ەڭبەك ءوتىلى بولسا, ءدال سون­­داي ەڭبەك ءوتىلى اتى­راۋ وب­لى­سىنداعى ارالباەۆتاردىڭ تەمىر­­­جولشىلار اۋلەتىندە دە بار. وڭ­تۇستىك قازاقستان وبلىسىنداعى جاڭاباەۆتار اۋلەتىنىڭ ەڭبەك ءوتىلى – 242 جىل. ءبىزدىڭ ەلىمىزدە مۇنداي وتباسىلار وتە كوپ. بارلىعىنا دەنساۋلىق پەن ساتتىلىك تىلەيمىن, – دەدى ءسوزىنىڭ قورىتىندىسىندا تا­مارا دۇيسەنوۆا. رەسپۋبليكالىق «ەڭبەك جولى» بايقاۋى قورىتىندىسىندا «ۇزدىك ەڭبەك اۋلەتى» نوميناتسياسى بويىنشا جەڭىمپاز بولىپ اتىراۋ وبلىسىنان كەلگەن ارالباەۆتار اۋلەتى, «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا «سوكولوۆ-سارىباي تاۋ-كەن بايىتۋ وندىرىستىك بىرلەستىگى» اق-تىڭ ەكسكاۆاتور ءماشينيسى اندرەي سولوۆەۆ جەڭىمپاز بولىپ تانىلدى. سولتۇستىك قازاقستان وبلىسى «مامبەتوۆ ي ك» شارۋا قوجالىعىنىڭ ناۋبايشىسى تۇرار قاسىموۆ «ءوندىرىستىڭ ۇزدىك جاس مامانى» نوميناتسياسى بويىنشا جەڭىمپاز اتاندى. شارا بارىسىندا «ەڭبەك ار­داگەرى» توسبەلگىسىمەن قازاقستان ەكو­نوميكاسىن دامىتۋعا جانە نىعايتۋعا ايتارلىقتاي ۇلەس قوسقان ءوندىرىستىڭ ءار ءتۇرلى سالالارىنىڭ 9 ارداگەرى ماراپاتتالدى. ۇلان سانجار