شاعىن اۋدان شاتتىعى

وبلىس ورتالىعىنداعى «اليۋمينستروي» شاعىن اۋدانىنىڭ بۇرىنعى تۇرعىندارى پايدالانۋعا بەرىلگەن جاڭا ۇيدەن جارقىراعان پاتەرلەرگە يە بولۋدا. بۇرىنعى تۇرعىندارى دەيتىنىمىز, قالادا وتكەن عاسىردىڭ 50-ءشى جىلدارى سالىنعان ەكى قاباتتى تۇرعىن ۇيلەر ابدەن توزىعى جەتىپ, اپاتتى جاعدايدا ەدى. كوپتەن بەرى بۇل جەرگە جاڭا ءۇي تۇرعىزۋ ماسەلەسى دە ءجيى ايتىلىپ ءجۇردى. وسىدان ءۇش-ءتورت جىل بۇرىن ەسكى ۇيلەر ورنىنان «سارىارقا» اتتى جاڭا تۇرعىن ءۇي كەشەنىنىڭ جوباسى جاسالىپ, بۇل ماقساتتى ءىستى ۇكىمەت تە قولدادى. قۇرىلىس «2020 جىلعا دەيىن وڭىرلەردى دامىتۋ» باعدارلاماسى بويىنشا جۇرگىزىلۋدە. نەگىزى بۇل باستاما, قازىرگى ۇكىمەت باسشىسى باقىتجان ساعىنتاەۆ وبلىستا اكىم بولىپ تۇرعان كەزدە قولعا الىنعان بولاتىن. ون ەكى قاباتتى بيىك ۇيلەردىڭ جوبالاۋ جۇمىستارىن جۇرگىزۋگە, ينجەنەرلىك-كوممۋنيكاتسيالىق جەلىلەر تارتۋعا قارجى دا ءبولىندى. ءسويتىپ, كەلەشەكتە 160-قا جۋىق ەسكى, ەكى قاباتتى ۇيلەر بۇزىلىپ, ونىڭ ورنىنا جاڭا تۇرعىن ۇيلەر سالىنادى دەلىندى. وندا تۇرىپ جاتقان 1272 وتباسى بۇل جاقسى لەبىزدى ەستىپ, ۇمىتتەرىن ۇكىلەگەن ەدى. تۇرعىندارعا بەرىلەتىن باسپانانىڭ اۋماعى ەسكى پاتەرلەردىڭ كولەمىنە سايكەس بولاتىنى ەسكەرتىلگەن. قۇرىلىس باس­تالاردان بۇرىن, تۇرعىندار ۋاقىتشا باسقا جەرلەرگە كوشىرىلگەن. ەندى مىنە, جاقسى ءىس جالعاسىن تاۋىپ جۇرتتى قۋانىشقا بولەپ وتىر. ماۋسىم ايىندا «سارىارقا» تۇرعىن ءۇي كەشەنىنىڭ العاشقى كەزەڭى پايدالانۋعا بەرىلىپ, جاڭا پاتەر كىلتىن 105 وتباسى الدى. ءسويتىپ, وتكەن اپتادا «تەمىرتاس-پاۆلودار» جشس-ءنىڭ تەمىر-بەتون قۇرىلعىلارى نەگىزىندە سالىنعان ش.شوكين كوشەسىندە ورنالاسقان تاعى ءبىر جاڭا ءۇي قولدانىسقا بەرىلدى. ەكىنشى كەزەڭدە 52 وتباسى پاتەر الدى. تۇرعىنداردىڭ قۋانىشىن بولىسۋگە وبلىس اكىمى بولات باقاۋوۆ تا كەلىپ قاتىستى. ءۇيدىڭ قۇنى 502,5 ميلليون تەڭگەنى قۇرايدى. وبلىس اكىمىنىڭ ايتۋىنشا, جالپى, وڭىردەگى تۇرعىنداردىڭ پاتەر الۋعا دەگەن قاجەتتىلىگىن ازايتۋ ماقساتىندا الداعى جىلدارى ءوڭىر ورتالىعىندا 22 جاڭا ءۇي سالىنادى دەپ جوسپارلانىپ وتىر ەكەن. «9 ءۇي كەشەنى وسى جىلدىڭ سوڭىنا قاراي پايدالانۋعا بەرىلەدى. بۇل – 900 وتباسى جاڭا پاتەرمەن قامتاماسىز ەتىلەدى دەگەن ءسوز», – دەدى ب. باقاۋوۆ. قازىر «سارىارقا» شاعىن اۋدانىندا جاڭا ۇيلەردىڭ قۇرىلىسى قارقىندى ءجۇرىپ جاتىر. جىل سوڭىنا دەيىن وسى اۋداندا تاعى دا 4 جاڭا ءۇي تۇرعىندار ەنشىسىنە بەرىلمەكشى. اۋدانداعى تۇرعىن ءۇي كەشەندەر قۇرىلىسى اياقتالعان كەزدە 4 مىڭ وتباسى پاتەرمەن قامتاماسىز ەتىلەدى. فاريدا بىقاي, «ەگەمەن قازاقستان»  پاۆلودار سۋرەتتى تۇسىرگەن ۆالەري بۋگاەۆ