سەم ۋولكەر – «Kazakhstan open» چەمپيونى

الماتىداعى «جايلاۋ» گولف كلۋبىندا 29 قىركۇيەك پەن 2 قازان ارالىعىندا «Kazakhstan Open - 2016» حالىقارالىق ءتۋرنيرى ءوتىپ, وعان الەمنىڭ 25 ەلىنەن 132 ويىنشى قاتىستى. حالىقارالىق جارىس ءداستۇر بويىنشا Pro-Am تۋرنيرىنەن باستالدى. بۇل ۇلكەن ويىن الدىن­داعى سوڭعى تياناقتى دايىن­دىق سياقتى شارا ەكەن. ول, سونداي-اق, قاتىسۋشىلاردىڭ ءوزارا تانىسىپ, ءتىل تابىسۋىنا سەبەپ بولادى. وسى كەزەڭ ءۇشىن دە قوماقتى جۇلدە تىگىلدى. بيىل­عى جەڭىم­پاز­دارعا مالديۆ جاعا­جايى­نا جولداما بەرىلدى. الەمدىك دەڭگەيدەگى گولف ال­پاۋىت­تارىنىڭ ۇزدىگىن انىق­تاي­تىن تۋرنير – لوندوندا وتەتىن ەۋروپا تۋرى ويىندارى. ويىنشىلار وعان جەتۋ ءۇشىن بىرنەشە دەڭگەيدەن تۇرا­تىن حالىقارالىق جارىستار ۇيىم­داستىرىلادى. سونىڭ ءبىرى – «Kazakhstan Open». وسىمەن ون ەكىنشى جىل وتكەن سايىستى «European Challenge Tour» ۇيىمى, قازاقستاننىڭ گولف فەدەراتسياسى جانە «جايلاۋ» گولف كلۋبى ۇيىمداستىردى. الماتى قالاسى­نىڭ اكىمدىگىنىڭ قولداۋىمەن ءساتتى اياقتالعان ويىنداردىڭ تۇراق­تى باس دەمەۋشىسى «Eurasian Resource Group» كومپانياسى بول­دى. شەتەلدىك جانە وتاندىق بۇقارا­لىق اقپارات قۇرالدارىندا كەڭىنەن ناسيحاتتالعان ءتۋرنيردىڭ نەگىزگى اقپاراتتىق سەرىكتەسى بولۋ «ەگەمەن قازاقستان» گازەتى ءۇشىن دە داستۇرگە اينالدى. سونىمەن, ون ەكىنشى تۋرنير نەسىمەن ەستە قالدى؟ وسى سۇراقتى ۇيىمداستىرۋشىلارعا دا, شەتەلدىك ويىنشىلارعا دا قويىپ كوردىك. دىتتەگەن جاۋاپ بىرەۋ: «جوعارى دەڭگەيدە ۇيىمداستىرىلعان ءمىنسىز ءارى قوماقتى قارجى تىگىلگەن ويىن». اسىرەسە, «Kazakhstan Open-2016» حالىقارالىق ءتۋرنيرىنىڭ بيۋدجەتى شەتەلدىكتەر ءۇشىن ەلەڭ ەتەرلىك. اۋەل باستا فرانتسۋز ويىنشىسى رومان لانگاسكە ايتىپ ەدى: «باس جۇلدەگە تىگىلگەن 72 000 ەۋرو مەنى قازاق­ستانعا جەتەلەدى», دەپ. قو­ناق­­تاردىڭ ايتۋىنشا, مۇنداي قوماقتى قارجىنى باسكە تىگەتىن ەلدەر ساناۋلى. ءدال وسى 72 000 ەۋرو تۇرا­تىن باس بايگە اعىلشىن ويىنشىسى سەم ۋولكەردىڭ قان­جىعاسىن مايلادى. جاسىل قىرات ۇستىندە 270 رەت ءساتتى سوققى جاساپ, 18 ۇپاي جيناعان كاسىپقوي گولفشى قارسىلاستارىنا قاراسىن كورسەتپەدى. بۇل – سەم مىرزانىڭ از ۋاقىت ارالىعىنداعى ەكىنشى ۇلكەن جەڭىسى. ول تامىز ايىندا فينليانديادا وتكەن «Vierumäki Finnish Challenge» تۋرنيرىندە دە جەڭىمپاز بولعان. جارىستىڭ ەكىنشى جۇلدەسى ۋولكەردىڭ جەرلەسى, اعىلشىن دجوردان سميتكە بۇيىردى. ال ءۇشىنشى ورىنعا نيدەرلاندتىق راينەر ساكستون كوتەرىلدى. – ويىننىڭ سوڭعى كۇنى قيىن جاعدايدا ءوتتى. جاڭبىر مەن قار ارالاسىپ جاۋىپ, ەل-سەل ەتتى. دەگەنمەن, دىتتەگەن ءناتي­جەگە جەتتىم-اۋ... وسىنداي ويىن ۇيىم­­­داستىرىپ, قاتىسۋعا ءمۇم­كىن­­دىك بەرگەن سىزدەرگە راحمەت. «بايتەرەك» كۋبوگىن قولىما ۇستاۋ باقىتى بۇيىرعانىنا بەك قۋا­نىش­تىمىن. قازاقستان جاساسىن! – دەيدى «Kazakhstan Open-2016» حالىقارالىق ءتۋرنيرىنىڭ چەمپيونى سەم ۋولكەر. قالماحانبەت مۇقامەتقالي, «ەگەمەن قازاقستان»  الماتى