«استانا» الىستاپ, «قايرات» قالىپ بارادى

«استانا» فۋتبول كومانداسى بيىل قاتارىنان ءۇشىنشى رەت قازاق­ستان چەمپيونى اتانۋعا تاعى ءبىر تابان جاقىنداي ءتۇستى. سەبە­بى, دەمالىس كۇندەرى بولعان پرەمەر-ليگانىڭ 29-تۋرى ويىن­دارىن­دا ەلوردالىقتاردىڭ باستى قارسىلاستارى – الماتىنىڭ «قاي­راتى» ءوز الاڭىندا شىمكەنت­تىڭ «ورداباسىسىمەن» 1:1 ەسەبىمەن تەڭ ويناپ, ۇپاي ءبولىستى. بۇل مۇمكىن­دىكتى ءمۇلت جىبەر­مەگەن «استانا» كوك­شەتاۋ­دىڭ «وقجەتپەسىن» 3:0 ەسەبى­مەن جەڭىپ, الماتىلىقتارمەن اراداعى ۇپاي ايىرماشىلىعىن 6-عا دەيىن ۇلعايتتى. الماتىداعى ويىن «قايرات» ءۇشىن وتە ءساتتى باستالدى. 19-مينۋتتا جەرار گوۋدىڭ كومەگىمەن ەسەپ اشتى. الايدا, 35-مينۋتتا «ور­دا­­باسىنىڭ» جارتىلاي قور­عاۋ­شىسى ەركەبۇلان تۇڭعىشباەۆ مەر­گەن­دىگىمەن كوزگە ءتۇستى. ويىن­نىڭ قال­عان ۋاقىتىندا الاڭ يە­لەرى قانشا شابۋىلداعانىمەن, ەسەپ وزگەرىسسىز قالدى. وسىلايشا, «قاي­رات­تىڭ» بيىلعى ماۋسىمدا «وردا­باسى­مەن» 4 رەت كەزدەسىپ, بار بول­عانى ەكى-اق ۇپاي الۋعا شاماسى جەتتى. ءوز كەزەگىندە «استانا» «وقجەت­پەستى» وڭاي جەڭدى. ماتچتىڭ 2-مينۋتىندا پاتريك تۆۋماسي ەسەپ اشىپ, كومانداسىن العا شىعاردى. قالعان گولدار ەكىنشى تايمدا سوعىلدى. الدىمەن, 56-مينۋتتا ازات نۇرعاليەۆتىڭ قانجىعاسى مايلانسا, 89-مينۋتتا تۆۋماسي دۋبلگە قول جەتكىزدى. ەندى 16 قازان كۇنى بولاتىن 30-تۋر ويىن­دارىندا «استانا» الماتىعا قوناققا بارادى. ەگەر سول كەزدەسۋدە «قايرات» بارىن سالماسا, «التىننىڭ» تاعدىرى ءبىرجولا شەشىلەتىنى ءسوزسىز. ءبىرىنشى التىلىقتىڭ كەلەسى كەزدەسۋى پاۆلوداردا «ەرتىس» پەن «اقتوبە» اراسىندا ءوتتى. نامىستى قولدان بەرمەگەن الاڭ يەلەرى قار­سىلاستارىن 5:1 ەسەبىمەن تىزە بۇك­تىردى. وسى جەڭىسىنەن كەيىن قور­جىنىنداعى ۇپايىن 47-گە جەت­كىز­گەن «ەرتىس» تۋرنير كەستەسىندە ءۇشىن­شى ورىنعا جايعاستى. سونىمەن قاتار, پرەمەر-ليگادا قالۋ ءۇشىن تەر توگىپ جاتقان ەكىنشى التىلىقتا دا تارتىس قىزا ءتۇستى. تالدىقورعاندا جەرگىلىكتى «جەتىسۋ» «اتىراۋدى» 4:3 ەسەبىمەن جەڭسە, قوستانايدىڭ «توبىلى» سىرت الاڭدا قاراعاندىنىڭ «شاحتەرىنەن» 3:2 ەسەبىمەن باسىم ءتۇستى. ال كوش سوڭىندا كەلە جاتقان «تاراز» ءوز الاڭىندا ورالدىڭ «اقجايىعىن» قابىلداپ, 2:1 ەسەبى­مەن ۇتتى. ول بۇل جەڭىستەن كەيىن تۋرنير كەستەسىندە ءبىر ساتى جوعارى كوتەرىلىپ, 11-ورىنعا تابان تىرەسە, «اقجايىق» سوڭعى ورىنعا ءتۇسىپ قالدى.  ەلامان قوڭىر