اقىن اتىنداعى مەكتەپكە – جارتى عاسىر

ۇستاز بولۋ – جۇرەكتىڭ باتىرلىعى, ۇستاز بولۋ – سەزىمنىڭ اقىندىعى, ۇستاز بولۋ – مىنەزدىڭ كۇن شۋاعى, ازبايتۇعىن ادامنىڭ التىندىعى, – دەپ جىرلاعان قازاقستاننىڭ حالىق جازۋشىسى, كورنەكتى اقىن عافۋ قايىربەكوۆ اتىنداعى №2 مەكتەپ-گيمنازيانىڭ 50 جىلدىق مەرەيتويىنا ارنالعان «اشىق ەسىك كۇنى» ءوتتى. ەل تاۋەلسىزدىگىنىڭ 25 جىلدىعىمەن تۇسپا-تۇس كەلگەن سالتاناتتى جيىنعا ەلورداداعى اتالعان ءبىلىم ورداسىنىڭ ارداگەر ۇستازدارى, ءار جىلدارى مەكتەپ ءبىتىرۋشى تۇلەكتەر جانە الىستان ات ارىتىپ كەلگەن ارنايى قوناقتار قاتىستى. ايتا كەتەيىك, اتالعان ءبىلىم ورداسى تۇڭعىش رەت وكتيابردىڭ 50 جىلدىعى اتىنداعى №2 ورتا مەكتەپ دەگەن اتاۋمەن 1966 جىلى اشىلعان بولاتىن. مەكتەپتىڭ تۇڭعىش ديرەكتورى ميحايل گاۆريلوۆيچ كۋزنەتسوۆ بولدى. ول مۇعالىمدەردى ۇسىنىس بويىنشا جانە كونكۋرستىق نەگىزدە قابىلداعان. ال 2001 جىلى ورتا مەكتەپكە  مەكتەپ-گيمنازيا مارتەبەسى, سونىمەن قاتار قابىرعالى اقىن عافۋ قايىربەكوۆ ەسىمى بەرىلدى. سودان بەرگى ۋاقىتتا ءاربىر مۇعالىمنىڭ ساباعى, سىنىپتان تىس جۇمىستارى, سىنىپ ساعاتتارى عافۋ قايىربەكوۆ شىعارمالارىمەن تىعىز بايلانىس­تا وتكىزىلىپ, اقىننىڭ ءومىر جولىمەن تانىسۋ داستۇرگە اينالعان. كەش شىمىلدىعى №2 مەكتەپ-گيمنازيانىڭ ديرەكتورى گاميل شايمەردينوۆتىڭ قۇتتىقتاۋ سوزىنەن باستاۋ الدى. سودان سوڭ ارداگەر ۇستازدار قاۋىمى وزدەرىنىڭ سۇيىكتى مەكتەپتەرىنە دەگەن جىلى لەبىزدەرىن ءبىلدىرىپ, قىزىقتى ەستەلىكتەرىمەن ءبولىستى. ارداگەر ۇستازدار مەكتەپ قابىرعاسىندا وتكىزگەن ءاربىر كۇندەرىن ساعىنا ەسكە الدى. شارا شەڭبەرىندە, كەلگەن قوناقتار 2002 جىلى مەكتەپ ىشىنەن اشىلعان عافۋ قايىر­بەكوۆ مۇراجايىنا ات باسىن بۇردى. مۇراجايدىڭ ءىشى اعامىزدىڭ كوزى تىرىسىندە كادەسىنە جاراتقان دۇنيەلەرىمەن جابدىقتالعان. اقىننىڭ قولدانعان زاتتارى: ۇستەل, ورىندىق, راديوقابىلداعىش, قالامدارى, كوزىلدىرىگى, شىرپى مەن كۇلسالعىشى, ت.ب. قويىلىپتى. كەزىندە ءوزى ۇستاعان پاپكاسى مەن قولجازبالارى دا وتكەن كۇندەردەن سىر شەرتەدى. وسى زاتتاردى كوزدىڭ قاراشىعىنداي ساقتاپ, مۇراجايعا تاپسىرعان عافۋ قايىربەكوۆتىڭ جۇبايى بادەش حامزاقىزىنا العىستارىن بىلدىرگەن مەكتەپ ۇجىمى اقىن ءومىرى مەن شىعارماشىلىعىنا توقتالىپ, مەكتەپتىڭ بۇگىنگى تىنىس-تىرشىلىگى جايلى ءبىراز جاڭالىقتان حاباردار ەتتى. كوركەم شىعارمالارىن, قۇندى جادىگەرلەرىن قاستەرلەپ, باعالاي بىلەتىن ۇرپاعى بار عافۋ اقىن ماڭگى جاساي بەرمەك. سودان سوڭ 11 سىنىپ وقۋشىلارى دايىنداعان «ۇستاز – مەكتەپ جۇرەگى» اتتى تاربيە ساعاتى تاماشالاندى. ساباق بارىسىندا كونتسەرتتىك نومىرلەر, ينتەراكتيۆتى ويىندار جانە قوناقتارعا شاعىن ەستەلىك سىيلىقتار تابىس ەتىلدى. مەرەكەلىك جيىن سوڭى وقۋشىلار مەن كاسىپقوي ارتىستەردىڭ («ناز» بي توبى, ءانشى باحتيار وماروۆ جانە استانا قالاسى ونەر ۋنيۆەرسيتەتىنىڭ تارلاندارى) قاتىسۋىمەن قويىلعان كونتسەرتتىك باعدارلاماعا ۇلاستى. مەرەكە سوڭىندا مەكتەپ تاريحى جايلى جۋرنال مەن گۇل شوقتارى سىيعا تارتىلدى. وسىلايشا اسەرلى وتكەن مەكتەپتىڭ 50 جىلدىق مەرەيتويى قاتىسۋشىلاردىڭ ەسىندە ۇزاق ساقتالارى ءسوزسىز. راۋشان تاۋىرحانقىزى, جۋرناليست