مۇعالىم – ەل ەرتەڭى سانالاتىن وسكەلەڭ ۇرپاقتى تاربيەلەيتىن ەڭ مارتەبەلى ماماندىق
الماتىدان – ميرا بايبەك
الماتى قالاسىنداعى سۇلتاناحمەت قوجىقوۆ اتىنداعى №39 مامانداندىرىلعان ليتسەيدە ۇستاز ەڭبەگىن ۇلىقتاۋ ماقساتىندا «ۇستاز اتى – بيىك ءارى ماڭگىلىك» اتتى تاقىرىپتا كوركەمونەرپازدار كونتسەرتتىك باعدارلاما ۇسىندى. كونتسەرت بارىسىندا ليتسەيدىڭ ارداگەر ۇستازدارى تۇرسىنگۇل تاسبولاتوۆا, كۇلاش سەرجانوۆا, زاريا ىسقاقوۆانىڭ ەرەن ەڭبەكتەرىن ەلەۋ ماقساتىندا سىي-قۇرمەتتەر كورسەتىلدى. كاسىبي ەڭبەك جولىندا جوعارى ناتيجەگە جەتكەن, شاكىرتتەردى پاتريوتتىق تاربيەگە باۋلۋدا ونەگە بولا بىلگەن ليتسەي ۇستازدارى كۇلايحان سارىمبەتوۆا, گۇلباقىت سانجيەۆا, تولقىن بايعاليەۆا, قۇدايبەرگەن قۇلشىعاشوۆ «نۇر وتان» پارتياسىنىڭ ماقتاۋ قاعازدارىمەن ماراپاتتالدى. ءبىلىم باسقارماسىنىڭ ماراپاتتاۋىنا ساكەن جۇنىسبەك, گۇلجان سەيىتوۆا, قۇدايبەرگەن لاتىپوۆ سىندى ۇستازدار لايىق دەپ تانىلدى. Cول كۇنى قالاداعى №147 گيمنازيا دا مۇعالىمدەر كۇنىن زور قۋانىشپەن اتاپ ءوتتى. مەكتەپ وقۋشىلارىنىڭ ۇيىمداستىرۋىمەن «مەنىڭ سۇيىكتى ۇستازىم» اتتى سۋرەت كورمەسى مەن «ۇستازعا مىڭ العىس!» اتتى مەرەكەلىك جيىندا اۋداندىق ءبىلىم باسقارماسىنىڭ اتىنان قوعامدىق جۇمىستارعا بەلسەنە ارالاسقانى ءۇشىن مارجان راحانوۆا مەن رايحان امەتوۆاعا العىس حات تابىس ەتىلدى. گيمنازيا ديرەكتورى روزا ماكەجانوۆا پەداگوگيكالىق ۇجىمداسى گاۋھار سۇندەتباەۆا, اقمارال مۇحامەتكارىموۆا, ءزارۋ يزەمبەتوۆا, تولقىن قانافينا سياقتى ۇزدىكتەرگە ماقتاۋ قاعازدارىن تاپسىردى. مەرەكەلىك كەش مەكتەپتەگى كوركەمونەرپازدار ۇيىرمەسى مۇشەلەرىنىڭ شىرقاپ سالعان انىمەن جالعاستى. الماتىسەمەيدەن – راۋشان نۇعمانبەكوۆا
«قازىرگى زاماندا ءبىلىم دەڭگەيى جوعارى ۇلت قانا جاھاندانۋ تالاپتارىنا جاۋاپ بەرە الادى. سوندىقتان ءبىلىم سالاسى – ەلدىڭ ەرتەڭىن ايقىندايتىن, ونىڭ باسەكەلەستىك قابىلەتىنە ىقپال ەتەتىن اسا ماڭىزدى سالا», دەپ ەلباسىمىز ايتقانداي, ەگەمەن ەلدىڭ بولاشاعى ءۇشىن تاۋەلسىزدىگىمىزدى تۇعىرلاندىراتىن وسكەلەڭ ۇرپاقتى تاربيەلەۋشى ۇستازداردىڭ كاسىبي مەرەكەسى سەمەي قالاسى بويىنشا اتالىپ ءوتتى. شاكارىم اتىنداعى مەملەكەتتىك ۋنيۆەرسيتەتتىڭ رەكتورى مەيىر ەسكەندىروۆ قالاداعى ۇستازدار قاۋىمىن شىن جۇرەكتەن قۇتتىقتاعاننان كەيىن, كەزىندە سەمەي مەملەكەتتىك پەداگوگيكالىق ينستيتۋتىندا وقىعان جانە ۇزاق جىلدار جاس ۇرپاقتى تاربيەلەۋگە ۇلكەن ۇلەس قوسقان مۇعالىمدەرگە «جىل مۇعالىمى» ماراپاتىن تابىس ەتتى. مۇنداي ماراپاتقا №37 مەكتەپ-گيمنازيا ديرەكتورى جۇماعازى ستامبەكوۆ تە يە بولىپ, ارىپتەستەرىن اسپەتتەگەن بۇل كۇنگە ەرەكشە ريزا ەكەندىگىن ايتتى. مەرەكەگە وراي استانادان ارنايى كەلگەن اكادەميك-عالىم عاريفوللا ەسىم, بۇگىندە عىلىم-ءبىلىم سالاسىنا دەگەن تالاپتار وزگەرگەنمەن, ۇستازدىڭ مارتەبەسى ەشقاشان جوعالماق ەمەس دەگەن ويىن ورتاعا سالدى. – مەن ءوزىم 80 جىلدىق تاريحى بار وسى وقۋ ورنىنىڭ تۇلەگىمىن. شاكىرتتەرىن ءبىلىم نارىمەن سۋسىنداتىپ, ادامگەرشىلىك رۋحتا باعىت-باعدار بەرۋدە وقىتۋشىلاردىڭ ەڭبەگى زور. سوندىقتان دا مۇعالىم ءاردايىم قاسيەتتى تۇلعا رەتىندە ەرەكشەلەنەدى, سونداي ۇستازداردىڭ ءبىرى امانتاي يسا ۇلى, – دەي كەلە عاريفوللا ەسىم زالدا وتىرعان ۋنيۆەرسيتەتتىڭ پروفەسسورى, تاريحشى-عالىم امانتاي ءيسيننىڭ كەۋدەسىنە «شاكارىم» مەدالىن تاقتى. سەمەيشىمكەنتتەن – باقتيار تايجان
مۇعالىمدەردىڭ ءتول مەرەكەسى شىمكەنتتەگى «تاتۋ» سالتانات سارايىندا لايىقتى اتالىپ ءوتتى. جيىندا ولاردى وبلىس اكىمى بەيبىت اتامقۇلوۆ ارنايى قۇتتىقتاپ, قيلى دا قىزىق ەڭبەكتەرىنە تابىس تىلەدى. كاسىبي مەرەكەدە كوپتەگەن ۇستازدار سانداعان جىلدارداعى ەڭبەكتەرىنىڭ جەمىسىن كورىپ, مەملەكەتتىك ناگرادالارعا يە بولدى. ولار ءبىلىم قىزمەتكەرلەرى ءۇشىن ەڭ ۇلكەن ماراپات ىبىراي التىنسارين اتىنداعى ارنايى توسبەلگىگە لايىق دەپ تانىلدى. سولاردىڭ ءبىرى – سوزاق اۋدانىنداعى گيمنازيا مەكتەبىنىڭ ديرەكتورى, اۋداندىق ءماسليحاتتىڭ دەپۋتاتى بەرىك تۇرعىنبەكوۆ « ۇلى مۇحاڭ, مۇحتار اۋەزوۆ: «ەل بولام دەسەڭ, بەسىگىڭدى تۇزە», دەپ ايتقان. جاس بالا قالاي يسەڭ سولاي مايىساتىن جاس شىبىق سياقتى. كوپ جىلعى ەڭبەگىمىزدە ماراپات ءۇشىن ەمەس, ەلىمىزدىڭ كەلەشەگى دۇرىس بولۋى ءۇشىن ەڭبەك ەتتىك. سول ەڭبەگىمىزدىڭ باعالانعانىنا ريزامىز», دەدى. وڭتۇستىك ۇستازدارى ءتول مەرەكەسى قارساڭىندا ۇلكەن تابىسقا جەتكەنىن ءسوز ىڭعايىندا ايتا كەتەيىك. استانادا وتكەن رەسپۋبليكالىق «2016 جىلدىڭ ۇزدىك پەداگوگى» بايقاۋىندا تولە بي اۋدانىنداعى №1 مەكتەپ-گيمنازيانىڭ قازاق ءتىلى مەن ادەبيەتى ءپانىنىڭ مۇعالىمى نۇريلا بايتاسوۆا كونكۋرس جەڭىمپازى بولدى. سونىمەن قاتار, رەسپۋبليكا مەكتەپتەرى اراسىنداعى بايقاۋدا شىمكەنتتەگى ى.التىنسارين اتىنداعى №66 مەكتەپ-گيمنازياسى ءبىرىنشى ورىندى جەڭىپ الدى.تارازدان – ورالحان ءداۋىت
ءاربىر ادام ءوزىنىڭ بالالىق شاعىن ەسكە العاندا, وقىعان مەكتەبى, العاشقى مۇعالىمى تۋرالى ايتادى. مۇعالىمنىڭ ءاربىر جىلى ءسوزى, قامقور كوڭىلى, سونىمەن بىرگە تالاپشىل مىنەزى شاكىرتتەرىنىڭ ەسىندە ماڭگى قالادى. ياعني, ءاربىر تاربيەلى شاكىرت اياۋلى ۇستازدارىن قۇرمەت تۇتادى. جاعىمدى بەينەسىن وزىنە ۇلگى ەتەدى. وسىنداي ەل بولاشاعىنا ولشەۋسىز قىزمەت ەتەتىن جانداردىڭ ەڭبەگى ارقاشان قۇرمەتتەۋگە لايىق! جامبىل وبلىسىنىڭ ۇستازدارى تاۋەلسىزدىكتىڭ 25 جىلدىعىن جوعارى جەتىستىكتەرمەن قارسى العالى وتىر. بيىلعى جىلى رەسپۋبليكالىق, حالىقارالىق بايقاۋلاردا 176 جامبىلدىق مۇعالىمنىڭ جەڭىمپاز بولىپ تانىلۋى, دارىندى وقۋشىلاردىڭ حالىقارالىق وليمپيادالار مەن عىلىمي جارىستاردا 68 مەدالدى, رەسپۋبليكالىق ءپان وليمپياداسىنىڭ قورىتىندىسى بويىنشا بەسىنشى جىل قاتارىنان ءبىرىنشى كوماندالىق ورىندى يەلەنۋى – وبلىس مەكتەپتەرىندەگى تىنىمسىز ەڭبەكتىڭ ناتيجەسى ەكەنى انىق. بۇل كۇنى وبلىستىڭ ءبىلىم بەرۋ جۇيەسىن دامىتۋ مەن جەتىلدىرۋگە قوسقان ەلەۋلى جەكە ۇلەسى جانە جاس جەتكىنشەكتەردى وقىتۋ مەن تاربيەلەۋدەگى جەتىستىكتەرى ءۇشىن بىرقاتار ءبىلىم قىزمەتكەرلەرى وبلىس اكىمىنىڭ «قۇرمەت» گراموتاسىمەن, «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» جانە ى.التىنسارين اتىنداعى توسبەلگىمەن, «ەڭبەك ارداگەرى» مەدالىمەن ماراپاتتالدى. سونداي-اق, وبلىستىق «ۇزدىك پەداگوگ» كونكۋرسىنىڭ جەڭىمپازدارى دا وبلىس اكىمىنىڭ العىس حاتىنا جانە باعالى سىيلىقتارعا يە بولىپ, ۇلكەن قۋانىشقا بولەندى. جامبىل وبلىسى
