قازاقستاندا بالالار ينتەرنەتى پايدا بولۋى مۇمكىن

  جىل باسىنان بەرى قازاقستاندا 20 مىڭنان استام ءارتۇرلى تاقىرىپتاعى بەيادەپ ينتەرنەت-ماتەريالدار بۇعاتتالدى. بۇل دەرەكتى اقپارات جانە كوممۋنيكاتسيا مينيسترلىگىنىڭ جاۋاپتى حاتشىسى جانات قوجاحمەتوۆ جاريا ەتتى, دەپ حابارلايدى ەgemen.kz ءتىلشىسى. «16 جاسقا تولماعان تۇلعالاردىڭ الەۋمەتتىك جەلىلەردە تىركەلۋىن شەكتەۋ» تاقىرىبىندا وتكەن وتىرىسقا مەملەكەتتىك ورگاندار مەن مەملەكەتتىك ەمەس ۇيىم وكىلدەرى, قوعام بەلسەندىلەرى قاتىستى. جانات قوجاحمەتوۆ مينيسترلىكتىڭ مەملەكەتتىك مەكەمە رەتىندە ينتەرنەت پەن الەۋمەتتىك جەلىلەردى مۇقيات باقىلاپ وتىراتىنىن, مازمۇنى بالا پسيحولوگياسىنا زيان سايتتارمەن قاتار, زياندى مالىمەتتەردىڭ دە بۇعاتتالاتىنىن ايتتى. «ءبىز قۇزىرلى ورگاندارمەن بىرلەسە وتىرىپ پايداسىنان زيانى كوپ سايتتاردىڭ جۇمىسىن توقتاتامىز. ودان بولەك, جەتكىنشەكتەر كوپ قىزىعاتىن الەۋمەتتىك جەلىلەردىڭ ءوزىن دە قاتاڭ قاداعالاپ, ساراپتاپ وتىرامىز. بيىلدىڭ وزىندە 20 مىڭنان استام ماتەريالدى بۇعاتتادىق. سەبەبى, ولاردىڭ باسىم بولىگى بالالاردى ءوز-وزىنە قول جۇمساۋعا يتەرمەلەيتىن, تەرىس اعىمدارعا شاقىراتىن, بۇزاقىلىق ارەكەتتەر ارقىلى قاتىگەزدىككە باۋليتىن جانە  پورنوگرافيالىق مازمۇنداعى ماتەريالدار», دەدى ول. جيىندا بالالاردى ينتەرنەتتىڭ قاۋىپ-قاتەرىنەن قورعاۋ ءۇشىن تەحنيكالىق مۇمكىندىكتەر ارقىلى شەكتەۋ قويۋ تۋرالى دا ءتۇرلى ۇسىنىستار ايتىلدى. سولاردىڭ ءبىرى – «بالالار ينتەرنەتىن» قوسۋ مۇمكىندىگى. «بالكىم, بايلانىس وپەراتورلارىمەن بىرلەسە وتىرىپ جەتكىنشەكتەرگە ارنالعان «بالالار ينتەرنەتى» قىزمەتىن ىسكە قوسۋ كەرەك شىعار. بۇل كەيبىر ەلدەردىڭ تاجىريبەسىندە بار نارسە. بەلگىلى ءبىر دەڭگەيدە  ينتەرنەتتىڭ ءتاريفىن ەنگىزىپ, وزگەسىنە شەكتەۋ قويىلۋى كەرەك. ونىڭ ەرەكشەلىگى, بالالارعا ارنالعان ينتەرنەتتە زياندى كونتەنتتى بۇعاتتاۋ مىندەتتەلەتىن بولادى», دەدى قوجاحمەتوۆ. نۇرلىبەك دوسىباي, «ەگەمەن قازاقستان»