سوڭعى 8 ايدا 14 000 جۇمىس ورنى اشىلدى - ج.قاسىمبەك

كەشە ينۆەستيتسيالار جانە دامۋ ءمينيسترى جەڭىس قاسىمبەك ءباسپاسوز ءماسليحاتىن وتكىزىپ, يندۋستريالىق-يننوۆاتسيالىق دامۋ جانە «نۇرلى جول» باعدارلامالارىنىڭ جۇزەگە اسىرىلۋ بارىسى, سونداي-اق, مينيسترلىكتە بيىلعى جىلدىڭ 8 ايىندا اتقارىلعان جۇمىستاردىڭ جاي-كۇيى تۋرالى جۋرناليستەرگە بايانداپ بەردى. ءمينيستردىڭ ايتۋىنشا, يندۋس­تريا­لىق-يننوۆاتسيالىق دامۋ باعدار­لاماسىنىڭ اياسىندا ەلىمىزدە ونەركا­سىپتىك ينفراقۇرىلىمدار ءۇشىن قاجەتتى ءما­سەلەلەر تولىعىمەن شەشىلدى دەۋگە بولادى. ەلىمىزدە اۆتوونەركاسىپ, مەدي­تسي­نالىق تەحنيكا, تيتان ونەركاسىبى, كۇن, جەل ەنەرگەتيكاسى سىندى وڭدەۋ ونەر­كاسىبىنىڭ 26 سالاسى قالىپتاسقان. جۇك ۆاگونى مەن جولاۋشىلار ۆاگونى, ەلەك­تروۆوز, جەڭىل اۆتوكولىك پەن اۆتوبۋس, ترانس­فورماتور, رەنتگەن قۇرىلعىلارى سىن­دى بۇرىن-سوڭدى شىعارىلماعان 500-دەن استام جاڭا ءونىم شىعارۋ جولعا قوي­ىلعان. – ەڭ باستىسى, وسى جاڭا وندىرىستەردىڭ ارقاسىندا ساپالى جاڭا جۇمىس ورىندارى قۇرىلدى. بەس جىلدىڭ ىشىندە يندۋستريالاندىرۋ كارتاسى جوبالارىن قوسا العاندا 160 مىڭنان استام جۇمىس ورنى اشىلدى. وتكەن جىل مەن بيىلعى جىلدىڭ 8 ايىندا شامامەن 14 مىڭنان استام جۇمىس ورنى اشىلدى,– دەدى جەڭىس قاسىمبەك. جاھان ەكونوميكاسىنداعى كۇردەلى احۋالعا قاراماستان, مينيسترلىك يندۋس­تريالاندىرۋ ساياساتىن رەت-رەتىمەن جۇرگىزە بەرۋگە نيەتتى. سول ءۇشىن ءونىم­دىلىك پەن ەكسپورتقا بەيىمدىلىك ماسەلەسىن باستى كورسەتكىش رەتىندە قاراستىرىپ, 5 سالاداعى ماڭىزدى دەگەن 8 سەكتورعا با­سىمدىق بەرىپ وتىر. اتاپ ايتار بول­ساق, بۇل سەگىز سالاعا قارا جانە ءتۇستى مەتال­لۋر­گيا, مۇناي وڭدەۋ, مۇناي حيميا­سى مەن اگ­رو­حيميا, ازىق-ت ۇلىك ءونىم­دەرىن ءون­دى­­رۋ, اۆ­توبوميل قۇراستىرۋ جانە ەلەك­تر­- ­­­تەح­نيكالىق ماشينا جاساۋ جاتادى. وسى سەگىز سەكتور مەملەكەت تاراپىنان ناقتى قولداۋعا يە دەۋگە بولادى. سە­­بەبى, وسى سەكتورلارداعى ناقتى جو­با­­­لار ءۇشىن ءتيىستى ينفراقۇرىلىم, ۇزاق مەر­­زىمدى ليزينگ پەن قازاقستاننىڭ دامۋ بانكى ارقىلى نەسيەلەۋ سىندى جاع­داي­لار جاسالۋدا. جەڭىس قاسىمبەك ءوز بايانداماسىن­دا عارىش سالاسىن دامىتۋ ىسىنە توقتالىپ ءوتتى. ونىڭ ايتۋىنشا, بۇگىنگى تاڭدا «KazSat-2» مەن «KazSat-3» سپۋتنيكتەرى ەلىمىزدەگى بايلانىس جانە حابار تاراتۋمەن اينالىساتىن 15 وپەراتورعا, باسقا دا ۇيىمدارعا ساپالى قىزمەت كورسەتىپ وتىر. عارىش سالاسىن دامىتۋدا قازاقستاننىڭ باستى ارتىقشىلىقتارىنىڭ ءبىرى «بايقوڭىر» عارىش ايلاعى دەۋگە بولادى. ەلىمىزدىڭ ەكولوگياسىنا كەرى اسەر ەتەتىن جايتتاردى ازايتۋ ءۇشىن, بيىلدان باستاپ وسى عارىش ايلاعىنان «پروتون» زىمىران-ۇشىرعىشتارىن ۇشىرۋ ازايتىلماق. – قازىر رەسەيلىك بازادا «بايتەرەك» عارىشتىق زىمىران كەشەنىن قۇرۋ ماسەلەسى قاراستىرىلىپ جاتىر. وندا كەرو­سين جانە سۇيىق وتتەگى سىندى ەكولو­گيالىق جاعىنان قاۋىپسىز كومپونەنتتەرى بار وتىندار قولدانىلادى, – دەدى مينيستر بۇل تۋرالى. ەلىمىز­دە ءتۋريزمنىڭ دامۋى 2020 جىلعا دەيىن­گى تۋريستىك سالانى دامىتۋ تۇجىرىم­داماسىنا ساي جۇرگىزىلۋدە. 2017 جىلدان باستاپ قازاقستان مەن ەكونوميكالىق ىنتىماقتاستىق جانە دامۋ ۇيىمى ەلدەرى اراسىندا, سونداي-اق ەكونوميكاسى دامىعان, ساياسي احۋالى تۇراقتى باسقا دا مەملەكەتتەرمەن ارادا  ۆيزاسىز قاتىناس جولعا قويىلماق. وسىلايشا, ۆيزاسىز ءتارتىپ ەنگىزىلگەن ەلدەردىڭ قاتارى 48-گە جەتىپ, تۋريستەردىڭ لەگى كوبەيە تۇسۋگە ءتيىس. ال ەكسپو-2017 حالىقارالىق كورمەسى وتكەننەن كەيىنگى كەزەڭدە رەسەي, تۇركيا, يتاليا, گەرمانيا, نيدەرلاند, اقش جانە ۇلىبريتانيا سىندى ەلدەردەن كەلەتىن تۋريستەردىڭ قاتارى ودان ءارى كوبەيەدى دەپ جوسپارلانىپ وتىر. تۋريستەردى قابىلداۋعا قاجەتتى ينفراقۇرىلىم دا سوڭعى جىلدارى ايتارلىقتاي دامىپ كەلەدى دەۋگە نەگىز بار. ماسەلەن, وسىدان 10 جىل بۇرىن ەلىمىزدە بار بولعانى 871 قوناقۇي بولسا, قازىر 2 500-گە جۋىقتايدى ەكەن. وتكەن جىلى قوناقۇيلەر باس-اياعى 73 ميلليارد تەڭگەگە قىزمەت كورسەتكەن. ەكسپو كورمەسىنە وراي, ەلىمىزدىڭ ەڭ كورىكتى, قوناقجاي دەگەن وڭىرلەرىن قامتيتىن 73 ءتۇرلى تۋريستىك مارشرۋت بەكىتىلىپ, ولاردىڭ كولىك ينفراقۇرىلىمىن جەتىلدىرۋ جۇمىستارى قولعا الىنعان. ينۆەستيتسيالار جانە دامۋ ءمينيسترى جۋرناليستەرگە كولىك ينفراقۇرىلىمىن جەتىلدىرۋ, گەولوگيا مەن جەر قويناۋىن پايدالانۋ, يننوۆاتسيالىق دامۋ سىندى ەكونوميكانىڭ ەڭ ماڭىزدى سالالارىندا اتقارىلىپ جاتقان جۇمىستار بارىسىن ورتاعا سالىپ, جۋرناليستەردىڭ ساۋالدارىنا جاۋاپ بەردى. ارنۇر اسقار, «ەگەمەن قازاقستان»