بالقاش اكىمى قىزمەتكەرلەرىنە تاڭەرتەڭگى جاتتىعۋ جاساتادى

  قاراعاندى وبلىسىنداعى بالقاش قالالىق اكىمدىگىنىڭ  مەملەكەتتىك قىزمەتكەرلەرى كۇندە تاڭەرتەڭ جۇمىسقا كىرىسەردىڭ الدىندا دەنە شىنىقتىرۋ جاتتىعۋلارىن جاسايدى. مۇنداي يگى ىسكە ۇيىتقى بولعان قالا اكىمى الەكساندر اگليۋلين ەكەن. «ءبىز كۇندە تاڭعى ساعات 8.30-دا اكىمدىك عيماراتىنىڭ ءۇشىنشى قاباتىنا كوتەرىلىپ, سونداعى دالىزدە دەنە شىنىقتىرۋ جاتتىعۋلارىن جاسايمىز. بۇل باستامانى قىزمەتكەرلەر قۋانا قابىل الدى. ويتكەنى, جاتتىعۋلار ادامدى سەرگىتىپ, جۇمىسقا دەگەن قۇلشىنىستى ارتتىرادى», دەيدى قالا اكىمىنىڭ ءباسپاسوز حاتشىسى اينۇر بەكتۇروۆا. كەشەندى جاتتىعۋلار مويىن, ارقا, قول جانە اياق بۇلشىق ەتتەرىنىڭ قيمىل-قوزعالىسىن شيراتۋعا باعىتتالعان. شامامەن العاندا 15 مينۋتقا سوزىلاتىن تاڭعى بوي جازۋ جاتتىعۋلارىن ءبولىم قىزمەتكەرلەرى كەزەكتەسىپ جۇرگىزەتىن كورىنەدى. قولى تيگەندە اكىمنىڭ ءوزى دە جاتتىعۋ جاساۋشىلاردىڭ قاتارىنا قوسىلادى ەكەن. ايتۋلارىنا قاراعاندا, كۇنى بويى كومپيۋتەردىڭ الدىندا وتىراتىن مەملەكەتتىك قىزمەتكەرلەر سپورتتىق جاتتىعۋلاردان كەيىن دەنەلەرىنىڭ قۇرىس-تىرىسى جازىلىپ, وزدەرىن سەرگەك سەزىنە باستاپتى.   قايرات ءابىلدينوۆ