قازاقستاندا ىشكى تۋريزم جىل باسىنان بەرى 6 پايىزعا ءوستى

الماتى, الاكول, بۇقتىرما, بۋراباي بۇرىنعىداي تانىمال باعىتتار بولىپ ەسەپتەلەدى, دەپ مالىمدەدى ينۆەستيتسيالار جانە دامۋ ءمينيسترى جەڭىس قاسىمبەك ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا. «ءتۋريزمدى دامىتۋ تۋريزم سالاسىن دامىتۋدىڭ 2020 جىلعا دەيىنگى تۇجىرىمداماسىنا سايكەس ءجۇرىپ جاتىر. 20 ەكونوميكالىق دامىعان ەلدەر ءۇشىن بۇگىن ۆيزاسىز رەجيم جۇمىس جاسايدى, نەگىزىنەن بۇل ءبىزدىڭ ءىرى ينۆەستورلارىمىز. 2017 جىلدىڭ قاڭتارىنان باستاپ ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرى مەن 14 ەكونوميكالىق دامىعان جانە ساياسي تۇراقتى مەملەكەتتەر ءۇشىن ۆيزاسىز رەجيم ەنگىزىلەدى. بارلىعى – 48 مەملەكەت. بۇل قازاقستانداعى ەلگە كەلۋشىلەر تۋريزمىنە جاڭا سەرپىن بەرەدى», دەدى ج.قاسىمبەك. ءمينيستردىڭ ايتۋىنشا, سوڭعى ەكى-ءۇش جىلدا رەسەي, گەرمانيا, نيدەرلاندى جانە ۇلىبريتانيادان كەلگەن تۋريستەر سانى ارتىپ وتىر. «ىشكى ءتۋريزمنىڭ ءوسىمى بايقالۋدا. ءبىرىنشى جارتىجىلدىقتا ءوسىم وتكەن جىلدىڭ سايكەس كەزەڭىمەن سالىستىرعاندا شامامەن 6 پايىزدى قۇرادى. بۇرىنعىداي بۋراباي, الماتى, الاكول جانە بۇقتىرما حالىق كوپ باراتىن نەگىزگى باعىتتار بولىپ وتىر. وسىعان بايلانىستى ءبىز بۇل باعىتتارداعى ينفراقۇرىلىمداردى سالۋ بويىنشا جوسپارلاردى رەتتەيمىز. قوناق ۇيلەر سانى ارتىپ كەلەدى. ەگەر 10 جىل بۇرىن قازاقستاندا بارلىعى 871 قوناق ءۇي بولسا, بۇگىن ولاردىڭ سانى 2 445. قىزمەت كورسەتۋ كولەمى 2015 جىلدىڭ قورىتىندىسى بويىنشا 73 ملرد تەڭگەنى قۇرادى», دەدى ج. قاسىمبەك. ەگەمەن-اقپارات