كەلەسى جىلى 33 مىڭ پاتەر سالىنادى – بيشىمباەۆ

ۇستىمىزدەگى جىلى ەلىمىزدە 9 ملن شارشى مەتر تۇرعىن ءۇي پايدالانۋعا بەرىلەدى. بۇل تۋرالى بۇگىن ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمباەۆ ءمالىم ەتتى. «ۇستىمىزدەگى جىلى قارجىلاندىرۋدىڭ بارىلىق كوزدەرى ەسەبىنەن 830 ملرد تەڭگەگە شامامەن 9 ملن شارشى مەتر تۇرعىن ءۇي سالىپ, پايدالانۋعا بەرۋ جوسپارلانىپ وتىر. بۇنىڭ بارلىعى, ەڭ الدىمەن «نۇرلى جول» باعدارلاماسىنىڭ جانە ۇكىمەت پەن ۇلتتىق بانكتىڭ داعدارىسقا قارسى قابىلداعان شارالارىنىڭ ارقاسىندا مۇمكىن بولىپ وتىر. «نۇرلى جول» مەملەكەتتىك باعدارلاماسى اياسىندا 2020 جىلعا قاراي 4,5 ملن شارشى مەتر تۇرعىن ءۇي سالىپ, پايدالانۋعا بەرۋ كوزدەلگەن», دەدى مينيستر. ونىڭ ايتۋىنشا, بيىل تۇرعىن ءۇي قۇرىلىسى مەن ينفراقۇرىلىمدى دامىتۋعا 442,5 ملرد تەڭگە بولىنگەن. ونىڭ ىشىندە ۇلتتىق قوردان 423,9 ملرد جانە رەسپۋبليكالىق بيۋدجەتتەن 18,6 ملرد تەڭگە قاراستىرىلىپ وتىر. بۇل قاراجاتتىڭ ىشىندە جالعا بەرىلەتىن تۇرعىن ءۇي قۇرىلىسىنا 82,8 ملرد تەڭگە جۇمسالادى. سونداي-اق جالعا بەرىلەتىن كوممەرتسيالىق تۇرعىن ءۇي قۇرىلىسىنا 97 ملرد تەڭگە كوزدەلگەن. بۇل قارجىعا 2017 جىلى 498,2 مىڭ شارشى مەتر (10 600 پاتەر) سالىنادى. بۇدان بولەك, ينجەنەرلىك-كوممۋنيكاتسيا ينفراقۇرىلىمىن تارتۋعا 110,9 ملرد تەڭگە, قازاقستاننىڭ تۇرعىن-ءۇي قۇرىلىس جيناق بانكىنىڭ سالىمشىلارىنا نەسيە بەرۋگە 22 ملرد تەڭگە بولىنەدى. «ناتيجەسىندە, مەملەكەت قاراجاتى ەسەبىنەن 2015 جىلى جانە 2016 جىلدىڭ وتكەن كەزەڭى ىشىندە 22,6 مىڭ وتباسى جانە جىلدىڭ سوڭىنا دەيىن قوسىمشا 6,8 مىڭ وتباسى باسپانامەن قامتاماسىز ەتىلەدى. 2017 جىلى 33 مىڭ پاتەر سالىنادى», دەدى ق.بيشىمباەۆ. ەگەمەن-اقپارات