تايگا تورىندە – تاقتا تايتالاسى

رەسەيدىڭ حانتى-مانسي اۆتونو­ميالىق وبلىسىنىڭ ورتالىعى – يۋگرادا بۇرناعى كۇنى شاحماتتان 14, 16 جانە 18 جاسقا دەيىنگى جاسوسپىرىمدەر اراسىنداعى الەم چەمپيوناتىنىڭ ءبىرىنشى جارىس كۇنى اياقتالدى. اۋەلى قازاقستان شاحمات فەدەراتسياسىندا اتقارىلعان ۇيىمداستىرۋ شارالارى جايىنا توقتالايىق. ۇيىم اتقارۋ كوميتەتىنىڭ الماتىدا 21 قىر­كۇيەكتە وتكەن وتىرىسى كۇن ءتارتى­بىن­دە ءبىر عانا ماسەلە – ەلىمىز شاح­مات­شى­لارىنىڭ جاقىندا باكۋدە اياقتالعان 42-ءشى بۇكىلالەمدىك وليمپيادادا ونەر كور­سەتۋىنىڭ قورىتىندىلارى تال­قى­لان­دى. اتقارۋ كوميتەتىنىڭ 15 مۇشەسى قاتىسقان ماجىلىستە ايەلدەر قۇراما­سى­نىڭ كورسەتكىشىنە كوڭىل تولمايتىنى بىردەن ايتىلدى. تۋرنيردە ەرلەر قۇراماسى 180 كوماندانىڭ اراسىندا 28-ورىنعا تابان تىرەسە, بويجەتكەندەر جاساعى 140 ۇجىمنىڭ ىشىندە 37-ورىننان كورىندى. ال بۇدان ەكى جىل بۇرىن ءوت­كەن وليمپيادادا جىگىتتەر 170 كومان­دا تالاسىندا 42-ورىن السا, قىزدار 136 باسە­كە­لەس ورتاسىندا 6-تۇ­عىر­عا تۇراقتاعان ەدى. تالقىلاۋ بارىسىندا «قازاقستان شاحمات فەدەراتسياسى» رەسپۋبليكالىق قوعامدىق بىرلەستىگىنىڭ ءبىرىنشى ۆيتسە-پرەزيدەنتى ەركىن يسرايىلوۆ فەدەراتسيا پرەزيدەنتى عالىمجان ەسەنوۆتىڭ وسىعان بايلانىستى ۇسىنىسىن جەتكىزە كەلىپ, ايەلدەر قۇراماسىنىڭ باس جات­­تىق­تىرۋشىسى پاۆەل كوتسۋردى ات­قارىپ وتىرعان قىزمەتىنەن بوساتۋ كەرەك­تى­گىنە توقتالدى. – فەدەراتسيا پرەزيدەنتى ۇيىم جۇمى­سىن قازىرگىدەن دە گورى ءمولدىر دە اشىق ەتۋدى, سونداي-اق ۇيىمدى كونكۋرستىق نەگىزدە قايتا قۇرۋدى قالاپ وتىر. وسىنىڭ ءبارى فەدەراتسيا مەن جاتتىقتىرۋشىلار جۇمىستارى ساپا­سىن ارتتىرۋ ماقساتىندا جاسال­ماقشى, – دەدى ە.يسرايىلوۆ. ول, سونىمەن بىرگە, 2017 جىلدان با­س­تاپ بارلىق جاتتىقتىرۋشىلار كەلى­سىم­­­­شارت جۇيەسىنە كوشىرىلىپ, ولار­­­دىڭ كون­­كۋرس­تىق جولمەن تاڭداپ الى­نا­تى­نىن ءسوز ەتتى. ال باپكەرلەر جۇمىس­تارى­­نا باعا بەرۋدە ءاربىر ەكى جىلدا ءبىر رەت ءوتىپ تۇ­را­تىن بۇكىلالەم­دىك وليم­­­پيا­­دا­­­نىڭ قو­رىتىن­دىلارى نەگىزگى ولشەم بولادى. ەندى حانتى-مانسيدە كەرۋەن كەرگەن الەم چەمپيوناتىنا كەلەيىك. ال­عاشق­ى راۋند ەشقانداي كەزدەيسوق ءناتي­جەلەر اكەلە قويعان جوق, ەگەر جاقىندا عانا رەسەي شاحمات فەدەراتسياسىنا اۋىسىپ كەتكەن قازاقستاندىق ءبيبىسارا اساۋباەۆانىڭ ءتۋرنيردى وتە كۇشتى باستاعانىن العا تارتپاساق. ماسەلە مىنادا, بۇعان دەيىن 12 جاسقا دەيىنگىلەرمەن شارشى تاقتا ۇستىندە شايقاسىپ كەلگەن ءبيبىسارا بۇل جولى 18 جاسقا دەيىنگىلەردىڭ ۇيىرىنە قوسىلىپ, ءبىرىنشى پارتيادا وزىنەن كوپ ۇلكەن ۆەتنامدىق نگۋيەن زانگ زۋي تيەندى ەركىن ۇتىپ شىقتى. ءسويتىپ, الەمنىڭ 12 جاسقا دەيىنگىلەر اراسىندا ەكس-چەم­پيونى بولىپ تابىلاتىن ول تۋر­نيردەگى ەڭ ەرەسەك 70 قىزدىڭ توبىندا گرەك ستاۆروۋلا تسولاكيدوۋمەن بىرگە تۋرنير كەستەسىنىڭ كوشىن باستادى. مامانداردى تەك رەيتينگ بويىنشا ءبىرىنشى تۇرعان ەۋروپا چەمپيونى, گرۋزين قىزى نينو حومەري­كيدىڭ كۇتپەگەن جەردەن تەڭ وي­ناپ قالعانى تاڭعالدىرىپ جاتىر. ال ءبىزدىڭ وسى ورتادا سىنعا ءتۇس­ىپ جات­­قان جالعىز سپورتشىمىز – ديليارا البەكوۆا رەسەيلىك ۆيكتوريا ياكيمەن­كو­مەن تەڭ وينادى. جاستارى 18-گە دەيىنگى جىگىتتەر اراسىنداعى كەزدەسۋ­لەردە قازاقستاندىق جانات سايىن لاتۆيا­لىق ولەگ پەتروۆسكيدى ۇتسا, ارىستانبەك ورازاەۆ تۇرىك ونەر وگۋزبەن تەڭ ويىنعا كەلىستى. وسى پوزيتسيا­داعى ءۇشىنشى وكى­لى­مىز ايرات سادۋباەۆ ارميان ارام اكوپيان­نان جەڭىلىپ قالدى. 14 جاسقا دەيىنگى قىزدار سايىسىندا ءبىز­دىڭ اسەل سەرىكباي نورۆەگ ينگريد سكاس­ليەنمەن تەڭ تۇسسە, ساقىپجامال بار­ما­عام­بەتوۆا بەلورۋس ولگا بادەل­كو­­دان جەڭىلگەنىن مويىندادى. ۇل­دار ساپى­نان رامازان شالماحانوۆ بەل­گيا­­لىق لەۆ اكۋلوۆتەن باسىم بولسا, رۋس­لان ءسالىموۆ رەسەيلىك سەمەن لوباسوۆ­­قا السىزدىك كورسەتتى. بۇدان ءارى 16 جاس­قا دەيىنگى ءجاسوسپىرىم قىزدارى­مىز­­دىڭ ءبىرى قارسىلاسىمەن تەڭ ونەر كور­سەت­سە, ەكىنشىسى جەڭىلىستىڭ اششى ءدامىن تاتۋعا ءماجبۇر بولدى. اتاپ ايت­قان­دا, ارناش باۋىرجان رەسەيلىك پولي­نا شۋۆالوۆا ەكەۋى ءبىر-ءبىرىن الا الما­سا, اليسا قوزىباەۆا ۇندىستاندىق پريا­ن­كاعا ەسە جىبەردى. ۇلداردىڭ ەكەۋى ءبىرىنشى قارسىلاستارىنان باسىم تۇسسە, ەكەۋى جەڭىلىستىڭ اششى ءدامىن تاتتى. وسىلايشا, جاندوس اعمانوۆ – ەستو­­نيا­­لىق الەكسەي سۋبەحيندى, دەنيس ماح­نەۆ سلوۆاكيالىق يگور ليتنەردى جەڭسە, داستان تۇرار – رە­سەي­­لىك ولەك­ساندر ترياپيشكودان, تيمۋر نۇر­جانوۆ يرلانديالىق اراش توبياس­تان ۇتىلدى. كەشە كەشكە ەكىنشى راۋند كەزدەسۋ­لەرى وينالدى. چەمپيونات 3 قازان كۇنى مارەگە جەتەدى.  دامير قوجامقۇل