ەلوردادا اتىراۋ مەن باتىس قازاقستان جارمەڭكە اشتى

«قۋاتتى ءوڭىر – قۋاتتى قازاقستان» اكتسياسى اياسىندا استانادا اتىراۋ جانە باتىس قازاقستان وبلىستارىنىڭ كۇندەرى وتۋدە. بۇگىن حانشاتىر سوو الدىنداعى الاڭدا اتالعان وبلىستاردىن تاۋار وندىرۋشىلەرىنىڭ اۋىلشارۋاشىلىق جارمەڭكەسى باستالدى. جارمەڭكەگە باتىس قازاقستاننان 200 توننادان استام تاۋار اكەلىنسە, اتىراۋ وبلىسىنان 34 تاۋار ءوندىرۋشى قاتىسىپ, جالپى كولەمى 90 توننا ءونىم ساۋداعا شىعارىلدى. استانالىقتارعا بالىق, كوكونىس, ءسۇت جانە ەت ونىمدەرى, شۇجىق ونىمدەرى, سالات, جۇمىرتقا جانە تاعى باسقا قىرىققا تارتا ءونىم تۇرلەرى ۇسىنىلدى. اسىرەسە, بالىق پەن بالىق ونىمدەرىنە سۇرانىس وتە جوعارى بولىپ تۇر. – وسىدان بىرنەشە جىل بۇرىن جارمەڭكەگە تەك بالىق پەن بالىق ونىمدەرىن اكەلگەن ەدىك. بيىل تاۋارلارىمىز ءبىرشاما كوپ. سەبەبى وبلىستاردا قازىر ءونىم تۇرلەرى كوپتەپ وندىرىلەدى. كاسىپكەرلەرىمىز جارمەڭكەگە قۇلشىنىسپەن كەلدى. ولار ءۇشىن بۇل شارا ونىمدەرىن وتكىزۋگە جانە جارنامالاۋعا ۇلكەن مۇمكىندىك, – دەيدى اتىراۋ وبلىسىنىڭ اكىمى الىبەك ناۋتيەۆ. جارمەڭكە كەزىندە وبلىستىڭ شىعارماشىلىق ۇجىمدارىنىڭ قاتىسۋىمەن كونتسەرتتىك باعدارلاما ءوتىپ, ساتىپ الۋشىلاردىڭ كوڭىلىن كوتەرۋدە. ارنۇر اسقاروۆ