تالانتتىلارىمىزدى تارىداي شاشپايىق

قازاق – تالانتتى حالىق. قاي جاعىنان الىپ قاراعاندا دا. بىراق سانىمىز از. ءبىزدىڭ الەمگە ءالى دە بولسا قاتتى تانىلا الماي كەلە جاتقانىمىزدىڭ ءبىر سەبەبى دە وسى بولسا كەرەك. ال ساننىڭ ساپا تۋعىزباي قويمايتىنى بەسەنەدەن بەلگىلى. جالپى, ەلدى, حالىقتى جاھانعا جاريا ەتىپ, جار سالاتىن سالالار بارشىلىق. وسىلاردىڭ ىشىنەن ەلدى تانىتۋدا ەرەكشە ءرول اتقاراتىن ەكەۋىن بولە-جارا اتاعان ابزال. ءبىرى – مەملەكەت باسشىسى, ەكىنشىسى – سپورت. ياعني, مەملەكەت باسشىسى شەتەلگە رەسمي ساپارمەن بارعاندا جانە سپورتشىمىز جەڭىس تۇعىرىنىڭ ەڭ بيىك ساتىسىنا كوتەرىلگەندە ءانۇرانىمىز شىرقالىپ, تۋىمىز كوتەرىلەدى. اڭگىمەمىزدى بۇلاي باستاپ وتىرۋىمىزدىڭ وزىندىك سەبەبى بار. ۇستىمىزدەگى جىلدىڭ 26 تامى­زىندا قازاقستاندىق 12 جاسار تالانتتى شاح­ماتشى قىز, مەكتەپ وقۋشىلارى اراسىندا ءۇش دۇركىن, 8 جاسقا دەيىنگى قىزدار اراسىندا ءبىر مارتە الەم چەمپيونى, 7 جاسىندا حالىقارالىق شاحمات فەدەراتسياسىنىڭ (فيدە) قىزدار اراسىنداعى شەبەرى (ايەلدەر دەپ تە تۇسىنگەن ءجون) اتاعى بەرىلگەن (7 جاسىندا وسىنداي اتاق العان جاس شاحماتشى قىز وسى سپورت تاريحىندا بۇرىن-سوڭدى بولماعان, ياعني رەكورد) ءبيبىسارا اساۋباەۆانىڭ رەسەيگە, ونىڭ ىشىندە وسى ەل استاناسى – ماسكەۋ تۇبىندەگى حيمكي قالاسىنا اتا-اناسىمەن بىرگە قونىس اۋدارعانى تۋرالى اقپارات تارادى. ەستىگەن كەزدە قارشاداي قىزدىڭ وتانىنان بەزگەنى نەسى دەپ تاڭعالعانىمىز دا راس... ال قولعا قالام الۋىمىزعا كۇنى كەشە ازەر­باي­جان­نىڭ استاناسى – باكۋ قالاسىندا اياق­تالعان دۇنيەجۇزىلىك شاحمات وليمپياداسىنىڭ قورىتىندىسى بويىنشا  قازاقستاندىق شاح­ماتشى قىزداردىڭ لايىقتى ويىن ورنەگىن كورسەتە الماعاندارى سەبەپ بولدى. شاحماتشى قىزدارىمىز العان ورىندارعا كوز جۇگىرتسەك, سپورتسۇيەر قاۋىمعا ونشا-مۇنشا تانىس ەمەستەي اسەر قالدىراتىن, ياعني اسا بالعىن شاعىندا وزا شاۋىپ بايگە الا قويماعان شولپان جىلقايداروۆا وتانداستارىمىزدىڭ اراسىندا ەڭ ءتاۋىر ناتيجە كورسەتكەن – 113-ءشى ورىن. وسكىن كەزىندە ءورىسىنىڭ كەڭدىگىمەن, قادامىنىڭ قارىمدىعىمەن الەمدى مويىنداتىپ, جاھان جەڭىمپازى اتانعان جانسايا ابدىمالىكتىڭ العان ورنى كوڭىل قوڭىلتاقسىتادى – 137. ال جارىسقا تاعى ءبىر ۇكىلەپ قوسقان ءۇمىتىمىز گۇلميرا داۋلەتوۆا بار بولعانى 146-شى ورىننان كورىنگەن. بۇل نەنى بىلدىرەدى؟ بىزدىڭشە, بۇل قازاقستاندا جاس كەزىندە جاقسى قىرىنان كورىنەتىن دارىن­دى شاحماتشىلاردىڭ ەسەيە كەلە توقىراۋعا ۇشى­­راي­تىنىن بىلدىرەدى. ەلىمىزدە ولاردىڭ وسۋىنە, شەبەرلىگىن شىڭداۋىنا جاعداي جاساپ, كومەكتەسەتىن بىلىكتى جاتتىقتىرۋشىلار جوق-اۋ, شاماسى دەگەن دە وي كەلەدى وسىندايدا. بۇل جەردە ءبىزدىڭ ايتپاعىمىز باسقا. بولا­شاعىنان ۇلكەن ءۇمىت كۇتتىرەتىن 12 جاسار اسا تالانتتى شاحماتشى قىزىمىزدىڭ كورشى ەل – رەسەي اسۋى. كەيبىر دەرەك كوزدەرىنىڭ ءسوز ساپتاستارىنا قاراعاندا, قازاقستاننىڭ شاحمات فەدەراتسياسى (قشف) مەن ءبيبىسارا اساۋباەۆانىڭ اتا-اناسى (جاس تالانتتىڭ بۇل ىسكە ارالاسپاعانى انىق) ءتىل تابىسا الماعان سياقتى. اتا-انا قىزدارىنىڭ تالانتىنا ساي باعالانعانىن, تالانتىنا لايىق قۇرمەت كورسەتىلگەنىن قالاسا, نەسى ايىپ؟! ماسەلەنىڭ قارجى جاعى تاعى بار. ءبىزدىڭ كوك دونەن كوڭىلىمىز ايتادى, ەگەر بولاشاقتا ءبيبىسارا سەكىلدى بيىكتەن كورىنۋى ابدەن ىقتيمال تاۋداي تالانت يەلەرىن ءوز دەڭگەيىندە باعالاپ, تۋعان وتانىنا قىزمەت ەتەتىندەي احۋال قالىپتاستىرساق, وسىناۋ ءبىر كونەدەن كەلە جاتقان زياتكەرلەر ويىنىندا باعىندىرار شىڭدارىمىز قازىرگىدەن الدەقايدا جوعارى بولار ەدى دەپ. ارينە, سپورتشىلاردىڭ ءوز ەلىنەن وزگە ەلگە اۋىسىپ, جاڭا «وتانىنىڭ» نامىسىن قورعاپ جاتاتىن كەزدەر قازىرگى تاڭدا ءجيى كەزدەسەدى. ءبىر عانا مىسال رەتىندە برازيليانىڭ اياقدوپ شەبەرلەرىن كەلتىرەيىك. ويتكەنى, بۇل – ۇلكەن ەل, حالقىنىڭ سانى 210 ميلليوننان اسىپ جىعىلادى. ءارى بۇل ەلدە فۋتبول ويناپ وسپەيتىن بالا جوق. سايكەسىنشە, تالانتتىلار دا جەتىپ-ارتىلادى. ياعني, سان ساپاعا اينالادى دەگەن ءسوز. ال ولاردىڭ بارىنە بىردەي برازيليا قۇراماسىنان ورىن تابىلمايتىنى ايتپاسا دا تۇسىنىكتى. سوندىقتان باقىتتارىن باسقا ەلدەن ىزدەۋگە ءماجبۇر. ەندى نەگىزگى تاقىرىبىمىزعا ورالىپ, «سە­گىز قىرلى, ءبىر سىرلى» دەيتىنگە كەلەتىن دارىندى ءجاسوسپىرىم قىز – ب.اساۋباەۆانىڭ جان-جاقتىلىعىمەن دە ەرەكشەلەنەتىنىن ايتا كەتەيىك. ول گيمناستيكادان استانا قالاسىنىڭ چەمپيونى بولىپ تابىلادى. ءيا, قازاق – تالانتتى حالىق. نەسىبەسى دە ەشكىم­دىكىنەن كەم ەمەس. بىراق, جوعارىدا اتاپ كورسەتكەنىمىزدەي, تالانتتىلارىن تارىداي شاشا­تىن قاراسى قالىڭ ەل ەمەس. سوندىقتان, بارىمىزدى باعالاي ءبىلۋىمىز كەرەك. «قولدا باردا التىننىڭ قادىرى جوق» دەگەندى تاۋىپ ايتقان قازاقى قالىپقا سالساق, قىزىمىزدىڭ وزگەنىڭ نامىسىن جىرتاتىنى وزەگىمىزدى ورتەيدى-اق... سەرىك ءپىرنازار, «ەگەمەن قازاقستان»