بويجەتكەن بولىپ بوي تۇزەۋگە تىيىم سالعان كوللەدج
ۇندىستانداعى مانگالۋردەگى كوللەدجى ستۋدەنت قىزدارعا ءوز جاراتىلىسىنا ساي ءجۇرىپ-تۇرۋعا تىيىم سالدى.
ارنايى ەرەجە بويىنشا جۇمىس جاسايتىن بۇل وقۋ ورنىندا قىزدارعا كوسمەتيكادان باستاپ جىگىتتەرمەن قارىم-قاتىناس جاساسۋعا دەيىنگى تىرلىكتەرگە ءىس جۇزىندە رۇقسات ەتىلمەيتىن بولىپ شىقتى. سونىڭ ىشىندە مۇندا ستۋدەنت قىزدار شاشتارىن بيىك نە تومەن قالىپتا ءتۇيىپ نەمەسە جايىپ تاستاپ جۇرە المايدى. سونداي-اق, تىرناقتى اشىق بوياۋعا, تاتۋيروۆكا سالۋعا, ءتىپتى قول سومكەدە ماكياجعا كەرەكتى قۇرالداردى الىپ جۇرۋگە دە بولمايدى.
زيمبابۆە پرەزيدەنتى وزىنە ەسكەرتكىش ورناتتى
زيمبابۆەنىڭ 35 جىلدان بەرى باسقارىپ كەلە جاتقان 92 جاستاعى پرەزيدەنتى روبەرت مۋگابە وزىنە ءوزى ەسكەرتكىش ورناتىپ قويدى.
بەلگىلى ءمۇسىنشى دومينيك بەنحۋرا جارتى جىلدا بىتىرگەن مونۋمەنتتىڭ بيىكتىگى 3,8 مەتردى قۇرايدى. ول پرەزيدەنتتىڭ مۋلتيپليكاتسيالىق كوشىرمەسى بولىپ شىققان. دەگەنمەن, بۇل تاس ءمۇسىن مەملەكەت باسشىسىنىڭ وزىنە قاتتى ۇناعان. بىراق ەلدىڭ حالقىنا ونشالىقتى ۇناي قويماعان سياقتى. قازىر وسى ءۇشىن مۋگابەنى ءاجۋالاۋشىلار كوبەيىپ كەلە جاتقانعا ۇقسايدى.
«باستان – قۇلاق ساداعانىڭ» كەرى كەلدى
باشقۇرتستان استاناسى ۋفانىڭ امانتاي كوشەسىندە ورنالاسقان شاشتارازداردىڭ بىرىندە كليەنت قۇلاعىنىڭ ءبىر بولىگىن كەسىپ الۋ وقيعاسى ورىن الدى.
زەينەتكەر ايەل بۇل سۇلۋلىق سالونىنا 1,5 جىلدان بەرى كەلىپ تۇرادى ەكەن. بۇعان دەيىن ونى مۇندا ءبارى قاناعاتتاندىرعان. بىراق سوڭعى كەلگەنىندە بۇرىنعى شەبەرىنىڭ جوق ەكەنىن بىلەدى. ال ونىڭ ورنىنا الىنعان شاشتاراز ءبىرازدان كەيىن ايەلدىڭ قۇلاعىن وڭدىرماي كەسىپ الادى. ماۋجىراپ وتىرعان زەينەتكەر ورنىنان شورشىپ تۇرسا كەرەك. بىراق باسى امان ەكەنىن بىلگەن سوڭ, العاشقى ەم-دومدى جاساتىپ الىپ, شاشتارازدى كەشىرە سالىپتى.
«سەن بار جەردە ۇڭگىر دە جايلى تۇرعىن جاي سياقتى...»
قىتايدىڭ وڭتۇستىك-باتىسىنداعى سىچۋان پروۆينتسياسىندا ءبىر ەرلى-زايىپتى جۇپ قوسىلعالى بەرگى 54 جىل بويى ەل كوزىنەن تىس جەردەگى ۇڭگىردە وڭاشا تۇرىپ كەلىپتى.
قازىر جاسى 81-گە كەلىپ وتىرعان ليان تسزىفۋ مەن ونىڭ 77 جاستاعى زايىبى لي سۋين بۇدان جارتى عاسىردان استام ۋاقىت بۇرىن نانچۋن قالاسىندا زاڭدى نەكەگە تۇرعان بويدا ۇيلەرىنەن كەتىپ قالىپ, ءبىر ۇڭگىردى پانالاعان ەكەن. ولار وسىندا ءتورت بالا تاربيەلەپ وسىرگەن. جەرگىلىكتى بيلىك بىرنەشە رەت ولارعا بۇدان گورى قولايلى تۇرعىن جايلار ۇسىنىپ تا كورىپتى. بىراق ءوز «ۇيلەرىنە» ۇيرەنىپ كەتكەندەرى سونداي, ودان ەش كەتكىلەرى كەلمەگەن. ءبىر-ءبىرىن قاتتى سۇيگەن ەكى قاريا ءۇشىن بىرگە تۇرعان قاپاستىڭ ءوزى ءسان-سالتانات سارايىنان كەم ەمەس سياقتى.
وكپەلەگىش وتاعاسى ءوز ايەلىن اۋكتسيونعا قويدى
ۇلىبريتانيا تۇرعىنى ءوزىنىڭ 27 جاستاعى ايەلىن ساتاتىنى تۋرالى حابارلاندىرۋدى eBay بەتىندە جاريالادى.
«باقسام, باقا ەكەن» دەگەندەي, يوركشيردەگى ۋەيكفيلد قالاسىندا تۇراتىن 33 جاستاعى پرانكەر دجوكەر سايمون و’كەين وزىنە دۇرىس كوڭىل بولە قويماعانى ءۇشىن قۇداي قوسقان قوساعى لەاندرانى ينتەرنەت-اۋكتسيونعا سالىپ جىبەرگەن. ءوزىنىڭ ايتۋىنشا, وتاعاسى اۋىرىپ جاتقاندا كەلىنشەگى وعان كوزىنىڭ قىرىن ازداۋ سالىپ, قامقورلىق جاساۋعا اسا قاتتى ءمان بەرە قويماپتى. سوندا دا بولسا, ول قانشا رەنجىپ تۇرعانىمەن, جارنامادا ايەلىنىڭ جاقسى جاقتارىن بارىنشا ءتىزىپ كورسەتىپتى. ول «ءوزى قۇتتى, ءوزى ءسۇتتى» زايىبىنىڭ دەنەسى تارتىمدى ەكەنىن, تاماقتى جاقسى دايىندايتىنىن دا جازىپتى.
سەلفي ءۇشىن كولىكتەر دە قۇرباندىققا شالىنادى
رەسەيدىڭ كاستروما وبلىسىنداعى نيكولسكوە كەنتىنىڭ 19 جاسار تۇرعىنى ءوزىنىڭ كامەلەتكە تولماعان قۇربىسىمەن بىرگە ەرىگىپ ءجۇرىپ, لاۋلاعان الاۋ جانىندا سەلفي جاساۋ ءۇشىن بىرنەشە رەت وت جاققان.
جاستار ەلدى مەكەندەگى ءۇش ماشينانى ورتەپ, تاعى ەكەۋىن جاندىرۋعا ارەكەت ەتكەن. سول تۇندە ولار دەرەۆنيادان ءبىر ءاۆتوموبيلدى ايداپ كەتپەكشى بولادى. بىراق ونىڭ سالونىنا كىرگەندەرىمەن, وتالدىرا المايدى. سوسىن ونى ورتەۋگە شەشىم قابىلدايدى. وسىدان كەيىن ءبىر ۆەلوسيپەدتى ۇرلاپ ءمىنىپ كەتىپ, سەلونىڭ سىرتىنان تاكسي ۇستايدى. ونىمەن كوستروماعا دەيىن بارادى. ارادا تاۋلىك وتكەننەن كەيىن ەكەۋى دە قولعا ءتۇستى. تەكسەرە كەلگەندە, وت قويۋشى ويرانداردىڭ ۇيالى تەلەفوندارىنان الاۋدىڭ جانىندا تۇرىپ تۇسكەن سەلفيلەرى تابىلعان. قۇقىق قورعاۋ ورگاندارى قىلمىستىق ءىس قوزعادى.
اقپارات اگەنتتىكتەرىنىڭ ماتەريالدارى نەگىزىندە دايىندالدى
