جارىستار جاڭعىرىعى

تەننيس. ماسكەۋدە بەيسەنبى كۇنى وتكىزىلگەن دەۆيس كۋبوگى الەمدىك توبىنىڭ جەرەبەسى پلەي-وفف ماتچىن رەسەي جانە قازاقستان قۇرامالارى اشاتىنىن كورسەتىپ بەردى. توپ ويىندارى 16-18 قىركۇيەك كۇندەرى وسى قالانىڭ ۇلتتىق تەننيس ورتالىعىنىڭ كورتىندا وينالادى. مۇندا كەشە اندرەي كۋزنەتسوۆ (رەسەي) – الەكساندر نەدوۆەسوۆ (قازاقستان), ەۆگەني دونسكوي (رەسەي) – ميحايل كۋكۋشكين (قازاقستان) كەزدەستى. بۇگىن رەسەيلىك كونستانتين كراۆچۋك جانە اندرەي رۋبلەۆ جۇبى قازاقستاندىق  نەدوۆەسوۆ جانە اندرەي گولۋبەۆ دۋەتىمەن وينايدى. ال ەرتەڭ كۋزنەتسوۆ – كۋكۋشكين, دونسكوي – نەدوۆەسوۆ ماتچتارى وتەدى. ۆولەيبول. ۆەتنامدا ءوتىپ جاتقان ازيا كۋبوگى ءۇشىن تۋرنيردە قازاقستاننىڭ قىزدار قۇراماسى وڭتۇستىك كورەيا كومانداسىن ءۇش پارتيادا (25:9, 25:13, 25:14) ۇتىپ شىقتى. بۇل ويىنعا ءبىزدىڭ قارسىلاسىمىز جاستار قۇراماسىن قويدى. مۇنىڭ الدىندا قازاقستاندىقتار جاپونيا كومانداسىنان 1:3 ەسەبىمەن ۇتىلىپ قالعان ەدى. كەشە ۆياچەسلاۆ شاپراننىڭ شاكىرتتەرى قىتاي ۆولەيبولشىلارىمەن كەزدەستى. تۋرنير 20 قىركۇيەكتە اياقتالادى. فۋتبول. قازاقستاننىڭ 19 جاسقا دەيىنگى ءجاسوسپىرىم قىزدار قۇراماسى ەۋرو-2017 ىرىكتەۋ تۋرنيرىندە فينليانديا كومانداسىنان 0:7 ەسەبىمەن كۇيرەي جەڭىلدى. قارسىلاستار ءبىرىنشى دوپتى 4-مينۋتتا ءتۇسىردى (رونيا يكونەن). ال 7 جانە 11-مينۋتتاردا يۋلي كەتولا تاعى ەكى گول سالدى. بۇدان كەيىن ول پەنالتيدەن حەت-تريك جاسادى. ءدۋبلدى ەممالينا تۋلككي جاساسا, سوڭعى نۇكتەنى تۋليا ميككولا قويدى. جەرلەستەرىمىز كەلەسى كەزدەسۋىن بۇگىن يسلانديا قۇراماسىمەن وتكىزەدى. بوكس. داعىستاننىڭ استاناسى – ماحاچكالادا م-س. ۋماحانوۆتى ەسكە تۇسىرۋگە ارنالعان XVIII مەموريال مارەگە جەتتى. حالىقارالىق تۋرنيرگە قاتىسقان قازاقستاندىق قىزدار اراسىندا نازىم يشانوۆا (60 كگ) – التىن, اقمارال شامشيدەنوۆا (75) – كۇمىس, شىنار يۋلداشەۆا (75) قولا مەدالعا قول جەتكىزدى. نازىم ءبىرىنشى ورىندى بەلورۋس قارسىلاسى گالينا بريۋەۆيچ رينگكە شىقپاي قالۋىنا بايلانىستى شايقاسسىز السا, اقمارال اقتىق ايقاستا سول ەلدىڭ وكىلى ۆيكتوريا كەبيكوۆادان ۇتىلىپ قالدى. جىگىتتەر اراسىندا ساپارباي ايداروۆ (75) فينالدا رەسەيلىك ۆلاديسلاۆ فەديۋريننەن 0:3 ەسەبىمەن جەڭىلىپ, كۇمىس مەدالدى قاناعات تۇتتى. ۆەلوسپورت. «استانا» يتاليالىق جاس ۆەلوشاباندوز ريكاردو ميناليمەن كەلىسىمشارتقا وتىردى. بۇعان دەيىن ول ءوز ەلىندە وتكەن Trofeo Comune di Vertova جارىسىندا 2012, 2013 جىلدارى, Circuito del Porto – Trofeo Arvedi سايىسىندا 2015 جىلى جەڭىسكە جەتكەن. 21 جاستاعى سپرينتەر – بۇرىنعى بەلگىلى ۆەلوشاباندوز نيكولو ءميناليدىڭ ۇلى. ول بيىلعى ماۋسىمدا ءبىرىنشى رەت «استانا» ۆەلوكومانداسى ساپىندا كاسىپقوي سپورتشى رەتىندە ونەر كورسەتەتىن بولادى. «ەگەمەن-اقپارات»