قىرعىزستاندا ءجۇسىپ بالاساعۇننىڭ 1000 جىلدىعىنا ارنالعان كونفەرەنتسيا وتۋدە

  بۇگىن ىستىق كول جاعالاۋىندا قىرعىز رەسپۋبليكاسىنىڭ پرەزيدەنتى اپپاراتى جانىنداعى «مۋراس» قورىنىڭ ۇيىمداستىرۋىمەن «قىرعىز جانە قاراحان قاعاناتتارى: ءجۇسىپ بالاساعۇننىڭ «قۇتتى بىلىگى» ─ ح-ءحى عع. ورتالىق ازياداعى مۇسىلمان رەنەسسانسىنىڭ ايناسى» اتتى V حالىقارالىق عىلىمي-تاجىريبەلىك كونفەرەنتسيا باستالدى. قىرعىز رەسپۋبليكاسىنىڭ پرەزيدەنتى المازبەك اتامباەۆتىڭ قولداۋىمەن ۇيىمداستىرىلعان بۇل حالىقارالىق جيىن تۇركى جۇرتىنىڭ ويشىل دانىشپانى ءجۇسىپ بالاساعۇننىڭ 1000 جىلدىق مەرەيتويىنا ارنالىپ وتىر. 3 كۇنگە سوزىلاتىن جيىندا بىرنەشە مەملەكەتتەن جينالعان كورنەكتى عالىمدار مەن تۇركىتانۋشىلار 4 عىلىمي سەكتسيا بويىنشا باياندامالار وقىپ, كەلەلى پىكىرلەرىن ورتاعا سالادى. ايتا كەتۋ كەرەك, TWESCO دا ءجۇسىپ بالاساعۇننىڭ 1000 جىلدىق مەرەيتويىنا تارتۋ رەتىندە ۇلى ويشىلدىڭ «قۇتادعۋ بىلىك» داستانىن جاريالاپ, بىرقاتار حالىقارالىق ءىس-شارالار وتكىزدى. وسىلايشا اكادەميا تۇركى دۇنيەسىنە ورتاق تاريحي تۇلعالاردىڭ رۋحاني مۇرالارىن تۇگەندەپ, مەرەيتويلارىن اتاپ ءوتۋدى جاقسى داستۇرگە اينالدىرىپ كەلەدى.