ازيادا الامانىندا الەكسەي پولتورانين وسىنداي جەتىستىككە قول جەتكىزدى
...الەكسەي پولتورانين 11 جاسىنان باستاپ شاڭعى سپورتىمەن جاتتىعا باستادى. باپكەرى ا.ناكونەچنىي العان بەتىنەن قايتپايتىن قايسار بالانىڭ بولاشاعىنان ءۇمىت كۇتكەن ەدى. سەبەبى, ول باسقالارعا قاراعاندا تاباندىلىقپەن ۇزاق جاتتىعاتىن, سەنبى, جەكسەنبى كۇندەرى دە شاڭعىسىن كيىپ الىپ نۋ ورماننىڭ ىشىندە جالىقپاي جۇگىرەتىن. سول ون ءبىر جاسار بالا العاش رەت وبلىستىق, رەسپۋبليكالىق جارىستاردا توپ جارماسا دا العاشقى التىلىققا ەنىپ ءجۇردى. ارادا ءۇش جىلدان كەيىن الەكسەي جاسوسپىرىمدەر اراسىنداعى الەم چەمپيوناتىنا قاتىسۋ مۇمكىندىگىنە يە بولدى.
2004 جىلى نورۆەگيادا شاڭعى سپورتىنان جاسوسپىرىمدەر اراسىندا الەم چەمپيوناتى ءوتتى. قازاقستان قۇراماسىنىڭ ساپىندا ريددەرلىك 17 جاسار الەكسەي پولتورانين دە بار. جارىستىڭ ءۇشىنشى كۇنى ول ءبىر توپ ارىپتەستەرىمەن بىرگە ەستافەتالىق جارىسقا ءتۇستى.
10 شاقىرىمدىق ەستافەتاعا بەس كوماندا قاتىستى. قازاقستاندىق شاڭعىشى قارسىلاستارىنان بەس سەكونت كەشىگىپ ەستافەتا تاياقشاسىن الدى. الەكسەي بەس ءجۇز شاقىرىم جۇگىرگەننەن كەيىن قارسىلاسىن قۋىپ جەتىپ, جەتى سەكونت ەرتە جەتىپ, ءتورتىنشى كەزەكتە جۇگىرەتىن ارىپتەسىنە بەردى. الەكسەيدىڭ التىن ۋاقىتى قۇراما جىگىتتەرىنە التىن القا سىيلادى. ءتورت جىگىتتىڭ قۋانىشىندا شەك جوق, ءبىر-ءبىرىن قۇشاقتاپ, قۇتتىقتاپ جاتىر. سول جىلى 17 جاسار شاڭعىشى حالىقارالىق دارەجەدەگى سپورت شەبەرى اتاعىنا يە بولدى.
2007 جىلى قىتايدىڭ چانگچۋن قالاسىندا وتكەن VI قىسقى ازيا ويىندارىندا الەكسەي تاعى دا التىنسىز قالدى. سپرينتتە ەكىنشى, ون شاقىرىمدىق ەركىن جۇگىرۋدە دە كۇمىس القانى يەلەندى.
كانادانىڭ ۆانكۋۆەر قالاسىندا وتكەن ءححى قىسقى وليمپيا ويىندارىنا الەكسەي تاس-ءتۇيىن ازىرلىكپەن كەلدى. مۇنىڭ الدىندا شاڭعى سپورتىنان وتكەن الەم كۋبوگى جارىستارىندا جامان ءناتيجە كورسەتكەن جوق. بىرەر رەت التىلىققا ەنگەن ازاماتتان باپكەرى ءۇمىت كۇتكەنى جاسىرىن ەمەس. ۆانكۋۆەرگە جينالعان كىلەڭ ءبىر ىعاي-سىعايلار التىن القانى ساراپقا سالا باستادى. نورۆەگيالىق اتاقتى شاڭعىشى نورتۋكتىڭ جۇلدىزدى شاعى تۋعانداي. ول ەكى التىندى تالاسسىز جەڭىپ الدى. مىنە, سپرينتتىك جارىستا دا التىن القا مەنىكى دەگەندەي تاكاپپارلانا قارايدى. سپرينتتىك جارىستا الەكسەي اتاقتى نورتۋكپەن ۇزەڭگى قاعىستىرىپ كەلە جاتقان. نورتۋكتان قالىپ قويماسا ايتەۋىر ءبىر مەدالدى الاتىنىنا سەنىمدى ەدى. امال بار ما, بۇرىلىستا شالىنىپ قۇلاپ, كومبەگە بەسىنشى بولىپ جەتتى. «اتتەڭ» قۇلاپ قالماعاندا, ءۇشىنشى ورىنعا تابان تىرەرى ءسوزسىز ەدى. بۇدان كەيىن كوماندالىق سپرينتتە دە بەسىنشى بولىپ مارە سىزىعىن قيدى. بۇل الەكسەيدىڭ تاماشا تابىسى ەدى. وليمپيا ويىندارىندا قاتارىنان ەكى رەت بەسىنشى بولىپ كەلۋى جاقسى ناتيجە. بۇدان كەيىن دە تالاپتى جاس فرانتسيادا وتكەن 23 جاسقا دەيىنگى الەم چەمپيوناتىندا كۇمىس مەدالدى جەڭىپ الدى.
ال بىلتىرعى جىلدىڭ 11-16 جەلتوقسانىندا شۆەيتساريانىڭ داۆوس قالاسىندا شاڭعىدان وتكەن الەم كۋبوگى كەزەڭىندە الەكسەي التىن جۇلدەنى يەلەنىپ, ايدى اسپانعا شىعاردى. ارادا ۆ.سميرنوۆتىڭ 12 جىلعى ۇزىلىسىنەن كەيىنگى جەڭىسى قايتالاندى. ادەتتە الەم كۋبوگى كەزەڭى الەم چەمپيوناتىنان كەم ەمەس. ەۋروپا ەلدەرىنىڭ شاڭعىشىلارى كۋبوك دەسە ىشكەن اسىن جەرگە قوياتىنى بەلگىلى. دەمەك, ريددەرلىك ساڭلاقتىڭ بۇل تابىسى ەل تاريحىنداعى ەلەۋلى وقيعا.
ازيا ويىندارى باستالار ساتتە شاڭعى سالاسىن ۇستاعان باسشىلار الەكسەيگە ۇلكەن مىندەت جۇكتەدى. بەس قاشىقتىق بويىنشا بىرنەشە التىن, كۇمىس, قولا القانى يەلەنۋ قاجەت.
ازيا ويىندارى قارساڭىندا استانا مەن الماتىدا عالامات سپورت سارايلارى سالىندى. شورت-ترەك وتكەن ۆەلوترەك, كونكيمەن جۇگىرەتىن سپورت كەشەنى قانداي اسەم. ءبىز ەكونوميكاسى ەرەكشە دامىعان يتاليانىڭ تۋرين قالاسىنداعى سپورت كەشەندەرىن ارالاپ, كوزبەن كورگەن ەدىك. تۋريندەگى كونكيشىلەر جارىسى وتكەن سارايدان استاناداعى كەشەن الدەقايدا ەڭسەلى, ءالدەقايدا اسەم, كورىكتى دەسەم, قاتەلەسە قويماسپىز. ال الماتىمەن ىرگەلەس تالعار قالاسى ماڭىنداعى قاتار-قاتار قونىس تەپكەن شاڭعى جانە بياتلون ستاديوندارىن كورگەن كەزدە ەرىكسىز ريزا بولدىق. مۇندا شاڭعى جارىسىنان كەيىن وتىز-قىرىق مەتر جەردى اتتاساڭ بياتلوندى تاماشالاۋعا بولادى.
سولداتساي شاتقالىندا العاشقى كۇنى الەكسەي پولتورانين مەن نيكولاي چەبوتكو سپرينتتىك قاشىقتىقتا ونەر كورسەتتى. تاعى دا كوز الدىمىزعا تۋرين ەلەستەدى. ول جولى چەبوتكو جەرلەسى نيكولاي كوشەۆويمەن بىرگە جۇگىرىپ, التىنشى ورىنعا تابان تىرەگەن. جاقسى كورسەتكىش. ال سولداتسايدا التىندى قولدان بەرمەۋ كەرەك. سپرينتتىك جارىس قىزىقتى, كورەرمەندەرىن جالىقتىرمايدى. ال الەكسەي ءبىرىنشى بولىپ جۇگىردى, الدا كەلدى دە چەبوتكونى جىگەرلەندىردى. ولار التى اينالىم بويى كوش باستاپ, 22 ءمينوت 46,2 سەكونت ۋاقىتتا مارە سىزىعىن قيدى. العاشقى التىن قولدا. بۇدان كەيىن دە جەڭىستى كۇندەر جالعاسىن تاۋىپ, الەكسەي ءۇش التىن, ءبىر قولانى يەلەندى. ءناتيجەسىندە ريددەرلىك ساڭلاق ءتورت التىن, ءبىر قولاعا قول جەتكىزدى. شىعىسقازاقستاندىق ن.كولومينا, و.ياتسكايا سياقتى شاڭعىشى قىزدار دا ءتورت التىن, ەكى كۇمىس, ءبىر قولانى قورجىنعا سالدى. ەڭ قۋانىشتىسى, الەكسەيدىڭ جۇبايى بياتلونشى ولگا پولتورانينا دا ءبىر التىن القانى سىيلادى.
ەلگە ورالعان سوڭ وبلىس اكىمى ب.ساپارباەۆ ەلدىڭ ابىرويىن اسقاقتاتقان ساڭلاقتارعا قۇرمەت كورسەتتى. ا.پولتورانين, يۋ.گالىشەۆا, ە. كولومينا, و. ياتسكاياعا تەمىر تۇلپاردىڭ كىلتىن تابىس ەتىپ, قارجىلاي قولداۋ كورسەتتى. الدا – سوچي وليمپياداسى. الەكسەيدىڭ ارمانى وليمپيادا القاسىن يەلەنۋ.
وڭداسىن ەلۋباي.
