اباي الەمىنە ساياحات

  استانا وپەرا جانە بالەت تەاترى ءوزىنىڭ ءتورتىنشى ماۋسىمىن ا.جۇبانوۆ پەن ل.ءحاميديدىڭ «اباي» وپەراسىمەن اشادى. بەلگىلى رەجيسسەر دجانكارلو دەل موناكو (يتاليا) مەن كورنەكتى قويۋشى-ديريجەر الان بورىباەۆتىڭ قويىلىمىنداعى بىرەگەي ۇلتتىق سپەكتاكل استانا تۇرعىندارى مەن قوناقتارىنا III حالىقارالىق «جىبەك جولى» فەستيۆالىنىڭ اياسىندا ۇسىنىلادى. بيىل قازاقتىڭ كومپوزيتورلىق ونەرىنىڭ الىپتارى – احمەت جۇبانوۆ پەن لاتيف ءحاميديدىڭ تۋعانىنا 110 جىل تولعالى تۇر. ايتسە دە, «استانا وپەرا» ۇلكەن زالىنىڭ اسا كورنەكتى كومپوزيتورلاردىڭ تۋىندىسىمەن اشىلۋى كەزدەيسوق ەمەس. نەگە دەسەڭىز, ول تەاتردىڭ «ماڭدايالدى» قويىلىمى. پارتيتۋرانى مۋزىكالىق تۇرعىدان قايتا قاراۋ جاۋاپكەرشىلىگى احمەت جۇبانوۆتىڭ شوبەرەسى – تەاتردىڭ باس ديريجەرى الان بورىباەۆقا جۇكتەلگەنى دە تەكتەن-تەك ەمەس. ونىڭ ءمىنسىز جۇمىسىنا كورەرمەنمەن قاتار, ويشىلىمىزدىڭ شەكسىز تاماشا الەمىنە ەلىكتىرىپ اكەتەتىن سيمفونيالىق وركەستردىڭ مۋزىكانتتارى دا لايىقتى باعا بەرىپ ۇلگەردى. قازاق-يتاليان شىعارماشىلىق توبى جۇزەگە اسىرعان وپەرا قازاق فيلوسوفياسىنىڭ دانىشپانى – اباي قۇنانباي ۇلىنىڭ ومىردەگى قىزمەتى, قۇندىلىعى مەن ارماندارى جايلى باياندايدى. قويىلىم سول كەزدەگى شىنايى ەتىپ, دالمە-ءدال جەتكىزەدى. – كلاسسيكالىق وپەرالىق سپەكتاكلدى يتاليان مەكتەبىنىڭ كوزىمەن ۇسىنعان كوركەمدىك-قويىلىمدىق توپ وپەرادا ءبىرىنشى كەزەكتە مۋزىكادا بەرىلگەن دراماتۋرگيالىق قاقتىعىستارعا اپاراتىن ادام قۇشتارلىعىنىڭ كورىنىسىن تىڭدارمانعا ەموتسيالىق تۇرعىدان بىرگە باس­تان كەشىرۋدى كوزدەگەن. «ابايدى» تەك وسىلاي كورگەن ولار تەاتردىڭ كەرەمەت كاسىبي دەڭگەيىن پايدالانا وتىرىپ, ۇلتتىق نەگىزدى ەسكەرەتىن قويىلىم جاسادى. جانردىڭ مۇمكىندىگىن ەرەكشە سەزىنەتىن كوركەمدىك-قويىلىمدىق توپ كەڭەس زامانىنداعى سپەكتاكلدەردىڭ كوزگە ۇرىپ تۇراتىن الەۋمەتتىك «يلەۋىن» ەڭسەرىپ, وپەرانىڭ ءمان-ماعىناسىن اشا ءبىلدى. بۇگىندە بۇل وزەكتى ماسەلە بولىپ تابىلادى. الايدا بۇعان دەيىن وعان باسا نازار اۋدارىلعان جوق, – دەپ اتاپ ءوتتى وپەرانىڭ تۇساۋكەسەرىندە بولعان ونەرتانۋ عىلىمدارىنىڭ دوكتورى, قازۇوۋ پروفەسسورى ءۇمىتجان جۇماقوۆا. ءبىرىنشى اكتىنىڭ ەكىنشى كورىنىسىندەگى ابايدىڭ تاڭعاجايىپ ءۇيى ويشىلدىڭ رۋحاني بايلىعىن جەتكىزىپ تۇردى. اقىننىڭ شىعارماشىلىعىن وسىلايشا سەزىنگەن اتاقتى سۋرەتشى-ستسەنوگراف ەتسيو فريدجەريونىڭ (يتاليا) ستسەنوگرافيالىق جۇمىستارى تاڭداي قاقتىرادى. فرانكو سكۋارچاپينو (يتاليا) ۇساق-تۇيەگىنە دەيىن زەرتتەپ, ناتيجەسىندە تۇپنۇسقاعا پارا-پار ەتىپ تىككەن ساحنالىق كوستيۋمدەر ۇلتتىق مۇراجايلارداعى قازىنا­لارىمىزدان كەم تۇسپەيدى. «استانا وپەرا» سوليستەرى كورەرمەنمەن جاڭا ماۋسىمداعى العاشقى كەزدەسۋىن اسىعا كۇتەدى. باس پارتياعا دايىندالىپ جاتقان قازاقستاننىڭ ەڭبەك سىڭىرگەن قايراتكەرى  – جانات شىبىقپاەۆ, اجار – قازاقستاننىڭ ەڭبەك سىڭىرگەن قايراتكەرى سالتانات احمەتوۆا, ايدار – قازاقستان مەن تاتارستاننىڭ ەڭبەك سىڭىرگەن قايراتكەرى نۇرلان بەكمۇحامبەتوۆ, سىرتتان –ارمە­نيانىڭ حالىق ءارتىسى بارسەگ تۋمانيان, ءازىم – بەيىمبەت تاڭارىقوۆ, جيرەنشە – ەۆگەني چاينيكوۆ, قارلىعاش – سالتانات مۇراتبەكوۆا, كوكپاي – تالعات عالەەۆ, نارىمبەت – رامزات بالاكيشيەۆ, مەس – نۇرلىبەك قوسپارماقوۆ وسى ساپتا بار. «استانا وپەرا» باس حورمەيستەرى – قازاقستان رەسپۋبليكاسىنىڭ ەڭبەك سىڭىرگەن قايراتكەرى ەرجان ءداۋىتوۆ. «ەگەمەن-اقپارات»