ءومىر دەگەن كينوداعى كەز كەلگەن كەيىپكەردىڭ ورنى مەن وينايتىن ءرولى بولاتىنى بەلگىلى. بىراق كەيدە ەكى ادامنىڭ بەينەسىن ءبىر ادام سومداپ جۇرگەنىن كورگەندە, ەرىكسىز تاڭعالاسىڭ. پەندەسىنىڭ پەشەنەسىنە قانشاما قابىلەتتى قالاي سىيعىزعان دەپ جاراتقاننىڭ قۇدىرەتىنە تاعى ءبىر باس يەسىڭ.
ونىڭ نەگىزگى ماماندىعى – جۋرناليست. الماتىدا دۇنيەگە كەلىپ, اقش-تا ءبىلىم الدى. ءار جىلدارى راديودا, كومەديالىق شوۋلاردا ءتىلشى, رەداكتور بولىپ قىزمەت اتقاردى. بىرنەشە رەت «ەممي» سىيلىعىنىڭ لاۋرەاتى اتاندى. اقش-تاعى RegLight گالەرەياسىندا سۋرەتشى بولىپ قىزمەت ەتتى. ول كىم دەيسىز عوي؟ ول ونەرلى وتباسىنىڭ ءبىر ءمۇشەسى – ەلەنا تاراكوۆا. وتكەن اپتادا استاناداعى رەسەي عىلىم جانە مادەنيەت ورتالىعىندا ەلەنانىڭ ەڭبەگىن تانىستىرىپ, شىعارماشىلىعىنان سىر شەرتەتىن سۋرەت كورمەسى اشىلدى. قازاقستاندا تۇڭعىش رەت ۇيىمداستىرىلعان كورمەگە مۋلتيپليكاتسيالىق cتيلدە سالىنعان 39 كارتينا قويىلعان. ەكسپوزيتسيانى تاماشالاۋعا كەلگەندەردىڭ اراسىندا قىلقالام شەبەرىنىڭ اتاسى مەن اكەسى, ەلىمىزگە تانىمال سۋرەتشىلەر مەن جۋرناليستەر جانە كورمە يەسىنىڭ دوستارى بولدى.
– مەن شىعارماشىلىققا جاقىن ادامداردىڭ وتباسىندا وسكەندىكتەن, سەزىمگە تەز بوي الدىرعىش, قيالعا بەرىلگىش بولىپ قالىپتاستىم. ءار تۋىندىم مەنىڭ ءبىر-ءبىر پەرزەنتىم سەكىلدى. ولاردى جانىممەن جاقسى كورىپ, جۇرەگىممەن بەرىلىپ سالامىن. سالاتىن دۇنيەمنىڭ تاريحىمەن جەتە تانىسىپ, ويلانىپ, تولعانىپ, قىر-سىرىنا قانىق بولعاندا عانا ونى ورىنداۋعا كىرىسەمىن. ءبىر سۋرەتتى سالۋعا كەتەتىن ۋاقىت تۋىندىنىڭ كولەمىنە جانە كۇردەلىلىگىنە بايلانىستى بولادى. تاپسىرىسپەن سۋرەت سالاتىنىمدى جاسىرمايمىن. الايدا, مەنىڭ تاپسىرىس بەرۋشىگە قوياتىن ءبىر تالابىم بار: ماعان ەشقانداي شەكتەۋ قويىلماۋى كەرەك. سۋرەتتەرىمنىڭ سيۋجەتىن ويدان ەمەس, ءومىردەن الامىن, – دەدى ول.
ەلەنا ەڭ ءبىرىنشى شىعارماشىلىق ەركىندىككە ەرەكشە ءمان بەرەتىنىن ايتتى. وعان سەبەپ, العاشقىدا ول سۋرەتتەرىن قاتىپ قالعان قاعيدامەن, تالاپ-ءتارتىپپەن سالۋعا تىرىسقان. بىراق شىعارماشىلىق تۋىندىلار شىنجىرعا بايلاپ, تارتىپكە باعىندىرۋعا كونبەيتىن كوڭىلدىڭ قالاۋى مەن جۇرەكتىڭ الاۋىنان تۋىندايتىن سيقىرلى سىيلىق سياقتى.
– ماعان الدىمداعى سۋرەتشىلەردىڭ سوزدەرى قاتتى اسەر ەتتى. ولار سۋرەتتى بەلگىلى شەڭبەرمەن, شەكتەۋمەن سالسام, وزگەلەردەن ەش ايىرماشىلىعىم بولمايتىنىن ءتۇسىندىردى. ال مەن ەشكىمگە ۇقسامايتىن وزىندىك قولتاڭبامدى قالىپتاستىرعىم كەلدى. ءاۋ باستا سۋرەتتى قىزىعۋشىلىقپەن, قازىر قۇشتارلىقپەن سالامىن. مەن ءۇشىن بۇگىنگى ەكسپوزيتسياداعى سۋرەتتەردىڭ بارلىعى قىمبات, بارلىعى قۇندى. كورمەدە «ءپىل» دەگەن كارتينا تۇر. ونى مەن اناما ارناپ سالدىم. بۇل كارتينانى ەشكىمگە, ەشقاشان, ەشقانداي اقشاعا ساتپايمىن, – دەدى سۋرەتشى-جۋرناليست.
قالام مەن قىل قالامدى سەرىك ەتكەن سۇلۋدىڭ بۇعان دەيىنگى كورمەسى اقش-تا وتكەن. ماحابباتى مەن ماشاقاتى قاتار جۇرەتىن قوس ونەر سالاسىنىڭ دا سالماعى اۋىر. بىرەۋىندە ويلانىپ جازاسىڭ, ەكىنشىسىندە تولعانىپ سالاسىڭ. تۇپتەپ كەلگەندە, ەكەۋى دە تاريح, ەكەۋى دە تاربيە, ەكەۋى دە ەستەلىككە اينالاتىنى ايقىن.
اتالمىش كورمە استاناداعى رەسەي عىلىم جانە مادەنيەت ورتالىعىندا قىركۇيەكتىڭ 23-نە دەيىن جالعاسادى.
راۋان قايدار,
«ەگەمەن قازاقستان»
