«ەگەمەندى» ىزدەپ ەلەڭدەيدى

اق جاۋلىعى جەلبىرەپ, اقشا ءجۇزى ەلجىرەپ, زەينەپ اپا «ەگەمەنگە» تاعى كەلە جاتىر ەكەن. تاعى دەيتىنىم, بۇل كىسى ءبىزدىڭ رەداك­تسياعا كۇندە بول­ما­عانىمەن, ءجيى باس سۇعادى. تۇراق­تى وقىرما­نى­مىز. جيناپ قويعان ءبىر بۋما گازەتتى رەداكتسيادان ءوزى الىپ كەتەدى. «قان­شا دەگەن­مەن, قالانىڭ ىشىندەسىز, قازىر گازەتتى جەتكىزۋدىڭ باسقا دا جول­دارى بار ەمەس پە, نەگە اۋرە بولا­سىز», دەيمىز گازەت الۋعا سوناۋ جەر­­دەن اۆتوبۋسپەن كەلىپ ءجۇر­گەن قاريا­نىڭ قاجىرىنا قاي­ران قالىپ. قالاي دەگەنمەن, سەكسەننىڭ سەڭگىرىنە تاقاعان جاسى بار. بىراق بۇل وقىرمانىمىزدىڭ ارتىق­شىلىعى دا وسىندا, ءوزىنىڭ ءسوزى­مەن ايتقاندا, «گازەتتى ءوز اياعى­مەن كەلىپ, ءوز قولى­مەن» العان­دى ۇنا­تادى. وسىلايشا, گازەت وقۋ­دى ومىرلىك ادەتىنە اينال­­دىر­عان ەرەكشە وقىرمان «ەگە­مەن­نىڭ» ەشبىر ءنومىرىن قالت جىبەر­مەيدى. «ەگەمەنىڭىز» نە, بۇل كىسى «سوتسيا­ليستىك قازاقستاننان» بەرگى تۇراقتى وقىرمان. قاريا قاسىنا قاتارلاسا قوسىلعان مەنى بىردەن تاني قوي­ماسا دا, اماندىعىما مەيى­رىممەن جاۋاپ قاتىپ, اڭقىلداي سويلەپ, مارە-سارە بولىپ قالدى. بۇل دا بولسا, ونىڭ ەل گازەتى ­– «ەگەمەنگە», ونداعى ەگە­مەن­دىكتەرگە دەگەن ەرەكشە قۇر­مەتى. «ەگەمەن» ەلدىڭ باس باسى­لىمى, ەلدىڭ بۇكىل تىنىس-ءتىرشى­لىگىنىڭ ايناسى عوي. اللاعا شۇكىر, كوزىم اماندا «ەگەمەنىمدى» وقىپ وتەمىن», دەيدى زەينەپ قۇباش­قىزى. سۇيسىنەسىڭ. گازەتكە دەگەن قۇشتارلىقتان قۋات العان قاريا­نىڭ قايراتىنا قىزىعاسىڭ. ويپىرىم-اي, وسى «جۇرت گازەت وقىمايدى» دەگەندى كىم ايتتى ەكەن؟! كەرىسىنشە, زامان وزعان سايىن وقىمىستى كوپ قازىر. شۇكىر, وقىسام, بىلسەم دەيتىن ۇرپاق­تىڭ ۇمتىلىسى ۇشقىر. ءار وقىرمان ءار باسىلىمنان وزىنە كەرەگىن ىزدەيدى. بىرەۋ بۇرىنعىشا قاعاز ءتۇرىن قولايلى كورسە, ەندى ءبىرى ينتەرنەتكە يكەمدى. سوعان ساي باسىلىمدار دا باستى تالاپتارعا باسىمدىق بەرىپ, وقىرماننىڭ سۇرانىسىنان شىعۋعا تىرىسادى. قالاي بولعاندا دا, بىرەۋ ىزدەنىپ وقىر, بىرەۋ قاجەتتىلىكتەن وقىر, باس­تىسى, وقىرمانسىز گازەت جوق. ارينە, گازەت ءۇشىن ءاربىر وقىر­مان ماڭىزدى. الايدا 78-دە جاسى بار اق جاۋلىقتى انا­نىڭ باس باسىلىمعا باس ءيىپ, قاراشاڭىراققا قۇرمەتپەن قاراۋى­نىڭ ءجونى ءبىر بولەك ەكەن. دينارا بىتىكوۆا, «ەگەمەن قازاقستان» استانا سۋرەتتى تۇسىرگەن ەرلان وماروۆ, «ەگەمەن قازاقستان»