مەملەكەتتىك حاتشى ەقىۇ-نىڭ استاناداعى باسشىسىمەن كەزدەستى

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ استاناداعى باعدارلامالار ءوفيسىنىڭ باسشىسى دەرد سابومەن كەزدەستى. كەزدەسۋ بارىسىندا تاراپتار قازاقستاننىڭ ەقىۇ شەڭبەرىندەگى ىنتىماقتاستىعىنىڭ جاي-كۇيى مەن پەرسپەكتيۆالارىن تالقىلادى. مەملەكەتتىك حاتشى 2010 جىلى استانادا وتكەن ەقىۇ ءسامميتىنىڭ قورىتىندىسى بويىنشا قابىلدانعان «قاۋىپسىزدىك قوعامداستىعى جولىندا» اتتى استانا دەكلاراتسياسىن ىسكە اسىرۋ قازاقستاننىڭ باستى قىزمەتىنىڭ ءبىرى بولىپ سانالاتىنىن اتاپ ءوتتى. گ.ابدىقالىقوۆا استاناداعى ەقىۇ باعدارلامالارى وفيسىمەن اراداعى جولعا قويىلعان جۇمىس تەتىگى جەرگىلىكتى جەرلەردە ۇيىمنىڭ تيىمدىلىگىن ارتتىرۋدىڭ ۇلگىسىنە اينالعانىن ايتتى. بۇل رەتتە جوبالاردى ازىرلەۋ, ۇكىمەتتىك قۇرىلىمدارمەن بىرلەسىپ جالپى جوسپارلاۋ جانە ونى سىرتقى ىستەر مينيسترلىگىمەن ۇيلەستىرۋ ۇدەرىسىنە قاناعاتتاناتىنىن ءبىلدىردى. 2016 جىلى قازاقستاننىڭ مۇددەلى مەملەكەتتىك ورگاندارى ەقىۇ-مەن بىرلەسكەن 50 جوبانى ويداعىداي جۇزەگە اسىرۋدا. مەملەكەتتىك حاتشى قازىرگى زامانعى قاۋىپسىزدىككە قاتەر ءتوندىرىپ تۇرعان حالىقارالىق, جەرگىلىكتى جانە دىنارالىق قاقتىعىستاردىڭ الدىن الۋ ىسىندە حالىقارالىق قۇقىقتىڭ ايقىن ۇستەمدىگى ارقىلى قاقتىعىسسىز الەم قۇرۋعا شاقىراتىن قازاقستان پرەزيدەنتى نۇرسۇلتان نازارباەۆتىڭ «الەم. XXI عاسىر» مانيفەسىنىڭ ايرىقشا وزەكتىلىگىن اتاپ ءوتتى. سونىمەن بىرگە, گ.ابدىقالىقوۆا مارتەبەلى مەيماندى بەس ينستيتۋتسيونالدىق رەفورمانى ىسكە اسىرۋ جونىندەگى ۇلت جوسپارىنىڭ ورىندالۋ بارىسى جانە قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋ اياسىندا وتەتىن ءىس-شارالار تۋرالى حاباردار ەتتى. ول تاۋەلسىزدىك جىلدارىندا ەكونوميكانىڭ نىعايىپ, حالىقتىڭ ءال-اۋقاتى ارتقانىن, قازاقستان قوعامى جالپىۇلتتىق كەلىسىم مەن قوعامدىق تۇراقتىلىقتىڭ ۇلگىسى رەتىندە قاراستىرىلىپ وتىرعانىن, ال ەلىمىز جاۋاپتى ءارى قۇرمەتتى حالىقارالىق سەرىكتەس رەتىندە تانىلعانىن اتاپ ايتتى. ەقىۇ-نىڭ استاناداعى باعدارلامالار ءوفيسىنىڭ باسشىسى قازاقستان رەسپۋبليكاسىنىڭ مەملەكەتتىك حاتشىسىنا جىلى شىرايلى قابىلداۋى ءۇشىن العىس ايتىپ, ەقىۇ-نىڭ قازاقستانمەن اراداعى ىنتىماقتاستىعىنىڭ الداعى ۋاقىتتا دا جەمىستى بولا بەرەتىنىنە سەنىم ءبىلدىردى. سونداي-اق, تاراپتار استانا ەكسپو-2017 حالىقارالىق كورمەسىنە ەقىۇ-نىڭ قاتىسۋ ماسەلەسىن تالقىلادى. كەزدەسۋ سوڭىندا گ.ابدىقالىقوۆا قازاقستان مەن ەقىۇ اراسىنداعى ديالوگ پەن ءوزارا تۇسىنىستىكتى نىعايتۋ ىسىندە د.سابوعا تابىس تىلەدى. «ەگەمەن-اقپارات»