پاراليمپيادا: راۋشان قويشىباەۆا – كۇمىس جۇلدەگەر!

قازاقستان پاۋەرليفتينگىشىسى راۋشان قويشىباەۆا ريو-دە-جانەيرودا ءوتىپ جاتقان پاراليمپيالىق ويىنداردا كۇمىس مەدال­دى جەڭىپ الدى. جەرلەسىمىز وعان 67 كيلوعا دەيىنگىلەر اراسىنداعى تالاستا قول جەتكىزدى. سايىستا ءبىزدىڭ اتلەت 113 كيلو سالماق كوتەردى. ال التىن مەدالدى 135 كيلو سالماقپەن الەم رەكوردىن جاڭارتقان قىتاي­لىق تان يۋياو الىپ كەتتى. ءۇشىنشى ورىنعا ەگيپەتتىك قىز امال ماحمۋد كوتەرىلدى. راۋشان قويشىباەۆا – 1966 جىلى الماتى وبلىسىندا تۋعان. ول 1990 جىلى جاراقات الىپ قالۋ ناتيجەسىندە ەكى اياعىن تىزەسىنەن تومەن كەستىرگەن. پاۋەرليفتينگپەن 2010 جىلدان بەرى اينالىسىپ كەلەدى. 2012 جىلى «سپورت شەبەرى», 2013 جىلى «حالىقارالىق دارە­جە­دەگى سپورت شەبەرى» اتاق­تارىن العان. تۇرمىس قۇرعان. ءۇش بالا تاربيەلەپ-ءوسىرىپ وتىر. وسىلايشا پاراليمپيالىق ويىنداردا قازاقستان قورجى­نىنا ەكىنشى كۇمىس مەدال ءتۇستى. مۇنىڭ الدىندا 100 مەترگە ەر­كىن جۇزۋدە تارازدىق ءزۇلفيا عابي­دۋللينا جەڭىپ العان بولاتىن. قازىر قازاقستان قۇراماسى 1 التىن, 1 كۇمىس مەدالمەن كومان­دا­لىق ەسەپتە 38-ورىندا تۇر. ال توپتىڭ باسىندا 39 التىن, 30 كۇمىس جانە 23 قولا مەدال جيناعان قىتاي سپورتشىلارى كەلەدى.