جەرگىلىكتى جوبالار رەسپۋبليكالىق بيۋدجەتتەن قارجىلاندىرۋ قىسقارتىلاتىن بولادى. بۇگىن اقوردادا ءوتىپ جاتقان قر ۇكىمەتىنىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ ۇكىمەتكە وسىنداي تاپسىرما جۇكتەدى دەپ حابارلايدى قازاقپارات. «بيۋدجەتتىك ساياساتقا كەلسەك, قيىن كەزەڭدەرى ۇلتتىق قور قاراجاتى ءبىزدى قۇتقارىپ كەلدى. ءبىر ەمەس بىرنەشە رەت. دەگەنمەن, قوردان بەرىلەتىن ترەنسفەرتتەردى قاتاڭ رەگلامەنتتەۋ كەرەك. مەن بۇنى تىكەلەي ءوزىم قاداعالايتىن بولامىن»,- دەدى مەملەكەت باسشىسى. سونىمەن قاتار, ەلباسى ماكروەكونوميكالىق ورنىقتىلىقتى قامتاماسىز ەتۋ ماسەلەلەرىنە توقتالا كەلە, بيۋدجەتارالىق قاتىناستارعا دا نازار اۋداردى. پرەزيدەنتتىڭ ايتۋىنشا, سوڭعى ون جىلدا رەسپۋبليكالىق بيۋدجەتتەن بولىنەتىن نىسانالى ترانسفەرتتەر ەسەبىنەن قارجىلاندىرۋ كولەمى ايتارلىقتاي كەڭەيگەن. «2016 جىلى بۇل جەرگىلىكتى بيۋدجەتكە جالپى تۇسىمدەردىڭ 36 پايىزىن قۇرادى. سوندىقتان دا, جەرگىلىكتى مانگە يە جوبالاردى رەسپۋبليكالىق بيۋدجەتتەن قارجىلاندىرۋدى توقتاتۋ كەرەك. بۇل ماسەلەنى اكىمدەر ءوز بەتىنشە شەشۋگە ءتيىس. وسىعان بايلانىستى ۇكىمەتكە بيۋدجەتارالىق قاتىناستاردى جەتىلدىرۋ بويىنشا ۇسىنىستار ازىرلەۋدى تاپسىرامىن», - دەدى ن. نازارباەۆ.