الداعى 5 جىلدا 600 مىڭ گەكتار ەگىستىك جەرلەرىن اينالىمعا ەنگىزۋ كەرەك - ەلباسى

الداعى بەس جىلدا كەمىندە 600 مىڭ گەكتار سۋارمالى ەگىستىك جەردى اينالىمعا ەنگىزۋ كەرەك . بۇگىن اقوردادا ءوتىپ جاتقان قر ۇكىمەتىنىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ ۇكىمەتكە وسى ماسەلەنى جۇكتەدى دەپ حابارلايدى قازاقپارات. «اۋىل شارۋاشىلىعى مينيسترلىگى مەن اكىمدەر اۋىل شارۋاشىلىعى جەرلەرىن ءتيىمدى پايدالانۋعا قاتاڭ باقىلاۋ جاساۋى كەرەك. بۇل جەرلەردى اپاتتى سۋ قويمالارىن جوندەۋ مەن جاڭالارىن سالۋ ارقىلى سۋمەن قامتاماسىز ەتۋ قاجەت. بۇل دا ۇدايى ايتىلادى. سۋعا تاپشى ەلمىز. ماسەلەن, بيىل قار قالىڭ بولدى, سۋ اعىل-تەگىل. مول سۋدىڭ ءبارى قايدا كەتتى. ارينە, وسىنى دۇرىس پايدالانا المادىق دەگەن ءسوز», -  دەدى ن. نازارباەۆ. «مەن ءتىپتى كەڭەس وداعىندا وسى ماسەلەمەن اينالىسقانمىن. قازاقستان دالالارىندا مىڭداعان قۇدىقتار بار ەدى. قۇدىق بار جەردە مال شارۋاشىلىعى دا جاقسى داميدى. ول بولماسا تۇك تە جوق», - دەدى ەلباسى. پرەزيدەنت بۇل رەتتە سۋ رەسۋرستارىمەن ۇكىمەت ارنايى اينالىسۋى تيىستىگىن دە اتاپ ءوتتى. ەلباسىنىڭ ايتۋىنشا, ەڭ ءبىرىنشى كەزەكتە ۇكىمەت قاي جەردە قانداي توعاندار سالىنۋى قاجەتتىگىنە باسا نازار اۋداراتىن بولادى.