سولتۇستىك كورەيا ەڭ ءىرى يادرولىق سىناق جاسادى

    بۇگىن استانا ۋاقىتىمەن ساعات 6.30-دا سولتۇستىك كورەيا ەل تاريحىنداعى بەسىنشى جانە ەڭ ۇلكەن يادرولىق سىناق جاسادى. بۇل جونىندەگى اقپاراتتى وڭتۇستىك كورەيانىڭ اسكەريلەرىنە سىلتەمە جاساعان BBC News تاراتتى. مامانداردىڭ ايتۋى بويىنشا, بۇل سىناق كيم چەن ىن رەجيمىنىڭ يادرولىق قارۋ سالاسىندا ايتارلىقتاي ىلگەرىلەگەنىن بىلدىرەدى.   «قايعىلى كۇن» جارىلعان بومبانىڭ قۋاتى كاليفورنيا ينستيتۋتىنىڭ مامانى دجەففري ءليۋيستىڭ جورامالى بويىنشا 30 كيلوتوننا دەپ حابارلايدى Reuters. «بۇل بۇگىنگە دەيىن سولتۇستىك كورەيا جاساعان سىناقتاردىڭ ەڭ ءىرىسى. ايتارى جوق, قايعىلى كۇن» دەدى ول ليۋيس. جارىلىستىڭ كۇشتىلىگى سونشا, سىناق جاسالعان ايماقتا قۋاتى  5,3 باللعا تەڭ جەر سىلكىنىسى سەزىلگەن.   «بارىپ تۇرعان ەسۋاستىق» وڭتۇستىك كورەيا سولتۇستىكتەگى كورشىسىنىڭ بۇل ءىسىن قاتاڭ ايىپتادى. ەل پرەزيدەنتى پاك كىن حە يادرولىق سىناقتى ادامزاتتىڭ «ءوز-ءوزىن جويۋ اكتىسىمەن» قاتار قويىپ, كيم چەن ىندى «بارىپ تۇرعان ەسۋاس» دەپ اتادى.  ول بۇل وقيعاعا بايلانىستى ءوزىنىڭ شەتەلدەگى ساپارىن ءۇزىپ, ەلىنە ورالۋعا ءماجبۇر بولدى. بۇگىن استانا ۋاقىتىمەن 11-لەر شاماسىندا پحەنيان بەسىنشى يادرولىق سىناقتىڭ جاسالعانىن جانە ونىڭ ءساتتى بولعانىن رەسمي تۇردە راستاپ, حابار تاراتتى. سولتۇستىك كورەيا جاساعان اسا قۋاتتى يادرولىق سىناق الەمدى ءدۇر سىلكىندىرگەن وقيعا بولىپ وتىر. جاڭا مالىمەتتەردى حابارلايتىن بولامىز.