سەنات بيۋروسىنىڭ العاشقى وتىرىسى بولدى

پارلامەنتتىڭ جاڭا سەسسياسىنداعى سەنات بيۋروسىنىڭ العاشقى وتىرىسى پالاتالاردىڭ 1 قىركۇيەكتە بولعان بىرلەسكەن وتىرىسىندا پرەزيدەنت نۇرسۇلتان نازارباەۆ بەلگىلەگەن مىندەتتەرگە ارنالدى, دەپ حابارلادى سەناتتىڭ ءباسپاسوز قىزمەتى. سەنات توراعاسى قاسىم-جومارت توقاەۆ پارلامەنت قاراۋىنا ينستيتۋتتىق رەفورمالاردى ودان ءارى قامتاماسىز ەتۋگە جانە كەشەندى الەۋمەتتىك-ەكونوميكالىق ءىس-شارالاردى ىسكە اسىرۋعا باعىتتالعان 50-گە جۋىق زاڭ جوباسى كەلىپ تۇسەتىنىن ايتتى. بىرنەشە زاڭ جوباسى جوسپاردان تىس ەنگىزىلەتىن بولادى. ولاردىڭ ىشىندە ەلىمىزدىڭ قاۋىپسىزدىگىن نىعايتۋعا باعىتتالعان, قىسقا مەرزىمدە قابىلداۋدى قاجەت ەتەتىن زاڭدار دا بار. «ءبىز, ءاربىر زاڭ جوباسىن مۇقيات تالقىلاپ, قابىلداناتىن زاڭداردىڭ ساپاسىنا ەرەكشە ءمان بەرىپ, ۇكىمەتپەن تىعىز جۇمىس جاساۋىمىز قاجەت. بۇل رەتتە, ەلباسىنىڭ ناقتى تاپسىرماسى بار», – دەپ اتاپ ءوتتى توراعا. «جاڭا پارلامەنتتىك ماۋسىمدا ءبىز قابىلدانعان زاڭدار بويىنشا حالىققا كەڭىنەن ءتۇسىندىرۋ جۇمىستارىنا دەن قوياتىن بولامىز. ەلباسى ايتقانداي, «زاڭدى قابىلداۋدىڭ قاجەتتىلىگى مەن بارلىق لوگيكاسى قازاقستاندىقتارعا تۇسىنىكتى بولۋى ماڭىزدى», – دەدى ق.توقاەۆ. وسىعان بايلانىستى سەنات باسشىسى ارىپتەستەرىن بۇقارالىق اقپارات قۇرالدارىمەن بايلانىستى ودان ءارى جەتىلدىرۋگە, زاڭداردىڭ ەرەكشەلىكتەرىن تۇسىندىرۋگە, سونداي-اق وڭىرلەرگە ساپار بارىسىندا قابىلدانعان زاڭداردى حالىققا تۇسىنىكتى تۇردە ناسيحاتتاۋعا ايرىقشا ءمان بەرۋگە شاقىردى. وتىرىس بارىسىندا بيۋرو مۇشەلەرى 15 قىركۇيەكتە بولاتىن سەنات وتىرى­سىنىڭ كۇن ءتارتىبىن تالقىلادى.