كەڭەيتىلگەن ستانسانىڭ كەمەل مۇمكىندىكتەرى

وبلىستا وندىرىلەتىن ەلەكتر قۋاتىن انا­عۇرلىم ارتتىرۋدىڭ قارىمدى قادامدارى جاسالۋدا. سونىڭ ايقىن دالەلى, جاقىندا جاڭاجولدا قۋاتتىلىعى 160 مۆت گاز-تۋر­بينالىق ەلەكتر ستانساسى ىسكە قوسىلدى. ايتا كەتۋ كەرەك, بۇل كاسىپورىندا گتەس-45 گاز-تۋربينالى ستانساسى 2008 جىلى پايدالانۋعا بەرىلگەن, مۇنداعى وڭدەلە­تىن ەلەكتر قۋاتىنىڭ نەگىزى تۇتىنۋشىلارى №3 جاڭاجول گاز وڭدەۋ زاۋىتىنىڭ ءبىرىنشى كەزەكتەگى نىساندارى بولىپ تابىلادى. گتەس-45-ءتىڭ جيىنتىق نومينالدى قۋاتى – 34 مۆت, ياعني بۇل جاڭاجول كەن ورنىنداعى ەلەكتر ەنەرگياسىنا قاجەتتىلىكتى تولىق وتەمەيدى. وسىعان بايلانىستى ەلەكتر ستانساسىن كەڭەيتۋ تۋرالى شەشىم قابىلداندى, بۇل ەلەكتر قۋاتى­مەن جابدىقتاۋ ماسەلەسىن ءتيىمدى شەشۋگە ءمۇم­كىندىك بەرەدى. ايرىقشا اتاپ وتەرلىك جايت, وڭدەلگەن ەلەكتر قۋاتىن «سنپس-اقتوبەمۇنايگاز» اق بولىمشەلەرى عانا پايدالانىپ قوي­مايدى, «ەنەرگوسيستەما» جشس-نىڭ وڭىرلىك ەنەرگيامەن جابدىقتاۋدىڭ بىرىڭعاي جۇيەسىنە بەرىلەتىن بولادى. جوسپار بويىنشا ەلەكتر ەنەرگياسىن مەنشىكتى تۇتىنۋ 2017 جىلى 680 948 مىڭ كۆت/ساع قۇراسا, ال سىرتقا 2017 جىلى 72 652 مىڭ كۆت/ساع بەرىلەتىن بولادى. ءوڭىر باسشىسى بەردىبەك ساپارباەۆ اتالمىش جوبانىڭ ىسكە اسىرىلۋى ەلىمىزدىڭ ەنەرگەتيكالىق تاۋەلسىزدىگىن ىلگەرىلەتۋگە ەلەۋلى ۇلەس قوساتىنىن اتاپ ءوتتى. – ەنەرگەتيكا – ەكونوميكا دامۋىنىڭ نەگىزگى سالالارىنىڭ ءبىرى. قازىرگى تاڭدا وب­لىستىڭ ەلەكتر ەنەرگياسىنا قاجەتتىلىگى 620 مۆت قۇرايدى. وسى كۇنگە دەيىن ەلەكتر ەنەرگياسىنا تاپشىلىق 210 مۆت قۇرادى. الايدا, وسى ستانسانىڭ ىسكە قوسىلۋىنىڭ ارقاسىندا بۇل كورسەتكىش 60 مۆت-عا دەيىن قىسقاردى. وسىدان جەتى-سەگىز جىل بۇرىن وبلىس كورشىلەس رەسەي ەلىنەن الىناتىن ەلەكتر ەنرەگياسىنا تاۋەلدى بولدى. مەم­لەكەت باسشىسى سول كەزدە «سنپس-اقتو­بە­مۇنايگاز» اق-قا ىلەسپە گازدى شيكىزات رەتىندە پايدالاناتىن ەلەكتر ستانساسىن سالۋ تۋرالى مىندەت جۇكتەگەن بولاتىن, – دەدى وبلىس اكىمى. ەلەكتر ستانساسىن كەڭەيتۋ جوباسى بويىنشا وندىرىستىك پروتسەستىڭ تيىمدىلىگىن ارت­­­تىراتىن بىرقاتار يننوۆاتسيالىق شە­شىمدەر قابىلداندى. مىسالى, تۋربينالاردى سالقىنداتۋ ءۇشىن تىكەلەي اۋا­مەن سالقىنداتۋ جۇيەسى قولدانىلادى. بۇل سۋمەن سالقىنداتۋ تۋربينالارىمەن سالىس­تىرعاندا سۋدى 75 پايىزعا ۇنەم­دەيدى. ەلەكتر قۋاتىن ءوندىرۋ ءۇشىن شيكى­زات رەتىندە تازارتىلماعان ىلەسپە گاز قولدا­نىلادى. بۇل گازدى پايداعا جاراتۋ تۋرالى ستراتەگيالىق ماسەلەنى شەشۋگە مۇمكىندىك بەرەدى. سونىمەن قاتار ءوزى وندىرگەن گازدى پايدالانۋ ءونىمنىڭ قۇنىن ازايتادى. قۇرىلىستىڭ جالپى قۇنى – 26,6 ملرد تەڭگە, سونىڭ ىشىندە قۇرال-جابدىققا 12,6 ملرد تەڭگە قاراجات جۇمسالعان. قۇرىلىس بارىسىندا 150-گە جۋىق جەرگىلىكتى تۇرعىن جۇمىسپەن قامتىلعان, ستانسانىڭ ىسكە قو­سى­لۋىمەن 130 جاڭا جۇمىس ورنى اشىلدى. «سنپس-اقتوبەمۇنايگاز» اق – جۇمىس ورىندارى قىسقارماعان جانە جۇمىسشىلار الدىندا جالاقى بەرەشەگى جوق وڭىردەگى بىردەن-ءبىر كاسىپورىن. سودان كەيىن وبلىس اكىمى مۇعالجار اۋدا­نىنداعى مۇعالجار سەلولىق وكرۋگىنە بارىپ, بيزنەستىڭ الەۋمەتتىك جاۋاپكەرشىلىگى اياسىندا جوندەۋ جۇمىستارى جۇرگىزىلىپ جاتقان عيماراتتى ارالادى, بۇل جەردە مادەنيەت ءۇيىن اشۋ جوسپارلانىپ وتىر. وسى ماق­ساتتا «كوكتاس» اق قيىرشىق تاس زاۋى­تىنىڭ باسشىلىعى قارجى بولگەن. بۇعان قوسىمشا «جۇمىسپەن قامتۋ­دىڭ جول كارتاسى-2020» مەملەكەتتىك باعدارلا­ماسى بويىنشا ورتا مەكتەپكە جوندەۋ جۇمىس­تارى قارقىندى جۇرۋدە. اتقارىلاتىن جۇمىستىڭ جالپى قۇنى 73 ملن تەڭگە. ساتىبالدى ءساۋىرباي, «ەگەمەن قازاقستان» اقتوبە وبلىسى, مۇعالجار اۋدانى سۋرەتتى تۇسىرگەن حايرەدەن راۋشانوۆ