سەرتكە بەرىك ساربازدار

اسكەر قاتارىنا الىنعان كەز كەلگەن ازامات ءوزىنىڭ اسكەري بورىشىن روتا بۋىنىنان باستايدى, سول جەردە شىنىعادى, قولىنا قارۋ ۇستاپ ناعىز اسكەري بولۋعا قالىپتاسادى. ودان قالسا, ساپتىق دايىندىق, تەمىردەي ءتارتىپ پەن جاۋىنگەرلىك قىزمەت روتاداعى ەرلەر ۇجىمى ءۇشىن بۇلجىماس قاعيداعا اينالادى. ال سەرتكە بەرىكتىك پەن انتقا ادالدىق اسكەري قىزمەتتىڭ كرەدوسى ەكەنى ءسوزسىز. وسى ورايدا, ۇلتتىق ۇلاننىڭ «وڭ­تۇستىك» وڭىرلىك قولباسشىلىعىنا قاراستى زارەچنىي كەنتىندە ور­نالاسقان 7552 اسكەري ءبولىمىنىڭ 2-اتقىشتار باتالونى 5-اتقىشتار روتاسىنىڭ جاۋىنگەرلىك قىزمەتى تۋرالى ايتساق دەيمىز. ىرگەتاسى سوناۋ قىلىشىنان قان تامعان كەشەگى كەڭەستىك كەزەڭدە قالانعان ءبولىمنىڭ باس­تى قىزمەتى سوتتالعانداردى ايداۋىلداۋ مەن تۇزەۋ مەكەمەلەرىن كۇزەتۋ بولىپ تابىلادى. وسى ءبولىمنىڭ 2-اتقىشتار باتالونى 5-اتقىشتار روتاسىنىڭ ساربازدارى كۇندەلىكتى جاۋىنگەرلىك قىزمەت اتقارادى. ءوزىنىڭ باعىنىشىنداعى روتاسى تۋرالى روتا كومانديرى, اعا لەيتەنانت ەربول يۋسيپوۆ: «ءبىزدىڭ روتادا جاۋىنگەرلىك قىزمەتكە دەنساۋلىعى مىقتى, كاسى­بي شىڭدالعان, تاجىريبەسى مول اسكە­ري قىزمەتشىلەر مەن ساربازدار تۇسەدى. ويتكەنى, ءبىزدىڭ جاۋىنگەرلەر تۇزەۋ مەكەمەلەرىن كۇزەتۋ مەن سوتتالعانداردى ايداۋىلداۋ بويىنشا جاۋاپتى قىزمەتتەر اتقارادى. روتاداعى ساربازداردىڭ دا رۋحى بيىك, قاشان دا ادال قىزمەت اتقارۋعا تىرىسادى, ءبىزدىڭ روتا ۇجىمى ۇنەمى تەك جاقسى جاقتارىنان عانا كورىنىپ ءجۇر» دەيدى. 5-اتقىشتار روتاسىنىڭ جەكە قۇ­رامى №103 جالپى تارتىپتەگى ءتۇ­زەۋ مەكەمەسىن كۇزەتەدى. جالپى ال­عاندا, تاۋلىك سايىن جاۋىنگەرلىك قىز­مەتكە قاراۋىل باستىعىمەن بىرگە 24 ادام ءتۇ­سەدى. ونىڭ ىشىندە قاراۋىل باس­تىعىنىڭ كومەكشىلەرى, كينولوگيا ما­مانى دا بار. سونداي-اق, 18 ساقشى تاۋلىك بويى قىراعى قىزمەت اتقارادى. ساقشىلار قىزمەتتى اۋىسىم بويىنشا ورىندايدى. ءار اۋىسىم اراسىنداعى ۋاقىت ارالىعى ءۇش ساعاتتى قۇرايدى. سىرت­قى ءىز تەكسەرۋ جولاعىنا ەكى ساعات سايىن كينولوگتار قىزمەتتىك يتتەرىمەن تەكسەرىس جاساپ وتىرادى. تاعى ءبىر ايتا كە­تەرلىگى, قاراۋىل قىزمەتى بۇگىنگى زامان تا­لابىنا ساي تولىق بەينەباقىلاۋمەن جاب­­دىقتالعان. بۇل ءبىر جاعىنان, قىز­مەت­تى مۇلتىكسىز ورىنداۋعا جاقسى ءمۇم­كىن­­دىك جاساسا, ەكىنشىدەن, كومانديرلەر­گە با­قىلاۋ جۇرگىزۋگە دە ىڭعايلى ءارى ءتيىمدى. روتا جەكە قۇرامىنىڭ قىرا­عى قىزمەتتەرىنىڭ ارقاسىندا اتال­ع­ان تۇزەۋ مەكەمەسىندە ءتارتىپ بۇزۋ­شىلىقتار مەن  قۇقىق بۇزۋشىلىق­تارعا جول بەرىلگەن ەمەس. ءوزىنىڭ قىزمەتى جايلى قاتارداعى سارباز مۇ­قاعالي سەيىتقازى: «مەن وتان الدىن­داعى ازاماتتىق بورىشىمدى ۇلتتىق ۇلان قاتارىندا وتكەرىپ جاتقاندىعىمدى ماقتان تۇتامىن. ۇلتتىق ۇلان – ءتارتىپ اسكەرى, بۇل جەر­دە ساربازدار قىزمەتتەرىن ءوت­كە­رىپ, ۇيلەرىنە قايتقاننان كەيىن دە ەش ۋاقىتتا قۇقىق بۇزۋ­شىلىق­قا جول بەرگەن ەمەس. مۇندا كو­­مان­ديرلەرىمىز بىزگە اكەمىزدەي قا­راي­دى. ءار ساقشى وزىنە بەلگىلەنگەن ايماقتى قاتاڭ باقىلاۋعا الىپ, 15-20 مينۋت سايىن قاراۋىل باستىعىنا باياندايمىز» دەيدى. ورايى كەلگەندە, بەيبىت كۇندە قولىنا قارۋ الىپ قىزمەتكە اتتانار سار­بازداردىڭ پاتريوتتىق نامى­سىن جاني بىلەتىن ءوز ءىسىنىڭ مامانى, روتا كومانديرىنىڭ تاربيە جانە الەۋ­­مەت­تىك-قۇقىقتىق جۇمىستار ءجو­نىندەگى ورىنباسارى, لەيتەنانت داس­تان تاي­شىباەۆتان ساربازداردىڭ مورال­دىق-پسيحولوگيالىق جاي-كۇيى جايلى دا سۇراپ بىلگەن ەدىك. – جالپى, ۇلتتىق ۇلان قاتارىندا بورىشىن اتقارۋعا جاس جىگىتتەردىڭ قۇل­شىنىستارى وتە جوعارى. ونى وڭىرلەردەگى قورعانىس ىستەرى ءجونىن­دەگى ماماندار دا ايتىپ ءجۇر. ءبىزدىڭ روتاداعى ساربازدار ىرىكتەۋدەن ءسۇرىن­بەي وتكەن. ءبارىنىڭ دە وتانعا دەگەن پاتريوتتىق ىستىق سەزىمدەرى جالىنداپ تۇر. كەز كەلگەنىنە «اسكەرگە نە ءۇشىن كەلدىڭ؟» دەگەن سۇراق قويا قالساڭ, مۇدىرمەستەن «وتانىمدى قورعاۋ ءۇشىن كەلدىم!» دەپ نىق جاۋاپ بەرەدى. بۇل ءوز كەزەگىندە اسكەردە قىزمەت ەتۋدىڭ مارتەبەلى بولىپ كەلە جاتقاندىعىن دالەلدەيدى. ءبىز­دىڭ روتاداعى جاۋىنگەرلەردىڭ مورال­دىق-پسيحولوگيالىق جاعدايلارى جاقسى. ساربازداردىڭ وسى كۇنگە دەيىن شاعىمدارى بولعان ەمەس. دەما­لىس ۋاقىتتارىندا اتا-انالارىمەن حات جازىسىپ, حابار الماسىپ تۇرا­دى. مادەني-دەمالىس كۇندەرى روتا جەكە قۇرامى ءتۇرلى سپورتتىق ءىس-شارا­لارمەن اينالىسادى, دەيدى لەيتەنانت. ايدوس بايشاعىروۆ, ۇلتتىق ۇلاننىڭ «وڭتۇستىك» وڭىرلىك قولباسشىلىعى