ماسكەۋلىك ماەسترو

ايگىلى «ۆيرتۋوزى موسكۆى» كامەرالىق وركەسترىنىڭ ءبىرىنشى سكريپكاشىسى, رەسەيدىڭ ەڭبەك سىڭىرگەن ءارتىسى الەكسەي لۋندين ءىىى حالىقارالىق «جىبەك جولى» فەستيۆالىندە ونەر كورسەتپەك. ناقتى دەرەك كوزى بويىنشا تانىمال سكريپكاشى 18 قىركۇيەكتە «استانا وپەرا» تەاترىنىڭ كامەرالىق زالىندا ەلوردا تۇرعىندارى مەن قوناقتارى ءۇشىن ءوزىنىڭ اۋقىمدى باعدارلاماسىن ۇسىناتىنى, سونىمەن قاتار كونتسەرتكە قازاقستاننىڭ ەڭبەك سىڭىرگەن قايراتكەرى ابزال ءمۇحيتدينوۆتىڭ جەتەكشىلىگىمەن «استانا وپەرا» كامە­رالىق وركەسترى قاتىساتىنى ءمالىم بولدى. – مەن ءوزىم دە سالاتسگريۆتەگى حالىقارالىق كلاسسيكالىق مۋزىكا فەستيۆالىن ۇيىمداستىرۋشىلاردىڭ ءبىرى بولعاندىقتان, مۋزىكاعا قاتىستى مۇنداي مەرەكەلەردى وتكىزۋ يدەياسىن ۇلكەن ىنتامەن قابىلدادىم. «جىبەك جولى» فەستيۆالىنە قاتىسۋ – مەن ءۇشىن ۇلكەن قۋانىش. سەبەبى ول ۇزدىك سوليستەردىڭ ورىنداۋىنداعى شىعارمالار ارقىلى ونەر جولىن جاڭادان باستاعان مۋزىكانتتارعا كلاسسيكالىق مۋزىكانىڭ قىر-سىرىن ۇيرەتەدى. ءوز ارىپتەستەرىممەن, سونداي-اق قا­زاقستاندىق جانكۇيەرلەرمەن كەزدە­سۋدى اسىعا كۇتەمىن, – دەيدى اس­پاپ­شى. فەستيۆال قوناعىنىڭ اتى بۇگىندە ونەر جولىن ۇتىمدى دامىتىپ جۇرگەن تاماشا سكريپكاشى رەتىندە دە, وي-ءورىسى كەڭ مۋزىكانت رەتىندە دە جوعارى ماراپاتقا يە. جانە ول جالپى ومىردە ادامدارعا كلاسسيكالىق مۋزىكانىڭ جەتىسپەيتىنىن ايتادى. تاعى ءبىر ءمالىم بولعان جايت, سوليست ونەرلەرى اتادان بالاعا جالعاسىپ كەلە جاتقان مۋزىكانتتار وتباسىندا دۇنيەگە كەلگەن. ونىڭ ۇستازداردان جولى بولعان ادام. تالانتتى سكريپكاشى, ۇلكەن مۋزىكانت, شاكىرتتەرىن جارقىراتا بىلەتىن ۇلى مۋزىكانت مارينە ياش­ۆيلي مەن تسەيتليننىڭ شاكىرتى نادەجدا بەشكينا الەكسەي لۋندينگە مۋزىكانىڭ تاڭعاجايىپ الەمىنە كاسىبي داڭعىل جول اشىپ بەردى. الەمنىڭ ەڭ ۇزدىك كونتسەرتتىك الاڭدارىندا ونەر كورسەتىپ, قازىرگى زامانعى ايگىلى مۋزىكانتتارمەن بىرلەسىپ جۇمىس ىستەگەن.  قارشىعا كۇلەن