ارينە, وتانسۇيگىشتىك قاسيەت ادام بويىنا بابالاردىڭ قالدىرىپ كەتكەن وسيەتىمەن جانە اسقاق رۋحىمەن سىڭەدى دەسەك, ول ءۇشىن, الدىمەن, ءتول تاريحىمىز بەن انا ءتىلىمىزدى كوزدىڭ قاراشىعىنداي ساقتاي ءبىلۋىمىز كەرەك. ءبىزدىڭ بابالارىمىز ەل مەن جەر ءۇشىن جانىن قيىپ, قانىن توككەن. قازاقتا «بىلەكتىڭ كۇشىمەن, نايزانىڭ ۇشىمەن» دەگەن ءسوز تىركەسىنىڭ قالىپتاسۋى سول باتىر بابالارىمىزدىڭ قايتپاس ومىرلىك ۇستانىمىن پاش ەتەدى. قانشا باتىر بولسا دا, ءار ادام ءومىر سۇرگىسى كەلەتىنى اقيقات. ال وتان ءۇشىن جان بەرۋگە بابالارىمىز قاشان دا دايىن بولدى. ەندى وسى ەرلىك ءداستۇردى جاستارىمىزدىڭ بويىنا قالاي سىڭىرەمىز دەگەن وي مازالايدى.
مىنا بىزدەر وسكەلەڭ ۇرپاققا وركەندەگەن ەلدى تابىستاپ كەتۋ ءۇشىن قولىمىزدان كەلگەنشە ارەكەت ەتۋدەمىز. تەك ەلدىڭ عانا ەمەس, مىنا الەمنىڭ تاعدىرىنا الاڭداپ, سول باعىتتا ەلىمىز كوپتەگەن شارا وتكىزىپ كەلەدى. ماسەلەن, جاقىندا يادرولىق قارۋدىڭ الدىن الۋعا قاتىستى ەلىمىزدە ۇلكەن حالىقارالىق شارا ورىن الدى. مەملەكەت باسشىسى نۇرسۇلتان نازارباەۆتىڭ سەمەي پوليگونىن جابۋ ارقىلى وزگەلەردىڭ دە وسىنداي يگى قادامدارعا بارۋىنا تۇرتكى بولۋى ەلباسىمىزدىڭ بۇكىل الەمنىڭ پاتريوتى ەكەندىگىن كورسەتىپ بەردى. جاھان قازاقستاندى وسىنداي وڭدى باستامالارىمەن جاقسى تانيتىن بولدى. كەيبىر عالىمدار ادامزاتتى جويۋدىڭ جولدارىن تاپقانى ءۇشىن نەبىر سىي-سياپاتتار الىپ جاتسا, ەلباسى, كەرىسىنشە, بەيبىتشىلىكتى ساقتاۋدى ويلاعان ساناۋلى تۇلعالاردىڭ قاتارىندا.
مىنە, وسىنداي بەيبىتسۇيگىش ساياسات جاستارىمىزدىڭ دا بويىنان تابىلىپ, بولاشاققا دەگەن سەنىمىمىزدىڭ ساباقتاستىعىنا جول سالادى دەگەن ويدامىن. پاتريوتتىق سەزىمدى جاستاردىڭ بويىنا ءسىڭىرۋدى مىنبەردە تۇرىپ جۇزەگە اسىرۋ مۇمكىن ەمەس. سوندىقتان ارقاشاندا جاستاردىڭ جانىنان تابىلىپ, سولارعا دۇرىس باعىت سىلتەپ وتىرساق, ول دا وتانسۇيگىشتىك قاسيەتتىڭ كورىنىسى. بۇرىندارى, مىسالى, اكەلەرىمىز بىزدەردى تىزەسىنە وتىرعىزىپ الىپ, اتا-بابالارىمىزدىڭ ەرلىكتەرىن بايانداپ, ەلدى قالايشا... ساقتاپ قالعانى جايلى ايتىپ وتىراتىن. بۇل – تاربيە. ەگەر الدارىڭنان ۇلكەن كىسىلەر وتسە, جولدارىن كەسپەڭدەر, سالەمدەسكەندە ەكى قولدارىڭدى بەرىپ امانداسىڭدار دەۋشى ەدى. اسىرەسە, قىز بالالارعا ۇلكەندەردىڭ جولىن كەسپەڭدەر دەپ ايتىپ جاتاتىن. مۇنىڭ ءوزى دە پاتريوتتىق. قازىرگى كەزدە مەشىتتەردەن ۇلكەندەردى ەمەس, جاستاردى كوپ كورەتىن بولدىق. ارينە, بۇل ءۇردىس بارلىعىمىزعا وي سالۋى ءتيىس.
كوبىنەسە جۇمىسسىز جۇرگەندەر, ساباقتان قاشىپ جۇرگەندەر سول ارانى ۇيىرسەكتەيدى. ولاي بولسا, وتانسۇيگىشتىكتى دىنمەن بىرگە جاقسى قاسيەتتەرمەن تاربيەلەۋ ءبىزدىڭ پارىزىمىز. بۇرىن اكەلەرىمىز ء«اي بالام, ەتىڭ وتانعا, سۇيەگىڭ بىزگە» دەپ ايتۋشى ەدى. سول سوزدەر اسەر ەتتى مە ەكەن, بارلىعىمىز دا اسكەرگە بارۋعا ىنتىق بولدىق. قازىر دە كوپ جاس اسكەرگە بارعىسى-اق كەلەدى. ولار دا اسكەري ساپقا تۇرىپ, وتان الدىندا انت بەرگىسى كەلەدى. قازىرگى زامان تالابىنا ساي, ۇلكەن اسكەردىڭ قاجەتى جوق دەپ جاتىرمىز. ونىڭ ورنىنا كاسىبي ءارى زاماناۋي قارۋ-جاراقتارمەن قارۋلانعان ۇتقىر دا جەدەل قيمىلدايتىن اسكەر جاساقتاۋدامىز. مەنىڭ پايىمىمشا, جاستاردى بۇرىنعىداي اسكەر سابىنا شاقىرىپ, مىندەتتى تۇردە اەروۇتقىر كۇشتەرى قۇرامىنا الماساق تا, ءار ءتۇرلى ماماندىقتاردا شىڭداساق.
ەڭ الدىمەن, جاستارىمىز وتان الدىندا انت قابىلداپ, ءوز جاۋاپكەرشىلىگىن جاقسى سەزىنەر ەدى. ەكىنشىدەن, ولار وزىنە قاجەتتى ماماندىقتاردى يگەرىپ شىعادى. وكىنىشكە قاراي, ەلىمىزدە جۇرگىزىلىپ جاتقان كوپتەگەن قۇرىلىستا شەتەلدىك جۇمىسشىلار ەڭبەك ەتىپ جاتسا, قازاق جاستارى ماماندىعىنىڭ بولماۋىنا بايلانىستى شەتقاقپاي بولىپ جاتقان جايى بار. قورىتا ايتقاندا, ەلىمىزدىڭ تىنىشتىعىن ساقتاۋ, وركەندەۋىنە قولۇشىن بەرۋ تەك ەلباسىمىزدىڭ مىندەتى ەمەس, ول بارشامىزدىڭ جۇمىلا كىرىسۋىمىزدىڭ ناتيجەسى بولاتىنى انىق. داۋلى جەردە بەرەكە بولمايتىنىن ەسكەرسەك, ءبىر-بىرىمىزگە قولداۋ ءبىلدىرۋ ارقىلى عانا بولاشاعىمىزدى جارقىن ەتە الامىز. وتكەنىمىز بەن بولاشاعىمىزدى جالعايتىن يگى ىستەر ارقايسىمىزدىڭ بويىمىزدان تابىلىپ جاتسا, ونى وتانىمىزدىڭ ءوسىپ-وركەندەۋىنە از بولسا دا قوسقان ۇلەسىمىز دەپ بىلەمىن.
باقىتجان ەرتاەۆ, ءماجىلىس دەپۋتاتى
