كوشپەلىلەر ويىندارى اياقتالدى

كەشە قىرعىزستاننىڭ ىستىقكول وبلىسىندا كوشپەلىلەردىڭ دۇنيەجۇزىلىك II ويىندارى اياقتالدى. مۇندا الەمنىڭ 62 ەلىنەن جينالعان سپورتشىلار سايىستىڭ 22 ءتۇرى بويىنشا 6 كۇن بويى كۇش سىناستى. ويىندار قورىتىندىسىندا 24 التىن, 23 كۇمىس جانە 24 قولا, جالپى سانى 71 مەدالدى قورجىنعا سالعان قىرعىزستان قۇراماسى كوماندالىق ەسەپتە ءبىرىنشى ورىندى جەڭىپ الدى. ەكىنشى ورىنعا 12 التىن, 12 كۇمىس جانە 12 قولا, بارلىعى 36 مەدالى بار قازاقستان كومانداسى ورنالاستى. ءۇشىنشى ورىن 12 التىن, 9 كۇمىس جانە 12 قولا, جالپىسى 33 مەدال جيناعان رەسەي سپورتشىلارىنا بۇيىردى. جالپى, جارىستا 29 ەلدىڭ ساڭلاقتارى جۇلدەلى ورىنداردان كورىندى. بۇل ەسەپ-قيساپقا كەشە كەشتەۋ اياقتالعان 12 مەدال جيىنتىعى بار الىش كۇرەسى كلاسسيكالىق ءتۇرىنىڭ ناتيجەلەرى ەنگەن جوق. ويىندار جابىلار كۇنى قازاق­ستان مەن قىرعىزستان قۇرا­مالارى اراسىندا وتكەن كوكپاردىڭ في­نالدىق شايقاسى بولدى. ول الاڭ يەلەرىنىڭ 15:3 ەسەبىمەن جەڭىسكە جە­تۋىمەن ءتامامدالدى. وسى­لاي­شا قىرعىز جىگىتتەرى قازاق كوك­پارشىلارىنان 2013 جىلى اس­تانادا وتكەن ازيا چەمپيوناتى فينالىنداعى جەڭىلىسىنىڭ قا­رىمتاسىن قايتاردى. كەزدەسۋ بارىسىندا قازاقستاندىق ابدىعالي ءاب­دىجاپپاروۆ جاراقات الىپ قال­دى. ال قولا مەدال وسىنىڭ الدىندا باشقۇرتستان كومانداسىن 8:2 ەتىپ ۇتقان قىتايلىق جىگىتتەردىڭ ەنشىسىندە كەتتى. تۇرىكتىڭ «دجيريت» دەپ اتالاتىن ات ۇستىنەن نايزا اتۋ جارىسىندا بىردەي ۇپاي جيناعان قىرعىزستان مەن تۇركيا كوماندالارى ءبىرىنشى ورىندى ءبولىستى. قىرعىزشا «ەر ەنيشۋ» دەپ اتا­لاتىن ات ۇستىندەگى ايقاستا قازاق­ستاندىقتار سىرىم ءىزباساروۆ (90 كگ) پەن ءبىرجان قوساليەۆ (+90), سونداي-اق قىرعىزستاندىق كالىبەك بۋزۋرمانكۋلۋلۋ (70 كگ) التىن جۇلدە يەگەرى اتاندى. بۇلاردان بولەك, ءبىزدىڭ ەرنازار بايعوناەۆ (70 كگ) كۇمىس مەدالعا قول جەتكىزدى. ەرلەر اراسىنداعى توگۋز كورگوول بىرىنشىلىگىندە العاشقى ەكى ورىن قىرعىزدار قانجىعاسىنا بايلانسا, ءۇشىنشى ورىن قازاقستاندىق نۇربەك قابيەۆكە تيەسىلى بولدى. ال قىزدار اراسىندا قازاقستاندىق اسەل داليەۆا ەشكىمدى بەت قارات­پا­دى. مۇندا ءۇشىنشى ورىندى دا ءبىز­دىڭ سپورتشى ديانا كەنينا الدى. قىرعىزدىڭ «وردو» اتتى اسىق جارىسىندا دا, تۇرىكتىڭ مانگالىندا دا الاڭ يەلەرى ەشكىمگە دەس بەرگەن جوق. سايىستىڭ سوڭعى تۇرىنەن ءبىزدىڭ اسەل داليەۆا قولا مەدال الدى. سول سياقتى ولار ات جارىسىنىڭ بارلىق تۇرىندە, قىرعىز تازىلارى تايعاندار ءباي­گەسىندە الدارىنا جان سالمادى. ال الىش كۇرەسىنىڭ ەركىن تۇرىندە تۇرىكمەنستان سپورتشىلارى ايدىندى كورىندى. ولار 12 التىن مەدالدىڭ 8-ىنە يە بولدى. بۇل ۇلەستە قازاقستاندىقتار ءسابي­را مىرزاعاليەۆا (65 كگ), دي­دار ساتباەۆ (60 كگ) – كۇمىس, مەرەكە قۇدايبەرگەنوۆا (75 كگ), گۇل­نار امان­تاەۆا (+75 كگ), الدوس قۇل­مان­بەتوۆ (90 كگ) قولا مەدالدارعا يە بولدى. سوڭىندا ويىنداردىڭ جابىلۋ سالتاناتى بولىپ ءوتتى. كوشپەلىلەردىڭ دۇنيەجۇزىلىك كەلەسى III ويىندارى 2018 جىلى وسى مەزگىلدە تۇركيانىڭ ىستانبۇل قالاسىندا وتەدى. دامير قوجامقۇل