وڭتۇستىك كورەيانىڭ سەۋل قالاسىندا ءوتىپ جاتقان حالىقارالىق كينوفەستيۆالدە م.اۋەزوۆ اتىنداعى قازاق مەملەكەتتىك اكادەميالىق تەاترىنىڭ اكتەرى ازات سەيتمەتوۆ كينورەجيسسەر اسقار ۇزاباەۆاتىڭ «اكە» تەلەحيكاياسىنداعى اكە ءرولى ءۇشىن قازىلار القاسىنىڭ شەشىمىمەن «جىلدىڭ ۇزدىك اكتەرى» نوميناتسياسىندا جەڭىمپاز اتاندى.
Seoul International Drama Awards – تەلەۆيزيالىق فيلمدەر مەن اكتەرلەردىڭ, سونداي-اق, ءتۇسىرىلىم قىزمەتكەرلەرىنىڭ جىل سايىن وتەتىن بايگەسى. بايقاۋدا قىتاي, اقش, جاپونيا, برازيليا, تۇركيا, ۇلىبريتانيا سياقتى ەلدەرمەن قوسا, الەمنىڭ 50-دەن استام مەملەكەتىنىڭ وكىلدەرى باق سىنادى. «Seoul International Drama Awards» فەستيۆالىندە ءار ەلدىڭ سەريال جانرىنداعى جاھاندىق جانە الەۋمەتتىك ماسەلەلەردى قامتيتىن ۇزدىك جۇمىستارى ساراپقا سالىندى.
سوڭعى بىرنەشە جىلدا «قازاقستان» ۇلتتىق ارناسىنىڭ تاپسىرىسىمەن بىرقاتار تەلەسەريالدار تۇسىرىلگەنى بەلگىلى.
ۇلتتىق تەلەارنا «اكە» سەريالىن 2016 جىلدىڭ كوكتەمىنەن بەرى كورەرمەن نازارىنا ۇسىنىپ كەلەدى.
قاپيادا جىبەرىپ العان قاتەلىكتەرىمەن كۇرەسىپ, بالالارىمەن اراداعى قارىم-قاتىناسىن تۇزەۋگە تىرىسقان اكە تاعدىرىن باياندايتىن بۇل فيلم كينوسىنشىلار مەن تەلەكورەرمەندەردىڭ جوعارى باعاسىنا يە بولدى.
حالىقارالىق كينوفەستيۆالدىڭ ماراپاتتاۋ سالتاناتىندا قازاق اكتەرى ازات سەيتمەتوۆ: «وسى فەستيۆالگە كەلگەنىمە وتە قۋانىشتىمىن! قازاقستان بۇل فەستيۆالگە تۇڭعىش رەت قاتىسىپ وتىر. فەستيۆال ۇيىمداستىرۋشىلارى مەن قازىلار القاسىنىڭ وسى اتالىمدا مەنى تاڭداعانىنا شەكسىز ريزامىن. بۇل – ءبىزدىڭ ءتۇسىرىلىم توبى ءۇشىن ۇلكەن مارتەبە. ەڭبەگىمىزدى باعالاعاندارىڭىز ءۇشىن مىڭ العىس. جۇلدەمدى اكەمە ارنايمىن. قر بايلانىس جانە اقپارات مينيسترلىگى مەن «قازاقستان» تەلەراديوكورپوراتسياسىنا, سەريال اۆتورى جانە رەجيسسەرى اسقار ۇزاباەۆقا العىسىم شەكسىز», – دەدى.
سەيتمەتوۆ ازات رايىمبەك ۇلى – تەاتر جانە كينو اكتەرى. 1964 جىلى 14 قىركۇيەكتە الماتى قالاسىندا اكتەرلەر وتباسىندا دۇنيەگە كەلگەن. 1985 جىلى ت.جۇرگەنوۆ اتىنداعى الماتى تەاتر ۋچيليششەسىن تامامداعان. م.اۋەزوۆ اتىنداعى قازاق مەملەكەتتىك اكادەميالىق تەاترىنىڭ اكتەرى.
جۇلدىزى وڭىنان تۋعان اكتەر بۇعان دەيىن دە «قازاقستان» رترك» اق تاپسىرىسىمەن تۇسىرىلگەن جانە ۇلتتىق ارنادا كورسەتىلگەن «اينالايىن» (2010 جىل), «ۇلجان» (2013 جىل), «شىرعالاڭ» (2015 جىل) تەلەسەريالدارىندا رولدەردى ويناعان.
ايناش ەسالي, الماتى
