اسكەري نىساندار تەكسەرىلگەن كوشپەلى كەڭەس

قورعانىس ءمينيسترى يمانعالي تاسماعامبەتوۆ «سپاسسك» وقۋ-جاتتىعۋ ورتالىعى مەن 68665 اسكەري ءبولىمىن دامىتۋ جونىندە كوشپەلى كەڭەس وتكىزدى. قورعانىس ۆەدومستۆوسىنىڭ باسشىسى «سپاسسك» وقۋ-جاتتىعۋ ورتالىعىنىڭ بارلىق وبەكتىلەرىن تەكسەرىپ, قاراعاندى گارنيزونىنداعى 32356 اسكەري ءبولىمدى دامىتۋ جونىندەگى نەگىزگى باسىمدىقتار مەن جۇمىستىڭ بارلىق كولەمىن بەلگىلەدى. تانك ايلاعى, تاكتيكالىق الاڭ, اسكەري جاراقتاندىرۋ پۋنكتتەرى, باقىلاۋ-وتكىزۋ پۋنكتى, كازارمالار عانا ەمەس, سونىمەن بىرگە, اسكەري قىزمەتشىلەردىڭ تۇرمىسىنا قاجەتتى مونشا, كلۋب عيماراتى, جاتاقحانا, جىلىتۋ قۇبىرلارى مەن ازىق-ت ۇلىك قويماسى سەكىلدى نىساندار اۋقىمدى جوندەۋدەن وتەدى. بۇگىنگى تاڭدا «سپاسسك» قازاقستان قارۋلى كۇشتەرى وقۋ-جاتتىعۋ ورتالىقتارىنىڭ ءبىرى بولىپ تابىلادى. وندا «ايبىن» اسكەري-پاتريوتتىق جاستار جيىنى جانە «التىن ۇكى» حالىقارالىق سايىسى سياقتى رەسپۋبليكالىق جانە حالىقارالىق دەڭگەيدەگى ءىرى اۋقىمدى ءىس-شارالار وتكىزىلەدى. «ءتارتىپ بولعان جاعدايدا عانا ءبىز اتقارىپ جاتقان جۇمىستا ىلگەرىلەۋ بولادى, – دەپ اتاپ ءوتتى ي.تاسماعامبەتوۆ. – بۇل اسكەري جۇيەدەگى شەتكى بۇرىشتى تاس ىسپەتتى. بارلىعى مەرزىمىندە ورىندالاتىن ساپالى جۇمىسقا بايلانىستى. سەبەبى, ونسىز اۋقىمدى جوبالاردى ىسكە اسىرۋ مۇمكىن ەمەس». قورعانىس ءمينيسترى استانا ماڭىڭداعى 68665 اسكەري ءبولىمىنىڭ ينفراقۇرىلىمى دا الداعى ۋاقىتتا جاڭارتىلاتىنىن بەلگىلەدى. مۇندا بارلىق اۋماق جانە اكىمشىلىك-كازارمالىق ايماق نىساندارى اباتتاندىرىلادى. قازىرگى ۋاقىتتا 120 پاتەرلى ەكى تۇرعىن ءۇيدىڭ قۇرىلىسى ءجۇرىپ جاتىر. ودان باسقا, ءبولىم اۋماعىندا پالاتكالى لاگەرگە ارنالعان ايماق قاراستىرىلادى. وندا دالالىق جاتتىعۋلار مەن پراكتيكالىق ساباقتار كەزىندە اسكەري قىزمەتشىلەردى ورنالاستىرۋ جوسپارلانۋدا. ءبىر سوزبەن ايتقاندا, لاگەر قازىرگى زامانعى تالاپتارعا ساي بولادى. الايدا, جاعداي جاۋىنگەرلىككە بارىنشا جاقىنداتىلادى. «ەگەمەن-اقپارات»