ىرگەلى ۇسىنىستىڭ بەرەرى كوپ

ەلباسىمىز نۇرسۇلتان نازارباەۆتىڭ ەڭ دامىعان, ەكونوميكاسى باي «ءۇل­كەن جيىرمالىقتىڭ» باسقو­سۋىنا شاقىرىلۋى, وعان قاتىسۋى – قازاقستاننىڭ حالىقارالىق ارەناداعى ابىرويى بيىك ەكەندىگىن كورسەتەتىن وقيعا. قازاقستان پرەزيدەنتى كوپتەگەن مەملەكەت باسشىلارىمەن, حالىقارالىق ۇيىمداردىڭ باسشىلارىمەن كەزدەسىپ, الەمدە بولىپ جاتقان كوپتەگەن پروبلەمالار توڭىرەگىندە سۇحباتتاستى. ولاردىڭ قاتارىندا اقش, رەسەي, قىتاي, ۇلىبريتانيا, گەرمانيا, كانادا سىندى الەمدىك احۋالعا ىقپال ەتە الاتىن ەلدەردىڭ باسشىلارى بار. ءوزىنىڭ بايانداماسىندا ەلباسى الەمدىك ەكونوميكادا قالىپتاسقان جاعدايعا ساراپتاما جاسادى, بىرقاتار كۇردەلى ماسەلەلەردى شەشۋ جونىندە ۇسىنىستار ايتتى. سەبەبى, قازىرگى تاڭدا دۇنيە ءجۇزىنىڭ ەكونوميكاسىندا بولىپ جاتقان ۇردىستەر, وزگەرىستەر, حالىقارالىق كومپانيالار دۇنيەجۇزىلىك ساۋ­دا ۇيىمىنىڭ پرينتسيپتەرىنە اسەر ەتە الاتىنىن كورسەتىپ وتىر. ەكونوميكالىق ماسەلەلەردى جاھاندىق تۇرعىدا شەشۋدىڭ قاجەتتىگى بايقالادى. ويتكەنى, ءار ەل, ءار ۇيىم وزىنە تارتىپ, بولىنە بەرگەننەن بۇل پروبلەما شەشىلمەيتىنى انىق. قازاقستان پرەزيدەنتى G20 سامميتىندە بىرىگىپ ارەكەت ەتۋ, ەكونوميكالىق پروبلەمالاردى الەم بولىپ بىرىگىپ شەشۋ جونىندە ىرگەلى ۇسىنىس جاسادى. ەگەر ليدەرلەر كەلىسىمگە كەلىپ جاتسا, ۇسىنىستاردى تالقىلاۋعا استانادا قالىپتاسقان G-Global الاڭىن پايدالانۋعا بولاتىنىن جەتكىزدى. مەن ەلباسىنىڭ G20 سامميتىنە بارۋى تاريحتا قالاتىن ەرەكشە ساپار دەپ سانايمىن. جاھاندىق ەكونوميكالىق پروبلەمالاردى شەشۋگە ەلباسىمىز ءوزىنىڭ سۇبەلى ۇلەسىن قوستى دەپ بىلەمىن. كامال بۇرحانوۆ, ساياساتتانۋشى