جۇمىس قايتا جانداناتىن بولادى

گازەتىمىزدىڭ 26 تامىز كۇنگى سانىندا ءبىز وسىنداي تاقىرىپپەن سىن ماقالا جازعان ەدىك. ماقالادا «نۇرلى جول» باعدارلاماسى­مەن سالىنىپ جاتقان استانا ­­– پاۆلودار جولىنىڭ پوگرانيچنيك اۋىلى تۇسىنداعى 25 شاقىرىمدىق ارالىعىنىڭ جۇمىسى توقتاپ قالعانى, جۇمىسشىلاردىڭ ءۇش-ءتورت اي ەڭبەكاقىسىز قالعانى ايتىلدى. «قازاۆتوجول» اق پاۆلودار وبلىس­تىق فيليالىنىڭ باسشىسى ەرسىن ساريەۆ «اۆتودورسەرۆيس فيرماسى» جشس قۇرىل­تايشىلارىنىڭ اراسىنداعى سوت داۋى تۇيىندەلىپ, سوت شەشىمى بويىنشا كوم­پانيا­نىڭ باس ديرەكتورى رەتىندە دەنيس گۋسەۆ بەكىتىلگەنىن حابارلادى. سونىمەن قاتار, باس­تىسى, استانا – پاۆلودار اۆتوجولى قۇرى­لىس­شىلارىنىڭ جالاقىسى بويىنشا قارىز الداعى 5-10 كۇن ىشىندە تولىق وتەلمەك. – ءبىز كومپانيامەن قوسىمشا كەلىسىمشارت جاساستىق. قۇرىلىس فيرماسىنىڭ اتىنا جاڭا شوت اشىلىپ, جاقىندا وعان اتقارىلعان جۇمىستار ءۇشىن تولەنەتىن قاراجات تۇسەتىن بولادى, – دەدى ەرسىن ساريەۆ. ال وبلىس اكىمى بولات باقاۋوۆ اكىمدىك­تەگى جيىن بارىسىندا اۆتوموبيل جولى قۇرىلىسىندا ەڭبەكاقىنىڭ تولەنبەۋىنە بايلانىستى توقتاپ قالعان جۇمىستار قايتا جاندانادى دەپ اتاپ ءوتتى. وبلىس اكىمدىگى دە ماڭىزدى جولدىڭ, ماڭىزدى باعدارلامانىڭ دەر كەزىندە ساپالى ورىندالۋىنا باسا نازار اۋدارۋدا. «قازاۆتوجول» اق وبلىستىق فيليالى قازىرگى كەزدە جەردى وڭدەۋ جۇمىستارىن جۇرگىزۋدە, سۋبمەردىگەر ۇيىمداردىڭ شوتتارىنا قاراجات تۇسكەننەن كەيىن جولعا بەتون جانە اسفالت جابىندىلارىن توسەۋ جۇمىستارى باستالادى. جانە دە قۇرىلىسشىلار بيىل پاۆلودار – استانا اۆتوجولىنىڭ ۇزىندىعى 104 شاقىرىمدى قۇرايتىن ءبىر بولىگىن تاپسىرۋدى جوسپارلاپ وتىرعانى ايتىلدى. فاريدا بىقاي, «ەگەمەن قازاقستان» پاۆلودار