ءبىرى جاقسى باعالانسا, ەكىنشىسى ءسۇرىندى

كەشە ورتالىق سايلاۋ كوميس­سيا­سىندا قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەر­گەن­دى­گىن انىقتاۋ جونىندەگى لينگۆيس­تيكا­لىق كوميسسيانىڭ وتىرىسى بو­لىپ ءوتتى.  بۇل جولى اتالعان كوميس­سيا­نىڭ سىناعىنان ءوتۋ ءۇشىن  پرە­زيدەنتتىكتەن ۇمىتكەرلەر تولىباي باي­­مۋرزين مەن مەلس ەلەۋسىزوۆ كەلدى. تاڭەرتەڭگىسىن ساعات 11:00-دە مەم­لەكەتتىك ءتىلدى قانشالىقتى مەڭ­گەر­گەن­دىگىن كورسەتۋ ءۇشىن تولىباي بايمۋرزين ورتالىق سايلاۋ كوميس­سيا­سىنا كەلگەن بولا­تىن.  پرەزيدەنتتىككە كانديدات  مەم­لەكەتتىك تىلدەن ءسۇ­رىندى. ەمتيحان ناتيجەلەرى بويىنشا لين­گۆيستيكالىق كوميسسيا اشىق داۋىس بەرۋ ارقىلى تولىباي نۇر­دىل­دا­ ۇلىنىڭ جازۋى مەن مانەر­لەپ وقۋى­نا قاناعات­تانباۋشىلىق ءبىلدىرىپ, مەم­لەكەتتىك ءتىلدى مەڭ­گەر­مەگەن دەگەن شەشىم شىعاردى. جانە دە بۇل شە­شىمنىڭ ءبىراۋىز­دان قابىلدانعانىن ايتا كەتۋىمىز كەرەك. قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءجو­­نىندەگى لينگۆيستيكا­لىق كوميس­سيا­نىڭ توراعا­سى م.جول­داسبەكوۆ كان­دي­داتتىڭ «پەرزەنت پارىزى» دەگەن تا­قى­رىپتا شى­عار­ما­سىنىڭ ساۋاتسىز جا­زىل­عاندىعىن جەت­كىزدى. مىسالى, ور­فوگرافيالىق قا­تە­نىڭ سانى 24 بولسا, تىنىس بەلگىلەرىنەن – 23, ال ستيلدىك جاعىنان 5 قاتە ءجى­بەرگەنى انىق­تال­عان. بارلىعىن قوس­­قان كەزىندەگى قاتە سانى 52-گە جەتىپ وتىر­. ەكىنشى كەزەڭ بوي­ىنشا عابيت مۇسىرەپوۆتىڭ شى­عار­ما­لارىنان ءۇزىندى كەلتىرۋ كەرەك بولسا, ونىڭ ءوزىن دە ءماتىندى كىبىرتىكتەپ, سوزبالاپ وقىعان.  ءۇشىن­شى كەزەڭ بويىنشا «باتىرلىق پەن ءسۇيىس­پەن­شىلىك» تاقىرىبىن اشۋ كەرەك بولسا, پرەزيدەنتتىكتەن ۇمىتكەر ونى دا اشا الماعان. لينگۆيستيكالىق كوميسسيا ءتور­اعا­سى مىرزاتاي جولداسبەكوۆ پرە­زيدەنتتىككە كانديداتتىڭ ءسوي­لەم قۇراي الماعاندىعىن اشىق ايتتى. ءسويتىپ, كوميسسيا مۇشەلەرى ت.بايمۋرزين قازاق ءتىلىن مەڭگەرمەگەن دەگەن بايلامعا كەلگەندىكتەرىن جەتكىزدى. پرەزيدەنتتىكتەن تاعى ءبىر ۇمىتكەر مەلس ەلەۋسىزوۆ مەملەكەتتىك تىلدەن ەمتيحان تاپسىرار ال­دىندا ورتالىق سايلاۋ كوميس­سياسى عيماراتىندا بۇقارا­لىق اقپارات قۇرالدارى وكىلدەرىنىڭ ءبىر­قاتار سۇراقتارىنا جاۋاپ بەردى. ءۇمىت­كەر سايلاۋعا تۇسپەس بۇ­رىن الدىمەن جاقسىلاپ ويلانىپ الدىم, دەي كەلىپ, ءوزىنىڭ دوستارى­مەن, تانىستارىمەن اقىل­داسىپ العاندىعىن جەتكىزدى. ەكو­لوگيا­لىق پروبلەمالاردى شەشۋ جو­لىنداعى باعىتىمنان تايماي­مىن, دەگەن مەلس حامزا ۇلى پرەزيدەنتتىك سايلاۋ الاڭىن ءوز ءمۇم­كىندىگىنشە پايدالانۋ قاجەتتىگىن العا تارتتى. باسقالارعا قاراعاندا جاقسى مۇمكىندىگىم بار, دەپ ءما­لىم­دەگەن ول اباي مەن مۇحتار اۋە­زوۆ شىعارمالارىن وقىعاندى­عىمەن دە بولىسە كەتتى. ءتىپتى ءسوم­كەسىنە سالىپ اكەلگەن كىتاپتارىن دا كوپشىلىك نازا­رى­نا ۇسىندى. قازاقستان رەسپۋبليكاسى پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكا­لىق كوميسسيانىڭ سىناعى­نان ءسۇ­رىنبەي ءوتۋى دە وسىنداي ۇلكەن داي­ىندىقتىڭ ارقاسى بولسا كەرەك. جازبا جۇمىسىنىڭ تاقىرىبى «قا­زاق­ستاننىڭ بولاشاعى» دەپ اتالسا, ۇمىتكەر ونى بارىنشا جاقسى اشىپ كورسەتە بىلگەن. ءۇش بەتتىك جازبا جۇمىسىنان 7 قاتە انىقتالسا, سونىڭ 2-ءى ورفو­گرا­فيالىق جانە 4-ءى تىنىس بەلگىلەرىنە قاتىستى بولعان. لينگۆيس­تي­كالىق كوميسسيا ءتور­اعاسى مىر­زاتاي جولداسبەكوۆ ءۇمىت­كەردىڭ ويى ورنىقتى, جۇمىسى تولىق اياقتالعان دەگەن پىكىرىن ءبىلدىردى. ەكىنشى تاپسىرما بويىنشا تۋ­عانىنا 80 جىل تولۋى تويلانىپ جاتقان  اقيىق اقىن مۇقاعالي ماقاتاەۆتىڭ  ولەڭىن وقىعان ەلەۋسىزوۆ ءوزىن وسى ورايدا دا جاقسى قىرىنان كورسەتە ءبىلىپتى. ءۇشىنشى سىناق بويىنشا «جەر تاعدىرى – ەل تاعدىرى» دەگەن تاقىرىپتى دا شەبەر ورىنداپ شىعىپتى. وسى­لايشا قازاقستان رەسپۋبليكاسى پرەزيدەنتتىگىنەن ۇمىتكەر مەلس ەلەۋسىزوۆتىڭ مەملەكەتتىك ءتىلدى مەڭگەرۋى بارىسىن سىننان ءوت­كىزگەن لينگۆيستيكالىق كوميسسيا وعان قازاق ءتىلىن ەركىن مەڭگەرگەن دەگەن شەشىم شىعاردى. قورى­تىندى شەشىمدى جاريالاي كەلە لينگۆيستي­كالىق كوميسسيا ءتور­اعا­سى م.جولداسبەكوۆ ۇمىتكەر­دىڭ اتىنا ءبىراز جىلى سوزدەر ايتىپ, ونىڭ دايىن­دىعىنا جوعارى با­عا­سىن بەردى. اسقار تۇراپباي ۇلى.