تاۋ شاتقالىندا – «توي قازان»

دەمالىس كۇنى بيىك تاۋداعى «مەدەۋ» سپورت كەشەنىندە ۇلتتىق تاعامدار فەستيۆالى ءوتتى بيىلعى حالىقتىق بۇل شارا الماتى قالاسىنىڭ 1000 جىل­دىعىنا ورايلاستىرىپ ۇيىمداستىرىلدى. شاھاردا 2 مىڭنان استام ءدامحانا مەن مەيرامحانا بار بولسا,  سولاردىڭ ىشىنەن ەڭ تاڭداۋلىلارى مەن ۇزدىكتەرى الدىڭعى لەككە وزا شىعىپ, «توي قازان» فەستيۆالىنىڭ قوناقتارىنا ءدام دايىنداپ ۇسىندى. «توي دەگەندە قۋ باس دومالايدى...» دەگەندەي, ايگىلى شاتقالدىڭ قويناۋىن ءاپ-ساتتە ءان مەن كۇي تەربەدى. تازا اۋا, سالقىن سامال, جۇپارى اڭقىعان كوكتىڭ حوش ءيىسى ءتىل ۇيىرگەن ءدامدى تاعامداردىڭ تاناۋ قۋىرعان يىسىمەن ارالاسىپ, كەلۋشىلەردىڭ كوڭىل-حوشىن كوتەردى. – ءبىزدىڭ قازاق حالقى قاشاندا قوناقجايلىلىعىمەن ەرەكشەلەنگەن. بۇگىنگى «توي قازان» فەستيۆالى –  ۇلتتىق قاسيەتتەرىمىزدىڭ ايناسى دەسەم ارتىق ايتقاندىق ەمەس. سول سەبەپتى دە بۇل دۋمان ءدال بۇگىن – بىرلىك پەن دوستىقتىڭ, كەلىسىم مەن كەڭەسۋدىڭ مەرەكەسىنە اينالىپ وتىر, – دەپ ءسوز باستاعان قالا اكىمى باۋىرجان بايبەك مادەني شارانىڭ تۇساۋىن كەسىپ بەردى. قالا باسشىلىعىنىڭ باستاماسىن قولداعان قازاقستان حالقى اسسامبلەياسىنىڭ مۇشەلەرى دە توي ۇستىندە ايانىپ قالعان جوق. بويعا جيعان, تويعا دايىنداعان بار ونەرىن قىزىنىپ ورتاعا سالدى. قىزىل-جاسىلدى ۇلتتىق كيىمدەرىن كيىپ ءان سالعان, بي بيلەگەن, ءدامدى تاماق پىسىرگەن, ۇلتىق سپورت ويىندارىن بىرىنەن سوڭ ءبىرىن ءتىزىپ كورسەتكەن دۋماندى توپتىڭ كوش باسىندا قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ ءجۇردى. سونداي-اق, قالىڭ توپتىڭ ورتاسىندا دۋماندى توپپەن جارقىلداي پىكىر الىسىپ جۇرگەن تالدىقورعان قالاسىنىڭ اكىمى باعدات قاراساەۆتى دا كوزىمىز شالدى. كوپ كەشىكپەي الماتىعا اتى تانىمال ايگىلى «باۋىرساق شوۋدىڭ» بەلگىلى بي-قازىلار القاسى ەڭ ءدامدى پىسىرىلگەن تاماق تۇرلەرىنە باعا بەردى. مازمۇنى جاعىنان كوپ قىرلى سانالاتىن فەستيۆالدا ءدامدى تاعام پىسىرۋمەن قاتار وزگە دە سان ءتۇرلى شارالار كورسەتىلدى. ونىڭ ايعاعى رەتىندە سپورت الاڭىنىڭ ءبىر بۇرىشىندا ەڭ ۇزدىك  «ۇلتتىق كيىمدەرگە» جۇلدەلەر تاپسىرىلىپ جاتسا, ءبىر بۇرىشىندا ۇلتتىق-سپورتتىق جارىستاردان باسەكە قىزدى. الايدا, فەستيۆالدىڭ شىرايىن اشقان «توي قازان داۋىسى»  ءان بايقاۋى ەكەنىندە ەشكىمنىڭ داۋى بولمادى. بايقاۋدا 11 ۇلتتىڭ «جۇل­دىز­دارى» ونەرىن ورتاعا سالدى. جەڭىمپازدارعا ارنايى جۇلدە تاپسىرىلدى. جينالعان قاۋىم قازىرگى قازاق ونەرىنىڭ اقماڭداي انشىلەرى مەن بەلگىلى مۋزىكا توپتارىنىڭ ونەرىن دە دۇركىن-دۇركىن قول شاپالاقتاپ تاماشالادى. تاڭداۋلى وپەرا انشىلەرى مايرا مۇحامەدقىزى, سۇندەت باي­عو­جين, اتاقتى «دوس-مۇقاسان», «مۋز­ارت», «دەرۆيشي», «رينگو» توبى مەن مە­دەۋ ارىنباەۆ, سەيفۋللين جول­بارىس, جەڭىس سەيدوللا ۇلى, گۇلنار تولەگەنوۆا, گاۋھار ساتتاروۆا, سكريپكاشىلار ءجاميلا سەركەباەۆا مەن ايدا ايۋپوۆا تاۋ شاتقالىن اسەم ءان مەن ادەمى سازعا بولەدى. ايتپاقشى, «كىتاپفەست» بۇرى­شىنا مويىن بۇرعاندار دا وتە كوپ بولدى. ايتۋعا مىندەتتىمىز, حالىق ماسايراعان مۇنداي قىزىقتى توي-دۋمانعا كىرۋ بيلەتىنىڭ باعاسى 3 مىڭ تەڭگە تۇردى. ال ون جاسقا دەيىنگى بالالار فەستيۆالعا تەگىن كىردى. ...تاۋ شاتقالىنداعى توي-دۋمان اسپاندا جۇلدىز جامىراعان ۋاقىتتا تارادى. تالعات ءسۇيىنباي, «ەگەمەن قازاقستان» الماتى سۋرەتتى تۇسىرگەن نيكولاي سۋداكوۆ