جەتىارالداعى جاڭا مەكتەپ

«نۇرلى جول» باعدارلاماسى اياسىندا پايدالانۋعا بەرىلدى بارقىتبەل باۋىرىنداعى جەتىارال اۋىلىنىڭ وقۋشىلارى جاڭا وقۋ جىلىن جاڭا مەكتەپتە باستادى. اپاتتى جاعدايداعى مەكتەپتى الماستىرعان اتالعان نىسان «نۇرلى جول» باعدارلاماسى اياسىندا سالىندى. 300 ورىندىق جاڭا عيماراتتىڭ سپورت زالى مەن اسحاناسى بار, سىنىپ بولمەلەرى مەن دالىزدەرى كەڭ ءارى جارىق. جاڭا ءبىلىم ورداسىنىڭ اۋلاسىندا سوعىلعان العاشقى قوڭىراۋ ءۇنى اۋىل تۇرعىندارىن قۋانىشقا بولەدى. عيماراتتىڭ اشىلۋ سالتاناتىندا سويلەگەن ەل ازاماتتارىنىڭ اق تىلەگىنەن سوڭ مەكتەپ ديرەكتورى باقىت الداۋىشوۆقا جاڭا عيماراتتىڭ كىلتى تابىس ەتىلدى. ايتا كەتكەن ابزال, بۇل نىساننىڭ قۇرىلىسى بەلگىلەنگەن مەرزىمىنەن ءۇش اي بۇرىن پايدالانۋعا بەرىلىپ وتىر. اتا-انالار مەكتەپتى مەر­زىمىندە جانە ساپالى سالىپ بەرگەن مەردىگەر مەكەمەنىڭ جەتەكشىسى, جەرگىلىكتى كاسىپكەر قايرات قوجاح­مەتوۆكە ايرىقشا العىس ايتتى. – «سەن قانداي باقىتتى ەدىڭ, كەلەر ۇرپاق» دەگەن اقىن ولەڭى وسىندايدا ەسكە تۇسەدى. جەتىارالعا از جىلدىڭ ىشىندە كوپ وزگەرىستەر ەندى. جەتپىسىنشى جىلدارى سالىنعان بۇرىنعى مەكتەپ 1991 جىلعى ءزىلزالادان كەيىن كوميسسيا شەشىمى بويىنشا اپاتتىق جاعدايدا دەپ تانىلعان بولاتىن. بالالار سودان بەرى ەسكى مەكتەپتە وقىپ كەلدى. ەندى الىستاعى ەلدى مەكەندە قالانىڭ وزىندە كەزدەسە بەرمەيتىن بارلىق مۇمكىندىگى بار ءبىلىم شاڭىراعى سالىندى, – دەدى اۋىلداستارىنىڭ ورتاق قۋانىشىن جەتكىزگەن ەڭبەك ارداگەرى باي­مۇحامبەت نۇرسادىقوۆ. جەتىارالدىق ۇستازدار مەن وقۋشىلاردى زاماناۋي ءبىلىم ورداسىنىڭ اشىلۋىمەن قۇت­تىق­تاعان اۋدان اكىمى دىلدابەك ورازباەۆ ساۋلەتتى مەكتەپكە كىرگەن بالالاردىڭ بولاشاقتا ۇلكەن بيىكتەردەن كورىنۋىن قالايتىنىن ايتىپ, جاقسى ءبىلىم الۋلارىنا تىلەكتەستىگىن ءبىلدىردى. اۋىلدىق وكرۋگ ورتالىعىندا بوي كوتەرگەن قوس قاباتتى ءبىلىم ورداسى لينگافون, ينتەراكتيۆتى تاقتا جانە تاعى باسقا قاجەتتى ماتەريالدىق قۇندىلىقتارمەن قامتاماسىز ەتىلگەن. سىنىپ بولمەلەرىنە قويىلعان كومپيۋتەرلەر مەن جيھازداردىڭ بارلىعى جاپ-جاڭا. سونداي-اق, پارتالاردىڭ بارلىعىنا قول جۋاتىن سانيتارلىق توراپتار تارتىلعان. دۋمان اناش, «ەگەمەن قازاقستان» شىعىس قازاقستان وبلىسى, تارباعاتاي اۋدانى