الماتى اتلەتتەرىن اسقاقتاتتى

الماتىدا وليمپيادانىڭ التىن مەدالىن يەلەنگەن جۇزگىش دميتري بالاندين مەن قولا جۇلدەسىن جەڭىپ العان داريعا شاكىموۆاعا لايىقتى سىي-سياپات كورسەتىلدى. جينالعان قاۋىم قازاقستان تاريحىندا سۋ سپورتى تۇرلەرىنەن ءبىرىنشى بولىپ وليمپيالىق ويىندا جەڭىسكە جەتكەن ديما مەن ەكى مارتە وليمپيادا چەمپيونى, امەريكالىق كلارەسسا شيلدسپەن قايمىقپاي شايقاسقان داريعاعا ەرەكشە قۇرمەت كورسەتىپ, قول سوقتى. ۇكىمەتتىڭ ارناي شەشىمى بويىن­شا وليمپيادادا ءبىرىنشى بولعان سپورتشىعا 250 مىڭ دوللارلىق سىياقىدان تىس 3 بولمەلى, ءۇشىنشى ورىن العان سپورتشىعا 50 مىڭ دوللاردان بولەك ءبىر بولمەلى پاتەر بەرىلۋگە ءتيىس. وڭتۇستىك استانادا سول شەشىمگە ساي تالاپتار جۇزەگە استى. سالتانات ۇستىندە ءسوز سويلەگەن قالا اكىمى باۋىرجان بايبەك: – قۇرمەتتى سپورتشىلار, سىزدەر قازاقستان تاۋەلسىزدىگىنىڭ 25 جىلدىعىنا تۇسپا-تۇس كەلگەن ريو وليمپياداسىندا ەل نامىسىن قورعاپ, ەلىمىزدىڭ كوك تۋىن كوككە كوتەردىڭىزدەر,– دەدى. – الماتىلىقتار جانە بارشا قازاقستاندىق جانكۇيەرلەر ءدۇبىرلى كۇندەرى سىزدەرگە ءار ءسات قولداۋ كورسەتتى. اۋەجايدا زور قۋانىشپەن قارسى الدى. سۋدا ءجۇزۋشى ديما  مەن بوكس­شى داريعانىڭ باپكەرلەرى دە قالا اكىمدىگىندە وتكەن سالتاناتتان قۇر قول قايتپادى. باۋىرجان بايبەك ولارعا 3 ملن جانە 2 ملن تەڭگە كولەمىندە سىياقى تاپسىردى. قالا اكىمدىگىنىڭ الدىندا قى­زىل لەنتا بايلانعان  جول تال­عامايتىن قوس كولىكتىڭ كىلتى – دمي­تري بالاندين («تويوتا لاند كرۋزەر-200») مەن داريعا ءشا­كىموۆاعا («تويوتا لاند كرۋزەر پرادو-150») جينالعان قاۋىمنىڭ دۋ قول شاپالاعىنىڭ استىندا بەرىلدى. ءوز كەزەگىندە ءسوز العان داريعا  مەن ديما ەلباسى نۇرسۇلتان نازارباەۆقا, قولداۋ كورسەتكەن بارشا قازاقستاندىق جانكۇيەرگە جانە بۇگىنگى كورسەتىلگەن سىي-سياپات ءۇشىن شىن جۇرەكتەن العىس ايتتى. تالعات ءسۇيىنباي, «ەگەمەن قازاقستان» الماتى