مۇباراكتىڭ جاقتاستارى تۇتقىندالۋدا

ەگيپەتتە كوررۋپتسياعا قاتىسى بار دەگەن كۇدىكپەن بۇرىنعى ءۇش مينيستر مەن ميللياردەر تۇتقىندالدى. ەكس-پرەزيدەنت حوسني مۇباراك اكىمشىلىگىنىڭ شەنەۋنىكتەرى مەن ءىرى بيزنەسمەن بەيسەنبى كۇنى ەگيپەت پروكۋراتۋراسىنىڭ نۇس­قاۋى بويىنشا ۇستالدى. وسىلايشا, بۇرىنعى ىشكى ىستەر ءمينيسترى حابيب ءال ادلي, بۇرىنعى تۋريزم ءمينيسترى زۋحاير گارانا, بۇرىنعى تۇرعىن ءۇي ءمينيسترى احمەد ءال ماگرابي جانە بولات قۇيۋ سالاسىنىڭ ماگناتى احمەد ەزز قاماۋعا الىنىپ وتىر. ولارعا مەملەكەت قارجىلارىن جىمقىردى جانە قىزمەت بابىن جەكە باس­تارىنا پايدالاندى دەگەن ايىپتار تاعىلعان. سونىمەن بىرگە ەلدەگى توڭكەرىس ءالى اياقتالا قويعان جوق. جۇما كۇنى ەكس-پرەزيدەنتتىڭ قارسىلاستارى تاحرير الاڭىندا مۇباراكتىڭ وتستاۆكاعا كەتۋىنە ءبىر اپتا تولۋىن تويلاماقشى. قازا بولعاندار سانى 25-كە جەتكەن ليۆيادا ەرەۋىلشىلەردىڭ قۇقىق قورعاۋ ور­گاندارى قىز­مەتكەرلەرىمەن قاقتىعىسۋى سال­دارىنان 24 ادام قازا تاپتى دەپ حا­بارلايدى «رەيتەر» اگەنتتىگى. ليۆياداعى ۇكىمەتكە قارسى ەرەۋىلدەر 15 اقپان كۇنى باستالىپ, ەلدىڭ بەنگازي, ەل-بايدا, تريپولي سياقتى قالالارىندا وتكەن بولاتىن. كوپ ۇزاماي بەن­گازيدەگى تارتىپسىزدىكتەردەن سوڭ ەل باسشىسى مۋاممار كاددافيدى قولداعان مارش بولىپ ءوتتى. ءدال وسى سياقتى مارشتار مەملەكەت باسشىسى تۋعان تريپولي مەن سيرتە قالالارىندا ۇيىم­داس­تىرىلدى. الەمدەگى ەڭ ءىرى مۇناي ەكسپورتتاۋشى بولىپ تابىلاتىن ليۆياداعى ەرەۋىلدەر وسى وڭىردەگى بىرقاتار ەلدەردى قامتىعان ۇكىمەتكە قارسى مانيفەس­تاتسيا­لاردان كەيىن باستالىپ وتىر. پارسى شىعاناعى ەلدەرى باحرەينگە شەت ەلدەردىڭ قول سۇعۋىنا قارسى پارسى شىعاناعىنداعى مۇناي ءوندىرۋشى مونارحيالاردىڭ سىرتقى ساياسات ۆەدومستۆولارى بۇگىندە ۇكىمەتكە قارسى اكتسيالار ءوتىپ جاتقان باحرەين بيلىگىنە تولىق قولداۋ كور­سەتەتىندەرىن مالىمدەدى. مانامادا وتكەن پارسى شىعاناعىنداعى اراب مەملەكەتتەرى قىزمەتتەستىگى كەڭەسىنىڭ توتەنشە سەسسياسىندا ۇيىمعا مۇشە ەلدەردىڭ سىرتقى ىستەر مينيسترلەرىنىڭ باسشىلارى ۇيىمنىڭ قان­داي دا ءبىر مۇشەسىنە قاتەر توندىرەتىن كەز كەلگەن قاۋىپكە ءبارىنىڭ بىرلەسىپ قارسى تۇراتىندىقتارىن مالىمدەدى. ايتا كەتۋ كەرەك, اتالعان ۇيىمعا باحرەيننىڭ سىرتىندا ساۋد ارابياسى, بىرىككەن اراب امىرلىكتەرى, كۋۆەيت, كاتار جانە ومان مەملەكەتتەرى مۇشە بولىپ تابىلادى. سونداي-اق ولار باحرەين ىسىنە شەت ەل مەملەكەتتەرىنىڭ قول سۇعۋىنا دا قارسىلىق بىلدىرۋدە. ۇيىم مۇشەلەرى ونداي ارەكەتتى پارسى شىعاناعىنداعى بۇكىل اراب ەلدەرىنىڭ قاۋىپسىزدىگى مەن تۇراقتىلىعىنا نۇقسان كەلتىرۋ رەتىندە باعالاپ وتىر. «وكىمەتسىزدىكتىڭ» ۇزاقتىعى بويىنشا رەكورد بەلگيانىڭ ساياسي «وكىمەتسىزدىكتىڭ» ۇزاقتىعى جاعىنان الەمدىك رەكورد جاساۋىنا وراي وسى ەلدىڭ گەنت قالاسىندا وتكەن حالىقتىق مەرەكەگە 10 مىڭعا جۋىق ادام قاتىستى, دەپ حابارلايدى رەسەيلىك «نوۆوستي» اقپارات اگەنتتىگى. بەلگيادا كەزەكتەن تىس پارلامەنت سايلاۋى ءوتىپ, ونىڭ قورىتىندىسى بويىنشا جاڭا مينيسترلەر كابينەتى جاساقتالۋعا ءتيىس بولعانىنا 17 اقپاندا 249 كۇن تولسا دا, جاڭا كابينەت ءالى جاساقتالعان جوق. وسىلايشا بەلگيا ساياسي داعدارىستىڭ ۇزاققا سوزىلۋى جاعىنان تەك ەۋروپادا عانا ەمەس, بۇكىل دۇنيە ءجۇزى بويىنشا «چەمپيون» اتانىپ وتىر. فرانتسۋز تىلىندە جانە نيدەرلاند تىلىندە سويلەيتىن پارتيالار اراسىندا مەملەكەتتىك رەفورمالار جۇرگىزۋ ىسىنە قاتىستى تۋىنداعىن الاۋىزدىق ۇكىمەتتىك كواليتسيا قۇرۋ جونىندەگى كەلىسسوزدەردە شەشىلمەيتىن تۇيىنگە اينالىپ وتىر. پلاگياتقا قولداۋ كورسەتۋ نيەتىندە گەرمانيا كانتسلەرى انگەلا مەركەل كانديداتتىق ديس­سەرتاتسيانى كوشىرىپ الدى دەگەن ايىپ تاعىلعانىنا قارا­ماستان, قورعانىس ءمينيسترى كارل-تەودور تسۋ گۋتتەنبەرگكە ءوزىنىڭ قولداۋ كورسەتەتىنى جونىندە ۋادە بەردى, دەپ حابارلايدى «نوۆوستي» اقپارات اگەنتتىگى. كانتسلەر ءوزىنىڭ قولداۋ كورسەتەتىنىن مينيسترمەن بولعان كەزدەسۋ كەزىندە حابارلاعان. بىراق ول ءۇشىن مينيستر اشىق مالىمدەمە جاساپ, وزگەنىڭ ماتەريالىنىڭ بۇتىندەي ءبىر ابزاتستارىنىڭ سىلتەمە جاسالماستان قالايشا ونىڭ ديسسەرتاتسياسىنا تاپ بولعانىن ءتۇ­سىن­دىرىپ بەرۋى كەرەك. وسى ماسەلەگە بايلانىستى بۇقارالىق اق­پارات قۇرالدارى كوتەرگەن داۋدىڭ ءورشىپ تۇرعانىنا دا ءۇش كۇن بولدى. ءمينيستردىڭ ءوزى بولسا, تاعىلعان ايىپتار جونىندە «ءتۇ­سىنىكسىز» دەگەننەن وزگە ەشتەڭە ايتا الماي وتىر. قىرعىزدار شىڭعا ءپۋتيننىڭ ەسىمىن بەرمەك رەسەي پرەمەرى ۆلاديمير پۋتينگە تاۋلى شىڭنىڭ ءبىرىنىڭ اتىن بەرمەك بولعان قىرعىز وكىمەتى ءىستى اياعىنا دەيىن جەتكىزۋگە بەل شەشىپ وتىر. 17 اقپان كۇنى ءتيىستى زاڭ جوباسى پارلامەنتتە قابىلدانىپ, ۇكىمەت ونى بەكىتىپ تە جىبەردى. دەپۋتاتتار زاڭ جوباسىن تال­قىلاۋسىز-اق قابىلداعان كورىنەدى. بىراق قانشا ادامنىڭ قولداپ داۋىس بەرگەنى ناقتى حابارلانعان جوق. قىرعىزستانداعى ءبىر شىڭدى ءپۋتيننىڭ ەسىمىمەن اتاۋ تۋرالى اڭگىمەنىڭ بار ەكەندىگى وسىدان ەكى ايداي بۇرىن ءمالىم بولعان. يدەيانىڭ كەڭ تاراپ كەتكەنى سونداي, ودان باس تارتۋ ەندىگى جەردە رەسەي باسشىلىعىن سىي­لاماعاندىق رەتىندە باعالانۋى مۇمكىن. سونىمەن بىرگە, ۇكىمەت بەكىتكەن قۇجاتتىڭ ەل زاڭىنا سايكەس كەلمەيتىنى دە بەلگىلى بولىپ وتىر. ول بويىنشا گەوگرافيالىق نىساندارعا تەك قايتىس بولعان ادامداردىڭ عانا ەسىمدەرى بەرىلەدى ەكەن. ارالدارعا ۇشاق ۇستىنەن كوز سالماق جاپونيا ۇكىمەتىنىڭ باس حاتشىسى حوكايدو ارالىنا باراتىن ەكى كۇندىك ساپارى كەزىندە كۋريل ارالدارىن اسپاننان ءبىر قاراپ وتپەك نيەتتە. توكيونىڭ پىكىرىنشە, داۋلى اۋماق بولىپ سانالاتىن ارالدارعا جاپون شەنەۋنىگىنىڭ بارۋى رەسەي باسشىسىنىڭ وسىنىڭ الدىندا جاساعان ساپارىنا جاۋاپ رەتىندە بولماق. ساپار بارىسىندا جاپونيا مينيسترلەر كابينەتىنىڭ باس حاتشىسى يۋكيو ەدانونىڭ كۋريل ارالدارى تىزبەگىنىڭ وڭتۇستىك بولىگىنىڭ تۇرعىندارىمەن اڭگىمە وتكىزبەك تە ويى بار كورىنەدى. سولتۇستىك اۋماقتار ماسەلەسى, ول تەك وسى ارالداردىڭ بۇرىنعى تۇرعىندارىنىڭ عانا پرو­بلەماسى ەمەس, سونىمەن قاتار, ول بۇكىل جاپون حالقىنىڭ پرو­بلەماسى, سوندىقتان مەن جاپون جۇرتشىلىعىنىڭ وسى ماسەلەنى ءتۇسىنۋ دەڭگەيىن ارتتىرا تۇسكىم كەلەدى, دەپ مالىمدەگەن ەدانو توكيودا وتكەن ءباسپاسوز ءماسليحاتى بارىسىندا. ينتەرنەت ماتەريالدارى بويىنشا ازىرلەندى.