ەلباسى: زاڭدار حالىققا تۇسىنىكتى بولۋى كەرەك

مەملەكەت باسشىسى نۇرسۇلتان نازارباەۆ التىنشى سايلانعان قر پارلامەنتىنىڭ ەكىنشى سەسسياسىن اشىپ, ەلدىڭ زاڭ شىعارۋشى ورگانى الدىندا تۇرعان بىرقاتار مىندەتتەر مەن شارالارعا توقتالدى. «بىرىنشىدەن, قازاقستان تاۋەلسىزدىكتىڭ 25 جىلدىق مەرەيتويىن قارسى الۋعا دايىندالىپ جاتىر. بۇل – جىلدىڭ باستى وقيعاسى, بۇل – توي تويلايتىن عانا كەزەڭ ەمەس, حالىققا ەلدىڭ جەتىستىكتەرىن تولىق تۇسىندىرەتىن كەزەڭ. شيرەك عاسىر ىشىندە ءجۇز جىلعا تاتيتىن قىرۋار شارالار اتقارىلدى. مەنىڭ ويىمشا, حالىققا ايتارىمىز دا از ەمەس. وسى مەرەيتويعا ارنالعان شارالار قازىردەن باستالۋى ءتيىس. ال ول مەرەيتويدىڭ ءوزى قورىتىندى جاسايتىن شاق بولۋى كەرەك. ءاربىر قازاقستاندىق, ءاربىر اۋىل تۇرعىنى ەلدەگى يگىلىكتى سەزىنىپ, بولاشاق باعداردى ءتۇسىنۋى كەرەك», - دەدى ەلباسى. سونىمەن قاتار, ەلباسى قازاقستاندا جاڭعىرۋدىڭ جاڭا كەزەڭى جۇرگىزىلىپ جاتقانىن ەسكە سالا كەلە, پارلامەنتكە ۇكىمەتپەن سىندارلى جۇمىستى جالعاستىرۋدى تاپسىردى. «جاڭا زاڭداردى ازىرلەۋ مەن قابىلداۋعا قاتىستى بارلىق ماسەلەلەر بويىنشا ۇكىمەتپەن تىعىز, ورنىقتى جۇمىس جاساۋ قاجەت. بۇل رەتتە زاڭدى ازىرلەۋدە ءبىرىنشى كەزەكتە ونى حالىققا تۇسىندىرۋگە ءتيىسپىز. ەشكىمگە دە تۇسىنىكسىز جاڭالىقتار ەنگىزۋدەن قاشۋ كەرەك», –  دەدى مەملكەت باسشىسى. پرەزيدەنت اتاپ وتكەندەي, ءماجىلىس پەن سەنات دەپۋتاتتارىنىڭ حالىققا قولجەتىمدى تۇردە زاڭدى تۇسىندىرۋدەگى ءرولىن كۇشەيتكەن ماڭىزدى. كەز كەلگەن زاڭ حالىق ءۇشىن اسا ماڭىزدى ءبىر ماسەلەنى شەشۋگە نەگىزدەلەدى. سونداي-اق نۇرسۇلتان نازارباەۆ قازاقستاندىقتاردىڭ ءومىر ءسۇرۋ دەڭگەيىنىڭ تومەندەۋىنە جول بەرمەۋدى تاپسىردى. مەملەكەت تاراپىنان كەپىلدەندىرىلگەن الەۋمەتتىك پاكەتكە شىعىستار كولەمىن ساقتاۋدى زاڭنامالىق تۇرعىدا قامتاماسىز ەتۋ كەرەك ەكەنىن قاداپ ايتتى. «بۇل رەتتە بارىنەن بۇرىن زەينەتاقى, جاردەماقىلارعا, شاكىرتاقىلارعا جانە ادامدار ءۇشىن باسقا دا الەۋمەتتىك تولەمدەرگە قاتىستى بولىپ وتىر. قازاقستاندىقتاردىڭ ءومىر ءسۇرۋ دەڭگەيىنىڭ تومەندەۋىنە جول بەرمەۋ ءۇشىن  بيۋدجەتتىك ساياساتتى ءتيىستى دارەجەدە باعدارلاۋ قاجەت», – دەدى ەلباسى دەپۋتاتتاردىڭ الدىندا سويلەگەن سوزىندە.