مەرزىمى مەجەلەنبەگەن نىسان

پالاتا وتىرىستارىندا ءوڭىر­لەردەگى كوپتەگەن ماسەلەلەر دەپۋتاتتار ساۋالدارىنا ارقاۋ بو­لىپ جاتادى. ونىڭ باستى سەبەبى – جەرگىلىكتى جەردىڭ بيۋدجەتىندە قارجىنىڭ تاپشى بولۋى. حا­لىق قالاۋلىلارىنىڭ ءوڭىر­لىك ماسەلەلەردى كولدەنەڭ تار­تىپ جاتاتىنى دا سوندىقتان. تومەن­دەگى دەپۋتاتتىق ساۋالعا قارا­عان­دى قالاسىندا كونتسەرت زا­لىن سالۋ ماسەلەسى ارقاۋ بولعان ەدى. ءماجىلىس دەپۋتاتى داۋىلباي قۇسايىنوۆ باستاعان ءبىر توپ دەپۋتات پرەمەر-مينيستر ك.ءماسى­موۆ­تىڭ اتىنا جولداعان ساۋا­لىن­دا قاراعاندى قالاسىندا دوستىق زالى بار 1500 ورىندىق كونتسەرت زالىن سالۋ قاجەتتىگىنە نازار اۋدارتادى. اتالعان عيماراتتىڭ قاجەتتىلىگى ەتنوستاردىڭ ادەت-عۇ­رىپتارىن, داستۇرلەرى مەن مادە­نيەتىن جاڭعىرتۋعا مۇمكىندىك بەرەرىمەن تۇسىندىرىلەدى. قازىرگى تاڭدا مۇندا 70-تەن استام ەتنو­مادەني بىرلەستىكتەر جۇمىس ىستەيتىنى بەلگىلى. ولار وزدەرىنىڭ ۇلت­تىق مادەنيەتى مەن انا ءتىلىن دامىتۋدا. سونداي-اق جارتى ميلليون تۇرعىنى بار وبلىس ور­تا­لىعىندا الەمدىك دارەجەدەگى ءما­دەنيەت پەن ونەر قايراتكەرلەرىنىڭ قاتىسۋىمەن اۋقىمدى شارالار وتكىزەتىن كونتسەرت زالىنىڭ ۋاقىت تالابىنا ساي قاجەتتىلىككە اي­نالعانى انىق. اتالعان نىسان قۇرىلىسىنىڭ تەحنيكالىق-ەكونوميكالىق نەگىزدەمەسى ايقىندالىپ, جوبا-سمەتالىق قۇجاتتارى جاسالعانى دا بەلگىلى بولىپ وتىر. سونىمەن قاتار, سانيتارلىق-ەپيدەميولو­گيا­لىق, ەكولوگيالىق جانە مەملەكەتتىك ءورت باقىلاۋ مەكەمەلە­رىنىڭ ءتيىستى قورىتىندىلارى دا الىنعان. ءتىپتى, قۇرىلىسقا قا­جەت­تى جەر ۋچاسكەسى مەن ينجەنەر­ل­ىك-كارىزدىك جۇيەلەرى دە دايىن كورىنەدى. جوبا-سمەتالىق قۇجات­تار­عا جاسالعان مەملەكەتتىك ساراپتاما قورىتىندىسى بويىنشا جوبا قۇنى 4 ميلليارد 342 ميلليون تەڭگەگە باعالانىپتى. وتكەن جىلدىڭ 10 قاڭتارىندا پرەمەر-مينيستر كارىم ءماسىموۆتىڭ قا­راعاندى وبلىسىنا جاساعان جۇ­مىس ساپارى بارىسىندا دا اتال­عان ماسەلە كوتەرىلگەن كورىنەدى. كارىم قاجىمقان ۇلى بەرگەن تاپ­سىرمالارىنىڭ ىشىندە سول نى­ساننىڭ قۇرىلىسى دا تىلگە تيەك ەتىلگەن. بارلىق قۇجاتتارى تولىق جيناقتالىپ, ءتيىستى شەشىمىن كۇ­تىپ وتىرعان عيمارات قوماقتى قارجىنى قاجەت ەتەتىندىكتەن, ونى تابۋدىڭ بىردەن-ءبىر جولى رەسپۋب­ليكالىق بيۋدجەت قانا بولسا كەرەك. سوندىقتان دەپۋتاتتار ۇكى­مەت باسشىسىنان وسى ماسەلەنى شەشۋگە ىقپال ەتۋىن سۇرايدى. ك.ءماسىموۆ دەپۋتاتتارعا جول­دا­عان جاۋابىن بىلاي باستاپتى: «قاراعاندى قالاسىندا 1500 ورىندىق كونتسەرت زالىن سالۋعا رەس­پۋبليكالىق بيۋدجەتتەن قارا­جات بولۋگە قاتىستى سىزدەردىڭ ساۋالدارىڭىزدى قاراپ, مىنانى حابارلايمىن». ارى قاراي مادە­نيەت مينيسترلىگىنىڭ بيۋدجەتتىك ءوتىنىمى بويىنشا 2011-2013 جىل­دارعا ارنالعان رەسپۋبليكالىق بيۋدجەتتى قالىپتاستىرۋ شەڭبە­رىندە جوبانى قارجىلاندىرۋ ماسەلەسى رەسپۋبليكالىق بيۋدجەت كوميسسياسىندا قارالعانى بايان­دالادى. رەسپۋبليكالىق بيۋدجەت­تىڭ شىعىستارىن وڭتايلاندىرۋعا بايلانىستى جاڭا ينۆەستيتسيالىق جوبالاردى ىسكە اسىرۋ كەيىنگە شەگەرىلگەن. سوندىقتان دا, «2011-2013 جىلدارعا ارنالعان رەسپۋب­ليكالىق بيۋدجەت تۋرالى» زاڭ جو­باسىندا جانە ۇكىمەتتىڭ 2010 جىلعى 31 تامىزداعى №857 قاۋ­لى­سى جوباسىندا دا كورىنىس تاپپاعان. دەپۋتاتتار اتالعان نىساندى سالۋدى رەسپۋبليكالىق بيۋدجەت ەسەبىنەن 2011 جىلى 1 ميلليارد تەڭگەمەن باستاپ, ءۇش جىل ىشىندە ءبىتىرۋدى ۇسىنعان. پرەمەر-مي­نيستر­دىڭ جاۋابىندا جاڭا ين­ۆەستيتسيالىق جوبالاردى ىسكە اسىرۋ نەعۇرلىم كەيىنىرەك مەرزىمگە قالدىرىلدى دەلىنەدى. الاي­دا, ول مەرزىمنىڭ قانشاعا سوزىلارى ناقتى ايتىلمايدى... اسقار تۇراپباي ۇلى.